Klei Aê Diê Blŭ: Y-Tit 1:1-2
Êlan kliăng: “Hlăm klei čang hmăng kơ klei hdĭp hlŏng lar Aê Diê ƀuăn leh mơ̆ng lu ênuk êlâo — Ñu amâo tuôm luar ôh” (Y-Tit 1:2)
Klei êmuh ksiêm mĭn: Klei hdĭp hlŏng lar Khua ƀĭng kna Y-Pôl lač kna ti dlông ya atur? Si ngă čiăng dưi mâo klei hdĭp hlŏng lar? Si drei srăng hdĭp leh anăn mă bruă tơdah knang hlăm klei hdĭp hlŏng lar Aê Diê ƀuăn?
Khua ƀĭng kna Y-Pôl mâo bruă klam Aê Diê jao “…čiăng bi mđĭ klei đăo phung Aê Diê ruah leh anăn klei diñu thâo săng klei sĭt nik bi djŏ hŏng klei thâo mpŭ kơ Aê Diê, hlăm klei čang hmăng kơ klei hdĭp hlŏng lar ,…” (êlan 1-2). Klei hdĭp hlŏng lar jing klei hdĭp Aê Diê Pô Hdĭp, Pô dôk bi êdah hlăm phung Ñu ruah leh. Anăn jing klei hdĭp ară anei hin, ti lăn anei, tơdah sa čô mnuih đăo kơ Aê Diê, čiăng kơ Ñu mŭt hlăm ai tiê, leh anăn srăng “dôk hlŏng lar mbĭt hŏng Khua Yang” tơdah Khua Yang lŏ hriê (I Têsalônik 4:17).
Klei hdĭp hlŏng lar phung đăo kơ Khua Yang čang hmăng kna ti dlông atur klei Aê Diê ƀuăn sĭt nik, Pô amâo blŭ luar ôh, ƀuăn leh kơ sa klei hdĭp hlŏng lar. Anăn amâo djŏ jing sa klei čang hmăng amâo klă ôh ƀiădah jing sa klei čang hmăng klă sĭt. Khua ƀĭng kna Y-Pôl hlăk êlâo leh anăn phung ƀuôn sang Aê Diê hruê anei mâo bruă klam hiu hưn klei hdĭp hlŏng lar kơ lu mnuih čiăng diñu dưi mă tŭ tơdah đăo kơ Khua Yang Yêsu (Y-Yôhan 3:16). Klei hdĭp hlŏng lar srăng hơăi mang tơdah mnuih hmư̆ leh anăn mă tŭ msĕ si mă tŭ klei thâo kreh knhâo amâodah klei hriăm kơ ai tiê klei mĭn. Ƀiădah knŏng mâo ênoh yuôm dưi bi mtlaih mngăt hŏng phung mâo Aê Diê ruah, jing phung mă tŭ Klei Mrâo Mrang Jăk mơ̆ng Khua Yang Yêsu Krist hŏng klei đăo, leh anăn hdĭp klei hdĭp bi mlih hŏng klei “bi djŏ hŏng klei thâo mpŭ kơ Aê Diê” (êlan 1).
Grăp čô drei brei lŏ dlăng klei đăo pô. Mâo lu mnuih amĭ kkiêng hlăm gŏ sang phung đăo ƀiădah knŏng hmư̆ leh anăn mă tŭ Klei Mrâo Mrang Jăk bi mtlaih mơ̆ng Khua Yang Yêsu Krist msĕ si mă tŭ sa klei thâo klei đăo amâo djŏ mă tŭ Khua Yang hŏng klei đăo ôh, amâo hdĭp leh anăn hlue ngă Klei Aê Diê Blŭ mtô ôh.
Hŏng phung đăo kơ Aê Diê snăn, boh blŭ “klei hdĭp hlŏng lar” srăng knŏng jing sa klei čang hmăng amâo sĭt ôh. Wăt tơdah pô anăn dôk hlăm sang Aê Diê dưn ƀiădah ăt ka mâo ôh klei hdĭp hlŏng lar kyua amâo mâo klei đăo, amâo mâo Aê Diê hlăm klei hdĭp. “…brei drei huĭ đăm brei sa čô hlăm phung diih Aê Diê ksiêm ƀuh amâo dưi mŭt ôh” (Hêbrơ 4:1).
Klei đăo djŏ klă kơ klei hdĭp hlŏng lar Aê Diê brei srăng đru kơ phung đăo kơ Aê Diê hdĭp doh jăk djŏ guôp hŏng ai tiê huĭ mpŭ čiăng năng hŏng klei hdĭp hlŏng lar hruê êdei. Klei hdĭp pô anăn srăng amâo lŏ dôk mĭn kơ klei thâo ƀuh ôh, amâo lŏ dưm boh phŭn kriê pioh kơ pô ti lăn ala jing anôk mâo klei hdĭp jing êjai.
Mđing kơ klei hdĭp hlŏng lar srăng mđĭ ai drei jih ai tiê mă bruă kơ Aê Diê, leh anăn anăn ăt jing klei ktang kơ drei sĭt suôr mă bruă kơ Ñu wăt tơdah tuôm hŏng ya klei lông dlăng dleh dlan.
Ya klei drei ngă čiăng mâo klei hdĭp hlŏng lar Aê Diê kpă ênô ƀuăn leh?
Wah lač: Ơ Khua Yang, akâo kơ Ih đru kâo mă tŭ Klei Mrâo Mrang Jăk bi mtlaih mơ̆ng Ih hŏng klei đăo. Akâo kơ Khua Yang kiă kriê, dôk mbĭt leh anăn atăt gai djăp mta hlăm klei hdĭp kâo čiăng kơ kâo dưi dưn klei hdĭp hlŏng lar Aê Diê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
