Mathais 25:14-30
Nqe cim:
“Cia li muab tus tubtxib uas tsis tsimtxiaj no pov rau sab nraum qhov uas tsaus ntuj nti, nws yuav quaj tom hniav qawv qhov ntawd” (Mathais 25:30)
Lus nug xav:
– Tus tubtxib twg raug hu ua tubtxib siab phem thiab tub nkeeg?
– Vim li cas tus tswv chim thiab rau txim rau nws?
– Peb kawm tau li cas txog tus cwjpwm ua Vajtswv haujlwm?
Tus tubtxib uas tau muab hu ua “siab phem thiab tub nkeeg” yog tus tubtxib uas coj tus tswv choj nyiaj mus faus av tseg (nqe 18), thaum tus tswv rov qab los txog nrhiav cov tubtxib xam tej nyiaj ces tus tubtxib uas coj cov nyiaj mus faus av tseg muab rov qab los rau tus tswv thiab hais daws nws zaj. Thaum tus tswv hnov tej uas nws hais ces tus tswv chim heev thiab hais tias: “Tus tubtxib uas siab phem thiab tubnkeeg…” (nqe 26).
Tus tubtxib no tsis ua tsam ntxiv tiamsis kuj tsis ua cov nyiaj poob, qhov uas tus tswv chim yog cov vimchiv no: Tim ib, nws yog tus neeg tsuas xav txog tus kheej, ua tubtxib rau tus tswv tiamsis xav tau zoo, tsis xav nqis tes ua haujlwm. Tim ob, nws yeej paub tus tswv yuav rov qab los tiamsis saib tus tswv tej lus samhwm thiab lub siab nyiam tsis muaj nqis, cov tubtxib uas txais tau tsib caug choj nyiaj thiab nees nkaus choj puavleej coj mus ua tsam, tshuav nws tus kheej ces tsis quav ntsej, tau zoo noj tau zoo nyob thaum tus tswv mus deb. Tim peb, nws yog ib tug neeg tub nkeeg, vim kev tub nkeeg ua rau nws tsis xav ua haujlwm kom tus tswv tau tsam, thiab cia kom hais daws tau nws zaj, nws tseem liam txim rau tus tswv, hais tias tus tswv tsiv heev thiab ntshaw (nqe 24-25)!
Tus tswv twb qhia meej txog qhov uas nws siab phem, tub nkeeg (nqe 26-27), yog nws paub tus tswv siab li ntawd ces nws yeej coj kaum choj nyiaj mus rau cov neeg ua lag luam ua tsam ntxiv. Lub txim raug tus tubtxib no yog tsis tau nqi zog, raug tus tswv suav tias tsis muaj nqis (nqe 28-30) thiab yuav raug txajmuag, txomnyem mus tas sim neej vim tsis muaj sijhawm hloov ntxiv lawm.
Hauv cov Pawg Ntseeg tam sim no kuj muaj ntau leej tab tom faus yus choj nyiaj, lawv tsis zeem paub tias tus Tswv ntseeg siab thiab txib lawv ua Nws tes haujlwm. Lawv saib qhov uas ua haujlwm zoo li tus kheej poob peev, yog li lawv pheej tso haujlwm thiab hais daws lawv zaj kev tub nkeeg. Cia li nco ntsoov tias, Tswv Yexus yeej yuav rov qab los saib tej uas peb ua xwb, thiab tus tubtxib twg tub nkeeg, tsis ncaj ncees rau tes haujlwm yuav raug txim hnyav heev ntawm tus Tswv. Vajtswv yog tus uas paub txhua yam, Nws paub tagnrho tej uas peb ua, yog li yuav tsis muaj ib qho vimchiv twg lees yuav tau txojkev tub nkeeg thiab tsis kam ua tej haujlwm tus Tswv kom ua. Thov Vajtswv pub rau peb hloov cwjpwm ua haujlwm tam sim no thiab cia li siv zog tas lub peevxwm uas tus Tswv pub rau peb ua.
Thov Vajtswv,
Vajtswv, ua tsaug qhov Koj ceebtoom nyuam yaus paub kom tsis tub nkeeg ua Koj tes haujlwm. Thov Koj qhia nyuam yaus paub Koj tej koob hmoov thiab siv tej ntawd ua tsam ntxiv rau Koj lub tebchaws. Nyuam yaus tuav Tswv Yexus lub npe thov, Amees.
Peb tab tom ua tsam ntxiv rau tus Tswv los yog tab tom muab tus Tswv tej koob hmoov faus tseg?
Nyeem Vajluskub hauv peb lub xyoo: Exethaws 5
Kênh Youtube BHKTHN:
