Klei Aê Diê Blŭ: Khua Pô Mtô 12:9-14
Êlan kliăng: “Huĭ mpŭ bĕ kơ Aê Diê leh anăn djă pioh klei Ñu mtă; kyuadah klei anăn jing jih klei djŏ brei mnuih ngă” (Khua Pô Mtô 12:13b).
Klei êmuh ksiêm mĭn: Si mnuih Khua Pô Mtô jing leh anăn ya bruă ñu ngă leh? Ti kdrêč knhal tuč hdruôm hră Khua Pô Mtô, ya klei bi hriăm ñu bi êdah? Ya jing bruă čuăn kơ phung anak Aê Diê? Si drei ngă čiăng dưi bi leh bruă klam drei hŏng Khua Yang?
Pô čih hdruôm hră Khua Pô Mtô amâodah đa iêu Pô Hưn Klei đăo, arăng lač jing mtao Salômôn yơh, sa čô mtao Aê Diê brei klei thâo mĭn amâo mâo pô mđơr ôh (I Bruă Mtao 3). Ñu tui duah, ksiêm, hriăm leh anăn čih hưn mdah kơ klei hdĭp leh anăn lu klei ƀuh yuôm bhăn hlăm hră Khua Pô Mtô. Ti kdrêč knhal tuč hdruôm hră anei, ñu brei thâo klei ñu mtô lač jing klei thâo mĭn leh anăn ñu dôk hưn mdah klei thâo săng kơ phung ƀuôn sang hŏng klei mâo pruê̆ êlan (êlan 9). Ñu hur har hrui duah boh blŭ bi mơak leh anăn lŏ čih wĭt boh blŭ sĭt nik hŏng djŏ čiăng đru jih jang mnuih thâo kral si klei mblang kơ klei hdĭp (êlan 10).
Pô čih hră ăt hưn mdah mơh klei ñu blŭ mâo klei myang mơ̆ng “Pô Mgăt Biăp”. Ñu bi msĕ klei blŭ anăn msĕ si “msei knur Mgăt Biăp” leh anăn msĕ si “msei kđĭn arăng pơ̆ng kjăp” (êlan 11). Msei knur arăng mkra bi đuôm ti êdŭk giê hnuăt čiăng kơ pô mgăt mtrŭt hlô mnơ̆ng rông nao pral hĭn. Klei bi msĕ anei čiăng lač kơ pô hriăm Klei Aê Diê Blŭ ăt mtrŭt bi kpĭ mjuăt hlăm klei hriăm mơh. Pô bi hriăm brei kđăl kjăp klei sĭt nik yuôm kơ pô drei bi hriăm. Tui tluôn anăn, pô čih mtă mtăn kơ drei đăm tui duah ôh klei thâo mĭn amâo mâo knhal tui si lăn ala kyuadah srăng mâo lu klei mĭn bi klăk hŏng klei sĭt nik Klei Aê Diê Blŭ ngă bi êmăn kơ asei mlei drei (êlan 12). Klei hdĭp jing đŭt snăk kyuanăn brei drei êlâo hĭn bi kƀĭn klei mĭn kơ klei tui duah leh anăn hriăm Klei Blŭ thâo mĭn mơ̆ng Hdruôm Hră Klei Aê Diê Blŭ čiăng mâo klei tŭ dưn êjai ti lăn ala anei wăt hlăm klei hdĭp hlŏng lar.
Ti knhal tuč, Khua Pô Mtô klah čŭn sa klei sĭt nik yuôm bhăn lač kơ bruă čuăn kơ anak mnuih, klei anăn jing “Huĭ mpŭ bĕ kơ Aê Diê leh anăn djă pioh klei ñu mtă” (êlan 13). Pô čih hră Klei Bi Hriêng ăt hưn klă klei sĭt nik: “Klei huĭ mpŭ kơ Yêhôwa jing klei kčưm kơ klei thâo mĭn leh anăn thâo săng; ” (Klei Bi Hriêng 1:7; 9:10). Snăn, huĭ mpŭ kơ Aê Diê leh anăn gưt ngă tui si Klei Ñu Blŭ jing bruă čuăn kơ grăp čô mnuih, boh nik nak kơ phung anak Aê Diê. Tơdah huĭ mpŭ kơ Khua Yang, drei srăng gĭr weh đuĕ kbưi mơ̆ng klei soh leh anăn dôk hdĭp đup gưt tui si Klei Ñu mtô lač.
Khua Pô Mtô ăt bi êdah phŭn knhal kơ klei brei anak mnuih huĭ mpŭ leh anăn gưt djă pioh Klei Aê Diê Blŭ, kyuadah Aê Diê srăng phat kđi jih jang klei drei ngă, thâodah jăk thâodah jhat (êlan 14). Thâo săng klei anei, phung anak Aê Diê brei ktang hĭn mơh hdơr djă pioh bruă čuăn kơ pô jing huĭ mpŭ kơ Aê Diê leh anăn gưt djă pioh Klei Ñu Blŭ. Čiăng gưt djă pioh Klei Aê Diê Blŭ snăn brei hriăm Klei Ñu Blŭ nanao. Brei drei thâo mprăp mkra hdră bi kpĭ mjuăt pô kơ klei hriăm Klei Aê Diê Blŭ čiăng dôk hdĭp nanao hlăm klei thâo mĭn Khua Yang brei leh anăn ngă bi leh bruă čuăn tui si Khua Yang čiăng.
Si ngă drei hŏng jih ai tiê hriăm Klei Aê Diê Blŭ čiăng ngă bi leh bruă čuăn kơ drei mơ̆?
Wah lač: Ơ Khua Yang, akâo Ih đru kâo tui duah nanao klei Ih čiăng mơ̆ng Klei Ih Blŭ čiăng kơ kâo ngă bi leh bruă čuăn Khua Yang jao jing klei huĭ mpŭ leh anăn gưt djă pioh Klei Ih Blŭ. .
Dlăng Klei Aê Diê Blŭ hlăm tlâo thŭn: Y-Yôp 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
