Mathiơ 25:14-30
“Na dang ei iĕm hiŏng hơtat bơngai mă ưh kơ yua âu tơ anih ‘nguaih măng mu, lê̆ sư nhơ̆m hmoi tơkăp sơnĕnh tơ noh.” (Mathiơ 25:30)
Nơ̆r jet tơchĕng pơwao:
– Bơngai jang ayơ mă đen jô̆ kơ chu păng alah?
– Yua kơ kiơ yŏng sư ‘blĕk păng phak bơngai ‘nâu?
– Đei tơ’blŏk kơ bơ̆n kiơ gah jơhngơ̆m bơ̆jang kơ Kră Yang?
Bơngai jang mă đe krao jô̆ khan “Kơchu păng alah” noh yua kơ bơngai jang iŏk minh hlak jên hu đơ̆ng yŏng sư hơloh sư ‘bŭ ôn tơ sơ lŭng păng ôn hlơp dêh (trong 18), kơplah yŏng lu sư wih brŏk chă lu bơngai jang kơ sư lei na minh ‘nu mă sư ‘bŭ ôn lê̆ minh hlak jên hu lăm sơ lŭng ‘noh năm pơdreo hăm dôm nơ̆r pơma dŏng kơdih, kơplah yŏng sư mơ̆ng kơtơ̆ng thoi noh na blĕk păng hil thoi âu: “Ơ dăm, ih bơngai kơ chu păng alah tăm… (trong 26).
Bơngai jang ‘nâu ưh kơ đei mơdro sa đei lơi mălei kư̆m ưh kơ đei pơm hiong jên yŏng sư, mălei yŏng sư blĕk yua kơ đơ̆ng dôm tơdrong tơ ala âu: Mă mônh, sư bơngai tơchĕng kơdih đĕch, bơngai jang kơ yŏng mălei khan wă gơh hơđơ̆ng, ưh kơ pơyơ̆r akâu bơ̆jang. Mă ‘bar, sư băt yŏng sư gô wih brŏk mălei lăng hmă đĕch đơ̆ng nơ̆r yŏng tơ tă păng thoi yŏng sư wă, lu bơngai jang mă pơđăm hlak jên hu păng ‘bar hlak jên hu noh năm mơdro sa tă đei lơi ngăl, na sư ưh kơ hiơ̆k kơ yŏng sư wă tơdrong kiơ, sư pơhơi hiôk hmă đĕch lăm khei mă yŏng sư năm tơ dêh tơmoi ataih. Mă pêng, sư bơngai alah, yua kơ đơ̆ng tơdrong alah sư na sư ưh kơ ‘maih bơ̆jang wă đei lơi ăn kơ yŏng sư, păng wă pơma tơdrong alah sư, sư pơrơ̆ng khan tơm măt yŏng sư bơngai kơnê̆ păng ham dêh (trong 24-25).
Yŏng sư tơ’bôh tơdrong pơma hơlĕnh, alah đơ̆ng bơngai jang ‘nâu (trong 26-27), dah sư băt hơđăl kơ yŏng sư wă thoi noh lei trŏ sư iŏk jên maih ‘noh ăn kơ đe mơng wă kơ đei lơi. Tơdrong phak ‘măn kơ bơngai jang ‘nâu ‘noh hiong tơdrong apah, yŏng sư khan bơngai ưh kơ yua (trong 28-30), păng oei lăm tơdrong mơlâu, pơmat ling lang yua kơ ưh pă đei jơ năr wă hơmet tơdrong glăi.
Lăm khul bơngai lui dang ei kư̆m đei lơ bơngai oei ôn lê̆ jên maih bơ̆n, lu sư ưh kơ băt tơdrong kăl đei Kră Yang yua lăm tơdrong bơ̆jang lăm hnam Kră Yang, lu sư lăng tơdrong noh ưh kơ đei yua kơ akâu kơdih thoi noh chă tơdrong hiôk hơđơ̆ng păng ling lang dŏng tơdrong alah kơdih lăm tơdrong jang bơ̆jang kơ Kră Yang. Athei ling lang ‘blŏk thoi âu, Kră Yang Yêsu gô jur tơpă wă apịnh jet rim ‘nu bơ̆n jơ̆ bơngai jang kơ sư, păng bơngai yơ alah, ưh kơ tơnăp gô tơ’bơ̆p hăm tơdrong phak trăp tih dêh đơ̆ng Kră Yang, Kră Yang ‘Bok Kei-Dei jơ̆ tơ’ngla băt đĭ tôm tơdrong, Sư băt đĭ dôm tơdrong, Sư băt đĭ dômm tơdrong bơ̆n jang, kơlih kơ thoi noh ưh kơ đei minh tơdrong ayơ gơh jô̆ iŏk đơ̆ng tơdrong alah păng tơdrong ưh kơ hiơ̆k đơ̆ng bơ̆n hăm dômm tơdrong Kră Yang pơjao. Apinh Kră Yang ăn kơ bơ̆n tơplih hloi jơhngơ̆m bơ̆jang kơ Kră Yang păng athei pơm hơdah tơdrong ‘lơ̆ng dôm tơdrong Kră Yang ăn lăm tơdrong jang mă bơ̆n đei iŏk.
Kơkuh kơ ih Kră Yang, bơnê kơ ih đei tơ’blŏk kơ inh wă kơ inh huay kơ alah lăm tơdrong bơ̆jang kơ Ih. Apinh ăn kơ inh ling lang băt bơnê kơ gah dôm tơdrong Ih ăn yua gơh đei yua ăn kơ Dêh char Ih. Krao khan yua anăn Kră Yang Yêsu Krist, Amen.
Bơ̆n oei pơm đei yua ăn kơ Kră Yang dah oei ôn lê̆ jên maih Kră Yang pơjao?
Đŏk Sơ̆p Hla bơar ‘Bok Kei-Dei lăm pêng sơnăm: Êsơtê 5
Kênh Youtube BHKTHN:
