Tej Lus Qhia 12:9-14
Nqe cim:
“Thaum kawg no yuav tsum hwm Vajtswv thiab ua raws li nws tej lus samhwm, rau qhov nws tsim neeg los ua tes haujlwm ntawd.” (Tej Lus Qhia 12:13).
Lus nug rau sawvdaws xav:
- Tus neeg txawj ntse yog tus zoo li cas thiab nws tej lus qhia yog li cas?
- Xaus phau Tej Lus Qhia, Tus neeg txawj ntse ntuas sawvdaws li cas?
- Vajtswv cov menyuam li feem xyuas yog li cas?
- Peb ua tiav peb feem xyuam rau Vajtswv li cas lawm?
Ib tsoom mloog txhua tus,
Tus sau phau Tej Lus Qhia hu ua tus neeg txawj ntse, nws yog vajntxwv Xalumoos, yog ib tug vajntxwv uas tau Vajtswv pub tswvyim txawj ntse tsis muaj ib tug neeg twg yuav ntse cuag (I-Vajntxwv 3). Vajntxwv tau tshawb nrhiav tej pajlug, kawm paub thiab sim tej pajlug yeej muaj tseeb thiaj muab sau tseg hauv phau Tej Lus Qhia. Thaum xaus phau ntawv no, nws thiaj hais tias nws tej lus qhia yog lus txawj ntse thiab muab los qhia rau tej pejxeem sawvdaws kom muaj quas (nqe 9). Nws tau tshawb nrhiav tej lus zoo nplig siab, tej lus tseeb thiab muab sau tseg cia yuav qhia txhua tus paub ua neej muaj nqis (nqe 10).
Tus sau phau Tej lus qhia kuj hais tias nws tej pajlug yog los ntawm Vajtswv uas yog“Tus Tswv Yug Yaj” muab pub. Nws muab tej pajlug ntawd piv zoo li“cov tub yug yaj tej pas uas lawv tav lawv cov yaj” thiab zoo li “tej ntsia hlau uas muab ntsia ruaj lawm” (nqe 11). Cov neeg yug yaj lawv yeej nqa rawv tus pas yog siv los tav cov yaj mus ncaj kev thiab muab plawm kom cov yaj mus sai dua. Yam kev piv no xav hais txog tus cai tswj kawm Vajtswv Txojlus yuav tau muab los tswj txhua tus ntseeg kev kawm xyaum Vajtswv Txojlus txhua hnub. Tus qhia Vajtswv Txojlus ces yuav tau ruaj siab rau tej kev tseeb uas yus qhia rau cov uas yus coj lawv kawm lawm ib yam li teeb hlaus ntsia ruaj ntawm ntoo. Ntxiv mus yog txhob cia kev txhawj txog tes haujlwm xav sau ntau phau ntawv thiab kawm ntau ntxiv raws li ntiajteb tej ntawd yuav ua rau peb mus deb qhov tseeb thiab ua rau peb qaug zog (nqe 12). Peb ua neej luv kawg, vim li ntawd peb yuav tsum saib ntsoov rau kev kawm xyaum tej lus muaj tswvyim hauv Vajluskub, kom muaj nqis rau peb lub neej tiam no thiab tiam tom ntej uas yuav nyob ibtxhis.
Thaum kawg, tus neeg txawj ntse xaus ib lo lus tseemceeb ntsigtxog tibneeg feem xyuam hais tias: “…yuav tsum hwm Vajtswv thiab ua raws li nws tej lus samhwm, rau qhov nws tsim neeg los ua tes haujlwm ntawd” (nqe 13). Tus sau phau Pajlug kuj hais meej txog qhov tseemceeb ntawd hais tias: “Tus uas hwm tus Tswv, tus ntawd thiaj yog tus uas muaj kev txawj ntse.” (Pajlug 1:7; 9:10). Yog li ntawd, fwm tus Tswv thiab ua raws li Nws tej lus samhwm yog tibneeg li feem xyuam uas yuav tau ua rau Vajtswv, tshwjxeeb yog peb cov uas yog Vajtswv menyuam lawm. Thaum peb fwm tus Tswv, peb yuav paub qaij deb kev txhaum thiab ua lub neej raws li Vajtswv Txojlus qhia.
Tus neeg txawj ntse kuj hais tias, vim li cas tibneeg yuav tsum fwm tus Tswv thiab ua raws li Nws tej lus samhwm, twb yog vim tus Tswv txiav txim rau tibneeg txhua tus raws li tes haujlwm uas peb ua zoo lossis ua phem (nqe 14). Thaum zeem paub li ntawd, peb cov uas yog Vajtswv tej menyuam haj yam yuav tau ua kom tiav peb feem xyuam uas yog fwm Vajtswv thiab ua raws li Nws tej lus samhwm tseg. Yog yuav ua tau raws li Vajtswv tej lus qhia, peb yuav tsum niaj hnub kawm Vajtswv Txojlus tsis tseg. Peb yuav tsum los rhawv muaj tus cai rau kev kawm xyaum Vajtswv Txojlus, kom peb tau lub tswvyim tus Tswv pub tsis tseg thiab paub tiav peb feem xyuam pub rau Vajtswv.
Thov Vajtswv
Tus Tswv, thov Koj pab nyuam yaus pheej nrhiav Koj lub siab nyiam tsis tseg los ntawm kev kawm xyaum Koj Txojlus, kom nyuam yaus paub ua tiav nyuam yaus feem xyuam pub rau koj uas yog fwm Koj thiab ua raws li Koj tej lus samhwm tseg. Amees.
Ib tsoom mloog uas hmov thiab tshua,
Peb puas tas siab kawm xyaum Vajtswv Txojlus kom paub ua tiav peb li feem xyuam rau tus Tswv lawm?
Nyeem Vajluskub hauv peb lub xyoo: Yauj 7
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
