Mathais 23:16-22
Nqe cim:
“Lawv hais tias lawv yog cov uas paub Vajtswv, tiamsis lawv tsis ua lawv lub neej zoo li cov uas paub Vajtswv ua, lawv yog neeg siab phem thiab tsis mloog leejtwg lus. Koj tsis txhob muab ib txog haujlwm tseebceeb tso rau cov neeg ntawd ua hlo li, rau qhov lawv yeej ua tsis tau” (Titus 1:16 )
Lus nug xav:
– Tswv Yexus cem cov xibhwb uas qhia Vajtswv Txojlus thiab Falixais yam dabtsi?
– Lawv muab cov kev xav tsis muaj qabhau ntawd los hais muaj homphiaj dabtsi?
– Totaub Vajtswv Txojlus pab tau peb txojkev ntseeg zoo li cas?
Tswv Yexus rov cem cov xibhwb uas qhia Vajtswv txoj Kevcai thiab cov neeg Falixais ntxiv hais tias lawv yog “cov neeg digmuag coj lwm tus kev”. Tus Tswv xav hais txog qhov uas lawv totaub yuam kev Vajtswv Txojlus los tseem ua cov coj lwm tus kev, ob leeg yeej yuav poob kev puastsuaj xwb (Mathais 15:14). Cov neeg Yudais txaus siab thiab khav tias lawv paub Vajtswv Txojlus, lawv khav hais tias lawv“yog cov uas coj cov neeg digmuag kev, thiab yog lub teeb uas ci pom kev rau cov neeg uas nyob hauv qhov tsaus ntuj, thiab nej yog cov uas qhia cov ruam, yog cov xibhwb uas qhia cov menyuam yaus…” (Loos 2:19-20). Lawv pheej hais tias tej kevcai uas lawv rhawv yeej yog ua raws nraim li Vajtswv Txojlus, tiamsis Tswv Yexus qhia paub qhov uas lawv tsis paub tus Tswv nplooj siab. Tim ib, lawv hais tias: “Yog leejtwg tuav txog lub Tuamtsev coglus, yog nws tsis ua raws li nws coglus los tau; tiamsis yog nws tuav txog tej nyiaj kub uas nyob hauv lub Tuamtsev coglus, nws yuav tsum ua raws li nws tau coglus tseg lawm. Cov neeg digmuag uas ruam! Yam twg tseemceeb dua? Tej kub lossis lub Tuamtsev uas ua rau tej kub ntawd tseemceeb? (nqe 16-17). Kub muaj nqis tiamsis kub tau siv hauv lub Tuamtsev nws tsis yog muaj nqis xwb tiamsis tseem yog ua kom dawbhuv, yog li ntawd muaj lub Tuamtsev kub thiaj muaj nqis. Tim ob, lawv hais tias, “Yog leejtwg tuav txog lub Tuamtsev coglus, yog nws tsis ua raws li nws coglus los tau; tiamsis yog nws tuav txog tej nyiaj kub uas nyob hauv lub Tuamtsev coglus, nws yuav tsum ua raws li nws tau coglus tseg lawm”, lawv saib qhov kev fij khoom tseemceeb yog ntawm lub thaj fij. Tswv Yexus nug lawv hais tias, “Tej khoom fij uas nyob saum lub thaj lossis lub thaj uas ua rau tej khoom ntawd muaj nqis?” (nqe 18-19), txhais tau tias vim muaj lub thaj ces cov khoom fij thiaj tau fij.
Cov xibhwb uas qhia Vajtswv txoj Kevcai thiab cov neeg Falixais tau muab lub thaj txo qis thiab tsa lub Tuamtsev siab vim muaj kub thiab tej khoom siv hauv. Lawv lub homphiaj yog qhuas tej khoom fij muaj nqis, thiab zam tej lus cog tseg. Tswv Yexus thiaj cem cov neeg no, Nws muab lawv hu ua “cov neeg ruam thiab digmuag”, lawv tsis zeem paub lawv qhov txhaum thiab ua tawmtsam Vajtswv los ntawm tej lus cog tseg (nqe 21-22).
Totaub Vajtswv Txojlus tseemceeb heev rau peb lub neej ntseeg. Totaub yog Vajtswv Txojlus yuav pab kom peb ua tau raws Nws lub siab nyiam txaus nkaus, thiab tsis raug tus Tswv cem. Vajtswv Txojlus qhia kom peb tsis txhob coglus, “Qhov uas yog, nej cia li hais tias, yog, qhov uas tsis yog, nej cia li hais tias, tsis yog. Yog nej hais tshaj ob lo lus ntawd, ces tej lus ntawd yog los ntawm dab Ntxwgnyoog los xwb” (Mathais 5:37), Vajtswv xav kom peb “peb yuav tsum muaj txojkev hlub thiab hais lus tseeb” (Efexus 4:15). Yog li ntawd, peb yuav tsis yog tus neeg coj kev uas digmuag tiamsis yog tus neeg totaub Vajtswv Txojlus thiab siv Vajtswv Txojlus los txhim khov sawvdaws hauv txojkev ntseeg.
Thov Vajtswv,
Vajtswv, thov Koj pab kom nyuam yaus niaj hnub ntshaw kawm Koj Txojlus kom paub ntxiv hais txog tus Tswv txhua hnub, nyuam yaus thiaj paub ua neej rau Koj tau ntsejmuag los ntawm tej lus hais thiab haujlwm ua. Nyuam yaus tuav Tswv Yexus lub npe thov, Amees.
Peb puas kawm thiab puas totaub Vajtswv Txojlus kom paub ua neej?
Nyeem Vajluskub hauv peb lub xyoo: Hauxeyas 3-4
Kênh Youtube BHKTHN:
