Yelemis 48:1-13
Nqe cim:
“Mau-am, koj cia siab rau koj lub zog thiab koj txojkev npluanuj, tiamsis nimno koj twb swb lawm; koj tus mlom Khemaus yuav raug luag coj nrog nws cov nomtswv thiab cov povthawj mus rau lwm lub tebchaws”(Yelemis 48:7).
Lus nug rau sawvdaws xav:
– Mau-am yog leejtwg cajceg?
– Ntu Vajluskub no qhia pom lawv tau ua tej yam kev txhaum loj li cas? Thiab qhov nujnqis ntawd yog dab tsi?
– Koj kawm tau yam dab tsi txog Vajtswv txoj kev rau txim rau cov neeg Mau-am?
Nyob rau ntawm tshooj 48 no, yog cov lus hais ua ntej txog Vajtswv yuav rau txim rau cov neeg Mau-am, vim lawv tau ua ntau yam kev txhaum loj heev. Cov neeg Mau-am yog Lauj thiab nws tus ntxhais hlob cov xeeb ntxwv, lawv yog cajceg ntawm kev txhaum xeeb los (Chivkeeb 19:37). Vim yug los li ntawd, Mau-am tsis muaj feem tau txais tej koob hmoov uas cov Yixalayees tau txais, lawv tsuas yog ib nyuag lub tebchaws me nyob npuab hiav txwv tuag sab hnub tuaj xwb.
Lo lus pib thawj uas Vajtswv hais rau cov neeg Mau-am, pom hais tias tau ntev los Vajtswv tsis nplawm cov neeg Mau-am no lawm (nqe 11), tiamsis lawv tsis pom Vajtswv kev ua siab ntev, lawv txeev mus ua kev txhaum heev zuj zus ntxiv xwb. Lawv mus pe tus mlom Khemaus thiab cia siab rau tus mlom ntawd tiv thaiv lawv txoj sia, thiab muab lawv tej menyuam ua khoom fij rau tus mlom ntawd (II Vajntxwv 3:26-27), qhov ntawd yog yam uas Vajtswv ntxub ntxaug tshaj plaws. Vajtswv tau txwv tsis pub Nws haivneeg xyaum lwm haivneeg tej kevcai pehawm uas zoo li ntawd (2 Kevcai 12:31). Vim li ntawd Vajtswv thiaj tau siv tus cev lus Yelemis tshaj tawm tus Tswv tej lus hais tias, twb txog lub sijhawm uas Nws yuav tso tub rog tuaj muab Mau-am hliv povtseg ib yam li hliv hub cawv txiv hmab pov tseg. Lawv yuav muab cov cawv txiv hmab hliv povtseg kom tej hub khoob lug cia thiab yuav muab tej hub tsoo kom tawg tas (nqe 12). Qhov ntawd qhia hais tias cov neeg Mau-am yuav raug rhuav kom puastsuaj mus, txog hnub ntawd lawv yuav txaj muag rau lawv tus mlom Khemaus uas tiv thaiv lawv txoj sia, ib yam li cov Yixalayees txaj muag rau lawv tus mlom nyuj kub hauv Npethes (nqe 13).
Lub vimchiv uas tus Tswv tshaj tawm Nws tej lus rau cov Mau-am paub txog qhov lawv yuav raug Vajtswv rau txim hnyav heev, twb yog vim lawv tawm tsam Vajtswv los ntawm tes haujlwm ua tsis ncaj ncees, tsis ua raws li Vajtswv txoj kevcai. Lawv cia siab rau lawv tej mlom uas Vajtswv ntxub ntxaug thiab cia siab rau tes haujlwm lawv ua nrog rau qhov txhia chaw uas lawv muaj, lawv thiaj yuav raug Vajtswv txiav txim (nqe 7). Txawm li ntawd los Vajtswv yeej tseem cia ib feem twg muaj sia nyob “Cia li khiav tiag kom nej dim! Khiav ib yam li tus neesluav qus uas nyob tom tiaj suabpuam!” (nqe 6).
Niaj hnub nimno, peb nyob rau tiam uas muaj kev npluanuj muaj kev vammeej thiab muaj nyiaj txiag ntau, peb lub siab ntshaw tej ntawd, ua rau peb tibneeg txhua tus, niaj hnub raws qab tsis muaj hnub paub xaus li. Zaj kawm hnub no ntuas peb yog, txhob cia siab rau tej khoom qhov txhia chaw uas peb muaj. Yog peb cia siab rau peb tes haujlwm, rau tej qhov txhia chaw peb muaj, peb yuav txaj muag ib yam li “ Mau-am txaj muag rau lawv tus mlom Khemaus, thiab ib yam li Yixalayees txaj muag rau lawv tus mlom nyuj kub hauv Npethes”. Tiamsis Vajtswv coglus rau tus uas “Cia siab rau tus TSWV nws yuav ua phab pobzeb tiv thaiv peb mus ibtxhis” (Yaxayas 26:4).
Thov Vajtswv
Thov fwm Vajtswv Tus ua ncaj ncees thiab dawbhuv! Thov pab kom nyuam yaus muaj lub siab npuab Koj, tso siab rau Koj, cia siab thiab tsuas pehawm Vajtswv Tus uas yog qhov tseeb ib leeg xwb, kom tsis txhob mus cia siab rau txhua yam uas tsis muaj qab hau, thiaj yuav tsis txaj muag thiab tsis raug txim. Amees.
Peb tabtom cia siab rau yam dabtsi?
Nyeem Vajluskub hauv peb lub xyoos: Tes Haujlwm 14:8-28
Kênh Youtube BHKTHN:
