II Kauleethaus 13:5-8
Nqe cim:
“Nej cia li ua tib zoo xav thoob thoob saib nej puas yog cov uas muab siab rau ntseeg los tsis yog? Nyaj nej yuav paub lawm hais tias Yexus Khetos nyob hauv nej lub siab. Yog nej tsis paub ntshai nej tsis yog cov uas ntseeg tiag” (II Kauleethaus 13:5).
Lus nug rau sawvdaws xav:
– Timthawj Paulus ntuas cov ntseeg hauv Kauleethaus yuavtsum cim civ rov tshawb xyuas yam dabtsi?
– Timthawj Paulus xav tau dabtsi ntawm lawv?
– Koj puas cim civ rov tshawb xyuas koj kev ntseeg saib zoo li cas lawm?
Nej cia li ua tib zoo xav thoob thoob saib nej puas yog cov uas muab siab rau ntseeg los tsis yog? Ntawm no yog yam uas timthawj Paulus ntuas txhua tus ntseeg hauv pawg ntseeg Kauleethaus yuavtsum txawj tig rov saib yus kev ntseeg, “Nyaj nej yuav paub lawm hais tias, Yexus Khetos nyob hauv nej lub siab. Yog nej tsis paub ntshai nej tsis yog cov uas ntseeg tiag”. Kom txhua tus cia li cim civ rov tshawb xyuas nyias saib (nqe 5) yog tseem tshuav kev ntseeg nyob hauv Tswv Yexus ,ces lawv yuav zeem paub hais tias, timthawj Paulus thiab lawv puavleej tseem “ yog cov uas ntseeg tiag” (nqe 6), vim lawv kev ntseeg yog los ntawm timthawj Paulus ua tus qhia thiab nws saib lawv “yog tsab ntawv uas Yexus Khetos yog tus sau thiab peb yog cov uas xa. Tsis yog nws muab kua mem sau, tiamsis yog nws muab Vajtswv tus uas muaj sia nyob tus Ntsujplig sau rau hauv neeg lub siab” (II Kauleethaus 3:1-3).
Timthawj Paulus sau ntawv ntuas cov ntseeg hauv nroog Kauleethaus, tshwjxeeb yog ntuas cov uas ua txhaum tsis kam lees txim thiab cov uas tsis txaus siab rau timthawj Paulus yog ib tug timthawj tiag. Lub homphiaj yog xav pab kom cov ntseeg ua txhaum tso lawv tej kev phem kev qias tseg thiab ua neej tsimnyog qhov uas lawv ntseeg Tswv Yexus. Txawm yog coob tus yuav xav tsi zoo rau timthawj Paulus thiab cov koom nrog nws ua haujlwm uake los tsis ua cas. Qhov tseemceeb tsuas yog cov ntseeg txhua tus paub lees txim los ua ib pawg ntseeg dawbhuv thiab tuav kev ntseeg kom ruaj rau hauv Tswv Yexus, tsis tso kev ntseeg tseg ces tim thawj Paulus zoo siab lawm.
Txhua tus ntseeg hauv nroog Kauleethaus tsimnyog nyias cim civ tshawb xyuas nyias tus kheej, tiamsis lawv tsis ua li ntawd, lawv mus saib thiab tshawb xyuas lwm tus lub neej. Qhov ntawd uas rau lawv tawg ua pab ua pawg, qee leej mus mloog raws li tej kev ntseeg cuav qhia thiab ua ntau yam kev txhaum. Yog li ntawd, timthawj Paulus thiaj ntuas lawv kom txhua tus nyias cim civ rov los tshawb xyuas nyias tus kheej, ua ntej uas nws tuaj ntsib lawv. Timthawj Paulus yuav ua raws li “tej lus tseeb” thiab rau txim hnyav rau lawv (nqe 8).
Peb yeej ib txwm saib pom lwm tus tej kev txhaum thiab txiav txim rau lwm tus heev dua li peb rov tig saib peb tus kheej. Yog li ntawd, dhau zaj kawm no peb yuavtsum cim civ tig saib peb tus kheej thiab tshawb xyuas peb lub neej saib puas tseem tuav ruaj kev ntseeg txog Tswv Yexus, Vaj Ntsujplig puas tseem ua tus Tswv nyob hauv peb lub neej thiab peb puas txi Vaj Ntsujplig cov txiv? Yog peb muab Vajtswv Txojlus los ua daim tsom iav saib peb thiab tshawb xyuas peb tus kheej ces peb yuav tswj tau lub neej kom dawbhuv haum Vajtswv siab, thiab peb yuav sib pab, sib txhawb, txhim kho tus Tswv Yexus lub cev uas yog pawg ntseeg kom loj hlob tsis tseg.
Thov Vajtswv
Vajtswv,nyuam yaus ua Koj tsaug, Koj yog Tus dawbhuv thiab zoo kawg nkaus, tiamsis vim yog hlub nyuam yaus Koj thiaj zoo siab nqis los rau hauv lub ntiajteb, los nyob hauv nyuam yaus lub neej uas poob qis no. Thov pab nyuam yaus txawj tig los kho lub neej kom tsimnyog tej koob hmoov uas Koj Pub. Amees.
Thaum cim civ tig rov saib xyuas tus kheej, peb pom yam dabtsi uas cheemtsum kho thiab hloov?
Nyeem Vajluskub hauv peb lub xyoos: Tes Haujlwm 9:10-43.
Kênh Youtube BHKTHN:
