Klei Aê Diê Blŭ: II Kôrantô 13:5-8
Êlan kliăng: “Ksiêm bĕ kơ diih pô čiăng thâo thâodah diih dôk hlăm klei đăo. Lông dlăng bĕ diih pô. Diih amâo thâo hĕ kơ Yêsu Krist dôk hlăm diih? — knŏng tơdah diih amâo dưi hlăm klei lông dlăng anăn” (II Kôrantô 13:5)
Klei êmuh ksiêm mĭn: Ya klei Khua ƀĭng kna Y‑Pôl lač kơ phung đăo Kôrantô čŏng ksiêm dlăng, čŏng bi mklă? Ya klei ñu čang hmăng mơ̆ng digơ̆? Si diih čŏng ksiêm dlăng leh anăn čŏng bi mklă klei đăo pô hlăm Khua Yang?
Ayŏng adei dôk hlăm klei đăo mơ̆? Anei jing klei Khua ƀĭng kna Y‑Pôl mñă kơ grăp čô phung đăo Sang Aê Diê Kôrantô brei ksiêm dlăng. Lông dlăng bĕ diih pô. Diih amâo thâo hĕ kơ Yêsu Krist dôk hlăm diih? (êlan 5). Tơdah klei đăo hlăm Khua Yang Yêsu ăt adôk hlăm ayŏng adei snăn ayŏng adei ăt srăng thâo Khua ƀĭng kna Y‑Pôl “amâo lĕ ôh” msĕ si diñu (êlan 6), kyua klei đăo diñu jing kyua Khua ƀĭng kna Y‑Pôl mtô msĕ si ñu tuôm bi êdah leh klei mĭn pô dlăng kơ digơ̆ jing “…hră mơ̆ng Krist hmei djă ba leh, amâo djŏ ôh čih hŏng êa jŭ, ƀiădah hŏng Mngăt Myang Aê Diê hdĭp…” ( II Kôrantô 3:1-3).
Čih hră mñă kơ phung đăo ti Kôrantô snăn, boh nik hŏng phung ngă soh leh ƀiădah amâo kmhal klei soh ƀiădah lŏ êmuh kơ klei dưi Khua ƀĭng kna Y‑Pôl, ñu knŏng čiăng mđing kơ sa hdră kñăm jing đru kơ phung đăo tinei lui bruă măk ƀai, ngă klei jăk leh anăn mâo knuih hdĭp năng hŏng klei đăo pô hlăm Khua Yang Yêsu. Dưi mâo snăn wăt tơdah grăp čô mnuih bi mĭn Khua ƀĭng kna Y‑Pôl leh anăn phung mă bruă mbĭt hŏng ñu amâo djăp hnơ̆ng čuăn, năng lui hĕ dưn kăn ênguôt rei. Klei yuôm bhăn hĭn ñu čang hmăng kơ phung đăo ngă soh thâo kmhal klei soh čiăng kơ Sang Aê Diê jing doh jăk, hrăm mbĭt răng kriê klei đăo hlăm Khua Yang Yêsu Krist amâo mâo hlei pô lui ti tluôn ôh.
Phung đăo ti Sang Aê Diê Kôrantô hrô kơ čŏng ksiêm dlăng pô snăn lŏ hdơ̆ng bi ksiêm dlăng hdơ̆ng pô anăn ba klei bi kah mbha, lu phung hmư̆ klei soh čhuai mơ̆ng klei đăo soh leh anăn rông ba klei soh… Ti anăp klei năng ênguôt anăn, Khua ƀĭng kna Y‑Pôl mñă kơ diñu brei čŏng ksiêm dlăng leh anăn bi mklă pô, tơdah amâo ngă snăn ñu srăng “knŏng dôk tĭng kơ klei sĭt nik” ƀuah mkra ktang (êlan 8).
Drei ăt khăng ksiêm dlăng, lač kơ phung mkăn hĭn kơ čŏng ksiêm dlăng leh anăn bi mklă pô lŏ krơ̆ng kjăp klei đăo hlăm Khua Yang mơ̆, Yang Mngăt Jăk ăt jing khua kơ klei hdĭp drei leh anăn mâo boh mơ̆ng Yang Mngăt Jăk mơ̆? Tơdah grăp blư̆ drei dlăng hlăm Klei Aê Diê Blŭ čiăng ksiêm dlăng klei đăo pô hlăm Khua Yang leh anăn čŏng ksiêm dlăng knuih pô đăo snăn drei srăng thâo răng pioh klei hdĭp doh jăk bi mơak kơ Aê Diê, leh anăn grăp čô srăng hrăm mbĭt mkŏ mjing, mđĭ kyar Sang Aê Diê.
Drei ƀuh ya klei brei mkra mlih leh ksiêm dlăng leh anăn bi mklă klei đăo pô?
Wah lač: Ơ Aê Diê! Bi mni lač jăk kơ Ih kyua Ih jing Pô doh jăk, yuôm bhăn ƀiădah kyua khăp kơ kâo hriê leh ti lăn ala mơak dôk hlăm klei hdĭp điêt dhiêt kâo. Akâo kơ Ih đru kâo thâo săng klei yuôm bhăn anei čiăng mâo knuih hdĭp jăk, năng hŏng klei pap Ih brei kơ kâo.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 9:10-43
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
