Tơdrong Pơđơ̆k 23:26-28
“Ơ dăm, pơjao bĕ jơhngơ̆m ih kơ inh; Măt ih kơchăm rok kiơ̆ trong inh.” (Tơdrong Pơđơ̆k 23:26)
Nơ̆r jet tơchĕng pơwao:
– Pơtao Sôlômôn bơtho kơ kon hơ’lơ̆p sư thoi yơ?
– Sơng iŏk păng pơm kiơ̆ tơdrong gơh hơgei ba ăn đei yua kiơ?
– Lu bơ̆n kăl kơ arih thoi yơ wă pơm kơ mĕ ‘bă hiôk păng pơm hơdah Anăn Kră Yang?
Pơtao Sôlômôn bơtho kơ kon hơ’lơ̆p sư athei đĭ jơhngơ̆m mơ̆ng nơ̆r sư bơtho yua kơ sư bơtho nơ̆r Kră Yang kơ kon hơ’lơ̆p sư thoi noh trong sư bơtho noh bơih trong ‘lơ̆ng rơgoh Kră Yang. Pơtrơp dơ̆ng, pơtao Sôlômôn yua iŏk tơdrong pơtih gia wă tơ’bôh tơdrong hli krê đơ̆ng lu bơngai drŏkăn đi dah mă drŏkăn luĕl ‘blal noh bơih lu anih tơdrong yoch kơnhăm wă tơgŭm kơ kon hơ’lơ̆p sư weh đơ̆ng hơđong lu sư. ‘Nĕ kơ ăn “măt ih” lăng yua kơ drŏkăn đi ‘lơ̆ng hơiă na jơhngơ̆m ih huŏng kơ lu sư pơhlŭ, chô̆ pơkơ̆ng.
“Drŏkăn luĕl ‘blal thoi sơlŭng hrăt” (trong 27 BTTHĐ). Đak sơlŭng ‘lơ̆ng lei na đak sư nhă ‘lơ̆ng, nhă hrăp kơ hơlŏng maih wă. Đak sơlŭng kư̆m tơdrong pơtih gia lơ dêh lăm tơdrong chơt hiôk đơ̆ng bơngai akăn ih (Tơdrong Pơđơ̆k 5:15). Mălei lu drŏkăn đi đei pơtih thoi sơlŭng jrŭ păng sơlŭng hrăt, ưh kơ gơh wă pơm kơ đak rơngơp ‘lơ̆ng nhă hrăp. Hloh kơ noh dơ̆ng, minh ‘nu bơngai huŏng tơ lăm sơlŭng jrŭ dah sơlŭng hrăt lei na anat dêh wă klaih đơ̆ng tơdrong pơmat, hrĕng kro. Rup pơtih gia sơlŭng pơma kơ drŏkăn đi noh bơih tơdrong hli krê pơlôch bơngai, păng sơlŭng hrăt tơ’bôh drŏkăn đi noh thoi đak ro ưh kơ đei hơmĕng, bơngai mă huŏng lăm sơlŭng hrăt anat dêh wă lĕch đơ̆ng noh. Drŏkăn đi ngăl yua tơdrong ‘lơ̆ng hơiă sư wă pơhlŭ ih, mălei yua kơ ih hưch ham kơ tơdrong ‘lơ̆ng hơiă sư na puh kơ sư lei ih jing bơngai ưh kơ tơpăt hăm kon akăn ih hăm ih kơdih, na pơm yoch hăm Kră Yang, đơ̆ng noh tơdrong arih kiơ̆ trong măng mu, ưh pă đei pŭn hiôk.
Dang ei, đei lơ bơngai hơmuh hơmŏng huŏng lăm tơdrong pơhlŭ pơm pơyô kư̆ kă, minh pah sư yua kơ đei lơ bơngai lăng tơdrong ŭnh om ưh kơ gĭt, minh pah dơ̆ng kư̆m yua kơ đơ̆ng tơdrong pơhlŭ đơ̆ng drŏkăn đi gơh dêh păng tơdrong lăng tơdrong ŭnh om ưh kơ gĭt truh tơ jơ̆p jang anih. Nơ̆r Kră Yang bơtho: “Bơ̆n athei pơyom kơ tơdrong ŭnh om, ‘nĕ kơ pơ’brơh pơm kư̆ kă, yua kơ ‘Bok Kei-Dei wă phak tơpă dôm lu bơngai mă pơm kư̆ kă thoi noh. Mă bơngai oei adruh tơdăm kư̆m lei-lăi.” (Hêbrơ 13:4). Kơplah ŭnh om klo kăn pơyơ̆r jơhngơ̆m kơ Kră Yang, hơdai năm kiơ̆ trong Kră Yang lei na gô đei tơdrong chơt hiôk, pŭn hiôk lăm ŭnh om. Tơplơ̆ dơ̆ng, dah pơm yoch pơm pơyô kư̆ kă, tơdrong gĭt kăl đơ̆ng lăm bơngai lui gô hiong, jing đei tơdrong pơmat, gô pơchah păng lăm hnam dơnŏ kư̆m lei lăi. Apinh Yang Bơhngol ‘Lơ̆ng bơtho, tơ’blŏk kơ rim ‘nu kon Kră Yang weh đơ̆ng tơdrong yoch, mă loi lăm tơdrong yoch pơm pơyô kư̆ kă. Adrin krao khan, pơyơ̆r jơhngơ̆m kơ Kră Yang. Apinh Kră Yang tơgŭm kơ lu bơngai hơ’lơ̆p chu yom mơ̆ng nơ̆r mĕ ‘bă, năm kiơ̆ trong Kră Yang, wă kơ đei tơdrong hơđơ̆ng, chơt hiôk lăm tơdrong arih păng ŭnh om.
Kơkuh kơ Ih Kră Yang, inh bơnê kơ Ih ăn kơ inh mĕ ‘bă bơtho nơ̆r Kră Yang kơ inh. Apinh Yang Bơhngol ‘Lơ̆ng bơtho tơ’blŏk kơ inh đĭ jơhngơ̆m chă Kră Yang, weh ataih đơ̆ng tơdrong pơhlŭ pơm pơyô kư̆ kă lăm tơdrong arih, krao khan yua anăn Kră Yang Yêsu Krist, Amen!
Bơ̆n tam pơyơ̆r jơhngơ̆m bơ̆n kơ Kră Yang păng weh ataih đơ̆ng tơdrong pơhlŭ ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 6
Kênh Youtube BHKTHN:
