II Kauleethaus 11:1-6
Nqe cim:
“Kuv khib nej ib yam li Vajtswv khib, rau qhov nej zoo ib yam li tus hluas nkauj uas tsis tau tham dua hluas raug. Kuv twb qhaib nej cia rau ib tug txivneej lawm, tus ntawd yog Yexus Khetos” (II Kauleethaus 11:2).
Lus nug rau sawvdaws xav:
– Timthawj Paulus siv dab tsi los qhia txog cov ntseeg hauv Kauleethaus kev hlub uas yuav tsum muaj pub rau Yexus Khetos?
– Yam dab tsi yuav ua rau cov ntseeg ceev tsis tau“lub siab dawb huv pub rau tus Tswv?
– Zaj kawm hnub no ntuas peb txog yam dab tsi?
Timthawj Paulus qhib siab rau cov ntseeg hauv nroog Kauleethaus ntawm qhov nws hais li“tus ruam” vim nws tsis khav txiv li cov neeg qhia cuav. Paulus hais tias: “Kuv twb qhaib nej cia rau ib tug txivneej lawm, tus ntawd yog Yexus Khetos” (nqe 2). Tiam Vajluskub tshiab piv Yexus Khetos zoo li tus nraugvauv thiab pawg ntseeg yog Yexus tus nkauj nyab (Mathais 9:15; Tshwmsim 19:7-9; 21:2). Hauv kev sib khib zoo li nkauj nyab nraug vauv, Timthawj Paulus ntuas cov ntseeg hauv Kauleethaus yuav tsum “zoo ib yam li tus hluas nkauj uas tsis tau tham dua hluas nraug”, ncaj ncees ceev lub siab dawb huv pub rau Yexus Khetos, li thaum chiv thawj uas Paulus nyuam qhuav coj lawv los ntseeg.
Timthawj Paulus ntshai tsam cov ntseeg zoo li Evas raug dab Ntxwjnyoog dag ntxias, mus mloog tej lus qab zib uas cov neeg qhia cuav hais, ua rau lawv fab siab rau Yexus Khetos. Cov Xibfwb cuav qhia tej zaj cuav hais txog Yexus, txog Vaj Ntsujplig tsis thooj zaj uas Paulus coj tuaj qhia cov ntseeg lawd. Txawm li ntawd los, cov ntseeg hauv Kauleethaus tseem txaus siab mus mloog thiaj ua rau lawv ntseeg yuam kev.
Timthawj Paulus hais tias nws hais lus zoo li “tus ruam”, yog nws txhob txwm hais lus twm cov Xibfwb qhia cuav, nws hais tias:“Kuv yeej tsis tau xav hais tias kuv muaj fwjchim yau dua nej cov thwjtim uas nej hais tias muaj fwjchim” (nqe 5). Qhov ntawd qhia paub hais tias, cov Xibfwb cuav yeej tsis muaj fwjchim loj dua Paulus. Yog muaj kev sib cav los piv ces cuag li cov qhia cuav cav muaj zog dua, tiamsis Paulus tsis siv kev sib cav los qhia txoj Moo zoo, tiamsis nws siv Vajtswv lub fwjchim (I Kauleethaus 2:4). Yog yuav hais txog kev kawm txawj ntse ces Timthawj Paulus tsis swb leejtwg, tiamsis vim nws qhia txog Vajtswv kev txawj ntse (I Kauleethaus 2:6-10).
Tus Tswv cov lus hais rau pawg ntseeg hauv Efexus hais tias: “Tiamsis tshuav ib qho uas kuv tsis qhuas nej: yav tas los nej yeej hlub kuv, tiamsis nimno nej tsis hlub kuv lawm. Nej yuav tsum nco ntsoov hais tias nej twb yuam kev mus ua txhaum ntau kawg li lawm! Yog li ntawd, nej yuav tsum tso nej tej kev txhaum tseg thiab rov los mloog kuv lus li qub” (Tshwmsim 2:4-5a). Peb tau tig saib peb lub neej ntseeg tus Tswv dhau tas los, peb puas ceev peb lub siab kom dawb huv li thaum chiv thawj nyuam qhuav los ntseeg Yexus Khetos? Lossis cia kev ntseeg cuav, kev lomzem hauv ntiajteb ua rau peb tsis hlub tus Tswv li thaum chiv thawj lawm! Cia li tig rov los lees txim thiab tso kev txhaum tseg, rov pib li thaum chiv thawj, rov ceev lub siab kom dawb huv mus txog thaum tau koom tus me nyuam yaj rooj tshoob.
Thov Vajtswv,
Tus Tswv uas yog kev hlub! Thov pab kom nyuam yaus yeej kev dag ntxias ntawm ntshaw nyiaj txiag, tau koob npe thiab tau meejmom… kom nyuam yaus ncaj ncees ceev lub siab kom zoo hlub tus Tswv koj tib leeg mus txog hnub tau ntsib koj. Amees.
Yam dab tsi ua rau koj kev hlub tus Tswv tsuag zuj zus lawm?
Nyeem Vajluskub hauv peb lub xyoo: Mathais 27:27-56
Kênh Youtube BHKTHN:
