II Hơ’mon 30:17-20
“Dôm tơdrong inh wă pơkă kơ ih dang ei tơdrong âu kăl tơpă: Inh athei iĕm krao khan bơnê kơ ‘Bok Kei-Dei ling lang apinh Sư dŏng mơnat đĭ đăng bơngai” (I Timôthê 2:1)
Nơ̆r jet tơchĕng pơwao:
– Pơtao Hesekia pơm kiơ kơ bơngai tam mă hơmet akâu rơgoh? Lĕch đơ̆ng tơdrong ‘noh thoi yơ?
– Tơdrong krao khan tơgŭm gĭt găl thoi yơ lăm khul tơpôl bơngai lui?
Đĭ đăng lu bơngai đơ̆ng gah tu năm tơ Jêrusalem kiơ̆ nơ̆r pơtao Hesekia krao athei wă wih brŏk dơ̆ng tơ Kră Yang ưh tam đei bu hơmet akâu kơdih rơgoh wă pơm sa Giĕng Năm Brih. Lu sư đĭ jơhngơ̆m chă Kră Yang mălei ưh kơ đei hlôh gah tơdrong juăt hơmet rơgoh yua kơ đơ̆ng lu sư arih hơdai minh pôm dêh char na lu pơtao pơyơ̆r kơkuh kơ rup yang thoi noh ưh kơ đei bơtho tơ’bôh, lu bơngai ‘nâu đe ưh kơ puh tơ brŏk na mălei oei gơh sa Giĕng Năm Brih. Bơngai Lêwi pơyơ̆r tơmam soi tang kơ lu sư, păng Pơtao Hesekia krao khan kơ lu sư. Pơtao băt Kră Yang bơih Tơ’ngla ‘lơ̆ng rơgoh kư̆m Tơ’ngla dim, ‘mêm mơnat. Pơtao băt dah ưh kơ đei pơm kiơ̆ tơdrong juăt noh pơm glăi tơdrong juăt păng pơm ưh kơ ‘lơ̆ng, tơdrong ‘lơ̆ng rơgoh Kră Yang. Kră Yang gô hil mĭl (Lêwi 15:31; II Hơ’mon 26:16-20). Mă khan thoi ei ră, pơtao kư̆m băt jơhngơ̆m Kră Yang păng lu bơngai ‘nâu. Pơtao krao khan apinh Kră Yang mơnat ăn kơ lu sư. Mă khan lu sư ưh kơ pơm kiơ̆ khôi juăt hơmet akâu rơgoh mă lei lu sư bơih bơngai chă Kră Yang đĭ jơhngơ̆m. lu sư đei adrin yak năm ataih truh tơ Jêrusalem, lu sư chu tôm tơdrong, phŏ kư̆m đei lu ‘nhŏng oh hiĕk che bơle, wă chă Kră Yang (II Hơ’mon 30:10).
Kră Yang lăng ‘bôh lăm jơhngơ̆m mă ‘mêm kơ Kră Yang, ‘mêm kơ kon pơlei, wă kơ lu sư wih brŏk tơ Kră Yang đơ̆ng pơtao Hesekia păng jơhngơ̆m ‘maih chă Kră Yang đơ̆ng lu kon pơlei ‘nâu. Kơplah ‘noh sơ̆, Kră Yang đei pơkă kơ pơtao Sôlômôn dah kon pơlei krao khan, chă Kră Yang păng wih brŏk lei na Kră Yang gô mơnat ăn kơ lu sư păng hơmet ming teh đak (II Hơ’mon 7:14). Kơlih kơ thoi noh, Kră Yang mơ̆ng nơ̆r pơtao Hesekia krao khan păng pơklaih kon pơlei Sư, wă khan mơnat ăn kơ lu sư păng sŭt rơgoh gah bơhngol wă kơ lu sư gơh năm jê̆ Kră Yang, gơh sa Giĕng Năm Brih (Jêrêmi 3:22; Hơriso 41:4). Ưh kơsĭ lăp krao khan lu bơngai mă ưh kơ đei kơkuh kơ Kră Yang đơ̆ng sơ̆ wih brŏk tơ Kră Yang đĕch ôh, na pơtao Hesekia kư̆m krao khan tang lu sư, đơ̆ng tơdrong noh na Kră Yang ưh kơ đei phak lu sư, mălei đei mơnat păng sơng iŏk.
Lăm khul tơpôl bơngai lui, tơdrong krao khan tơgŭm, hiơ̆k dih băl noh gĭt băl dêh. Kră Yang Yêsu oei krao khan tang lu bơ̆n yua kơ Sư ‘mêm kơ bơ̆n (Rôm 8:34; Hêbrơ 7:25). Kră Yang kư̆m wă kơ bơ̆n krao khan tang bơngai nai. Bơ̆n gơh krao khan kơplah bơ̆n băt ‘mêm mơnat, hiơ̆k tơgŭm đei lui păng jơhngơ̆m lu ‘nhŏng oh bơ̆n hloh kơ hiơ̆k gah tơdrong juăt, păng kơplah krao khan tang dih băl lei na bơ̆n băt kơ mơnat dih băl hloh. Apinh Kră Yang tơgŭm bơ̆n pơhrăm rok kiơ̆ kơmĭl pơtao Hesekia, hiơ̆k bơngơ̆t kơ đon lui lu ‘nhŏng oh bơ̆n. Mơnat kơ tơdrong rơdu rơmơ̆n, tơdrong pơmat tat dih băl wă krao khan tơgŭm dih băl. Păng bơ̆n kư̆m ưh kơ đei hiơt krao khan kơ lu bơngai mă bơ̆n đei pơm kơdranh ră roi kơ lu sư wă kơ lu sư kư̆m gơh năm tơ Kră Yang.
Kơkuh kơ Ih Kră Yang, bơnê kơ Ih yua kơ Ih đei ‘mêm păng krao khan tơgŭm kơ inh, tơdrong ‘mêm Ih tih tơpă. Apinh Ih ăn kơ inh đei jơhngơ̆m băt adrin, ‘mêm kơ ‘nhŏng oh inh păng krao khan tơgŭm lu sư. Krao khan yua anăn Kră Yang Yêsu Krist, Amen!
Lu bơ̆n hăm đĭ jơhngơ̆m krao khan tang lu ‘nhŏng oh bơ̆n ưh dah mă ưh kơ hiơ̆k kơ lu sư?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 8
Kênh Youtube BHKTHN:
