Klei Aê Diê Blŭ: II Kôrantô 11:1-6
Êlan kliăng: “Kâo mâo klei trih kơ diih msĕ si klei Aê Diê trih. Kyuadah kâo bi čuôp leh diih hŏng Krist msĕ si sa čô mniê êra hrông doh kơ knŏng sa čô sa čô ung” (II Kôrantô 11:2)
Klei êmuh ksiêm mĭn: Ya rup Khua ƀĭng kna Y-Pôl yua čiăng bi mdih kơ klei khăp phung đăo Kôrantô brei kơ Krist? Ya klei hmăi “klei kpă leh anăn klei doh” mơ̆ng diñu hŏng Khua Yang? Ya klei mñă kơ drei mơ̆ng klei hriăm hruê anei?
Khua ƀĭng kna Y-Pôl dôk pŏk ai tiê hŏng Sang Aê Diê Kôrantô hŏng klei čŏng lač kơ pô “mluk” kyua ñu amâo hưn ktưn kơ pô msĕ si phung khua pô mtô soh. Leh anăn ñu lač “Kyuadah kâo bi čuôp leh diih hŏng Krist msĕ si sa čô mniê êra hrông doh kơ knŏng sa čô sa čô ung” (êlan 2). Klei Bi Mguôp Mrâo bi hmô Krist jing ung, bi Sang Aê Diê jing mô̆ Ñu (Y-Mathiơ 9:15, Klei Bi Êdah 19:7-9; 21:2). Hlăm klei bi mguôp yuôm bhăn anăn, Khua ƀĭng kna Y-Pôl mñă kơ phung đăo Kôrantô brei jing “sa čô mniê êra hrông”, sĭt suôr hlăm klei khăp, răng kriê ai tiê kpă ênô, doh jăk hŏng Krist msĕ si ênuk tal êlâo mrâo tŭ mă klei khăp Khua Yang mơ̆ng Khua ƀĭng kna Y-Pôl.
Khua ƀĭng kna Y-Pôl huĭ, msĕ si H’Êwơ ala mplư hlăk đưm dih snăn mơh phung đăo Kôrantô ăt srăng luč hĕ ai tiê kpă ênô doh hŏng Khua Yang tơdah phung ksiêm hriăm mgưt mplư ngă kơ diñu luč hĕ klei kpă ênô leh anăn doh hŏng Krist. Phung ksiêm hriăm mgưt hiu hưn klei soh kơ sa Yêsu, Yang Mngăt Jăk leh anăn Klei Mrâo Mrang Jăk mkăn mdê hŏng ya klei Khua ƀĭng kna Y-Pôl ba leh kơ phung đăo tinei. Khădah snăn, diñu lŏ tŭ ư ênưih pưih snăn ngă soh kjham hlăm klei đăo.
Khua ƀĭng kna Y-Pôl čŏng lač kơ pô “mluk”, ară anei ñu lŏ dơ̆ng lač kơ phung ksiêm hriăm mgưt, “Kâo mĭn kâo amâo jing điêt hĭn kơ phung khua ƀĭng kna prŏng hĭn anăn ôh” (êlan 5). Boh sĭt, ñu brei thâo phung khua pô mtô soh amâo mâo ya klei êdah êdi ôh. Kyua tơdah mkă kơ klei thâo blŭ snăn năng ai diñu êdah hĭn, ƀiădah Khua ƀĭng kna Y-Pôl amâo yua ôh klei thâo blŭ čiăng mplư ƀiădah hưn Klei Mrâo Mrang Jăk kơ diñu mơ̆ng klei myang Aê Diê (I Kôrantô 2:4). Hjăn kơ klei thâo săng snăn ñu amâo ti gŭ ôh, kyua ñu hiu hưn klei thâo mĭn Aê Diê (I Kôrantô 2:6-10).
Klei Aê Diê Blŭ lač hŏng Sang Aê Diê Êphêsô: “Ƀiădah anei klei kâo mâo hŏng ih, ih lui leh klei khăp ih mâo tal êlâo. Snăn hdơr bĕ mơ̆ng anôk ih lĕ buh leh, kmhal bĕ, leh anăn lŏ ngă bruă ih ngă tal êlâo” (Klei Bi Êdah 2:4-5a). Brei drei lŏ ksiêm dlăng leh dŭm hruê mlan tui hlue Khua Yang, drei răng kriê ai tiê doh hŏng Krist msĕ si ênuk êlâo mơ̆? Amâodah klei đăo soh, amâodah klei mơak hlăm lăn ala anei ngă kơ ai tiê khăp kơ Khua Yang êdu hĕ! Brei drei lŏ hdơr, kmhal leh anăn lŏ bi mrâo, lŏ dơ̆ng răng kriê ai tiê doh hŏng Khua Yang truh hruê bi tuôm hŏng Ñu hlăm Hruê bi kuôl êđai biăp.
Ya klei dôk ngă kơ klei drei khăp kơ Aê Diê êdu hĕ?
Wah lač: Ơ Khua Yang! Akâo kơ Ih đru kâo dưi hŏng djăp klei mplư kơ ngăn prăk, klei hing ang, bruă knuă… čiăng kâo djă pioh nanao ai tiê doh, khăp kơ Khua Yang ƀrư̆ hruê ƀrư̆ lu hĭn truh hruê bi tuôm hŏng Ih.
Dlăng Klei Aê Diê Blŭ hlăm tlâo thŭn: Y- Mathiơ 27:27-56
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
