Titus 1:1-2
Nqe cim:
“…lawv thiaj muaj vam tias yuav tau txojsia ib txhis tsis kawg uas Vajtswv tus tsis txawj dag tau cog lus tseg thaum chiv keeb los lawm,…” (Titus 1:2)
Lus nug rau sawvdaws xav:
– Txojsia ib txhis uas Paulus hais txog los qhov twg los?
– Ua li cas kom tau txais txojsia ib txhis?
– Peb yuav ua neej thiab ua haujlwm li cas thaum cia siab rau txojsia ibtxhis uas Vajtswv coglus yuav pub?
Timthawj Paulus tau txais tes haujlwm ntawm Vajtswv “…qhia kom lawv paub txojlus tseeb uas peb ntseeg, lawv thiaj yuav tau txojsia ntev dhawv mus ibtxhis…” (nqe 1-2). Txojsia ib txhis yog Vajtswv Tus uas ib txwm muaj nyob txoj, Nws tabtom nyob rau hauv txhua uas Nws xaiv lawm. Ntawd yog txoj sia tam sim no, hauv ntiaj teb no, thaum ib tug neeg ntseeg Tswv Yexus, cia Nws los nyob rau hauv yus lub siab, thiab yus “yuav nrog tus Tswv nyob mus ibtxhis li” thaum uas Nws rov qab los (1 Thexalaunikes 4:17).
Cov ntseeg txoj kev cia siab rau txoj sia ibtxhis yog los ntawm tso siab rau Vajtswv tus ncaj ncees uas tsis dag ib zaug li. Ntawd tsis yog ib txoj kev tso siab uas paub tsis meej tiamsis yog ib txoj kev tso siab rau yam uas muaj tseeb tseeb. Timthawj Paulus hnub thaud thiab Vajtswv cov menyuam niaj hnub nimno muaj feem xyuam qhia txog txojsia ib txhis rau coob tus kom los ntseeg Yexus tau txais txojsia (Yauhas 3:16). Yog ib tug tibneeg txais yuav txojsia ib txhis zoo li txais yuav ib txoj kev kawm txawj kawm ntse xwb ces tsis muaj qabhau dab tsi rau nws. Tiam sis yuav muaj nqis rau txhua tus uas txais yuav txoj Moo Zoo, ntseeg thiab muaj lub neej hloov dua tshiab “paub qhov tseeb uas raws li Vajtswv txojkev” (nqe 1 HMOWSV).
Peb txhua tus yuavtsum rov qab tig saib yus txoj kev ntseeg. Muaj ntau tus yug los rau hauv tsev neeg ntseeg tiamsis tsuas yog hnov thiab txais txoj Moo Zoo, zoo ib yam li txais yuav ib txoj kev kawm paub kev ntseeg xwb, yeej tsis lees txais Vajtswv los ntawm kev ntseeg, tsis ua neej raws li Vajtswv Txojlus. Txhua tus uas ntseeg Vajtswv zoo li ntawd, lolus “txojsia ib txhis” tsuas yog lawv kev ntshaw tsis muaj tseeb. Txawm tus ntawd nyob hauv Vajtswv lub tsev los nws tseem tsis tau muaj txojsia ib txhis vim nws tsis muaj kev ntseeg thiab tsis muaj Vajtswv nyob hauv nws lub neej. “…yuav tsum ceevfaj, nyob tsam nej cov muaj qee leej tsis tau mus nrog nws so” (Henplais 4:1).
Txoj kev ntseeg tseeb rau txojsia ib txhis uas Vajtswv pub, yuav pab tus ntseeg ntawd ua neej dawbhuv phim rau kev ntseeg kom tsimnyog rau txojsia ib txhis yav tom ntej no. Tus ntawd lub neej yuav tsis mob siab nrhiav tej yam uas qhovmuag pom, thiab yuav tsis khaws txhua yam tseg cia rau lub ntiajteb uas nyob ib pliag no lawm. Tiamsis kev tos ntsoov rau txoj sia ib txhis yuav txhawb kom peb ua Vajtswv haujlwm kawg siab kawg ntsws, thiab qhov ntawd kuj yog lub zog rau peb txawm yuav ntsib kev sim siab thiab kev khwv los peb txeev ncaj ncees ua Vajtswv haujlwm.
Thov Vajtswv:
Tus Tswv, thov pab nyuam yaus txais yuav Koj txoj Moo Zoo cawmdim los ntawm kev ntseeg. Thov Koj los nyob, tswj thiab coj txhua yam hauv nyuam yaus lub neej kom thiaj yuav tau txais txoj sia ib txhis. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb yuavtsum ua dab tsi thiaj tau txais txoj sia ib txhis uas Vajtswv coglus tseg lawm?
Nyeem Vajluskub hauv peb lub xyoos: Cov Thawjtswj 10
Kênh Youtube BHKTHN:
