Čang Hmăng Hlăm Klei Aê Diê Blŭ – 6/1/2023

862

 

Klei Aê Diê Blŭ: Klei Mmuñ Hđăp 119:81-88

Êlan kliăng: “Mngăt kâo êmăn dôk guôn klei Ih bi mtlaih; kâo čang hmăng hlăm klei Ih blŭ.” (Klei Mmuñ Hđăp 119:81)

Klei êmuh ksiêm mĭn: Trăn Klei Mmuñ Hđăp anei bi êdah si ai tiê pô čih jing? Ti anôk ñu dưm klei čang hmăng? Ti anôk drei khăng dưm klei čang hmăng hlăk tuôm hŏng klei truh luč klei čang hmăng?

Sapăn êlan Klei Mmuñ Hđăp anei kčưm dơ̆ng hŏng boh hră tal pluh sa hlăm klei Hêbrơ jing boh hră Caph. Boh hră anei mblang jing “kngan mang”. Tui si đa đa pô mblang Klei Aê Diê Blŭ, trăn anei čiăng lač pô čih dôk yơr kngan mang kwưh akâo klei pap mơ̆ng Khua Yang. Klă sĭt, Klei Mmuñ Hđăp anei hưn mdah ai tiê mčah leh anăn luč klei čang hmăng mơ̆ng pô čih. Ñu bi hmô kơ ñu msĕ si “kdô klĭt ti săp pui” (êlan 83). Ñu bi ƀuh msĕ si phung roh dôk wang jŭm dar ñu leh anăn dôk klei ƀăng čiăng bi lĕ ñu (êlan 85). Ñu čang guôn klei bi mtlaih mơ̆ng Khua Yang, amâo mâo čang guôn pô mkăn ôh êngao kơ Khua Yang leh anăn dưm klei čang hmăng kluôm dhuôm hlăm Klei Aê Diê Blŭ.

Păt čiăng jih hlăm grăp êlan, pô čih lač klă sơăi: ñu “čang hmăng hlăm klei Ih Blŭ” (êlan 81), “dôk guôn klei Ih ƀuăn” (êlan 82), “amâo wơr bĭt ôh klei bhiăn Ih” (êlan 83), “klei Ih mtă jing năng knang” (êlan 86), “kâo amâo lui ôh klei Ih čih” (êlan 87), “djă pioh klei ƀăng êgei Ih hưn” (êlan 88). Klă nik pô čih đăo knang kluôm dhuôm kơ Klei Aê Diê Blŭ leh anăn Klei Aê Diê Blŭ yơh jing phŭn akŏ klei ktang, klei bi juh leh anăn klei čang guôn kơ ñu hlăk êjai ñu luč jih klei čang hmăng.

Klei Mmuñ Hđăp 119 amâo čih ôh anăn hlei pô čih ƀiădah lu hlăm phung mblang Klei Aê Diê Blŭ mĭn mtao Y‑Đawit yơh jing pô čih. Klei hdĭp ñu găn lu đei klei truh dleh knap, tlă anăp hŏng lu lĭn phung roh jhŏng ktang jhat ƀai leh anăn huĭ hyưt. Kyuanăn, ñu bi knal “klei bi mtlaih” kơ mngăt ñu knŏng hriê mơ̆ng Aê Diê Pô Myang. Leh anăn knŏng hjăn Klei Blŭ sĭt suôr Ñu yơh dưi ba klei čang hmăng kơ ñu. Hlăm êlan tuč ruê̆ kdrêč klei duê anei ñu kwưh akâo kơ Aê Diê “mgang klei hdĭp kâo tui si klei khăp Ih” (êlan 88). Pô čih bi knal leh klei lŏ bi hdĭp sĭt tơdah djă pioh klei Aê Diê mtă. Kyuanăn, ñu čuăn amâo dưi wơr bĭt ôh klei Aê Diê mtă, amâo phưi lui ôh klei bhiăn Aê Diê leh anăn gưt ngă hlue Klei Aê Diê Blŭ.

Hmăng hmưi anei ăt jing klei bi knal kơ jih jang phung anak Aê Diê mơh tơdah čang hmăng hlăm Klei Aê Diê Blŭ. Sĭt nik drei amâo tlaih ôh đa klei truh dleh dlan, luč klei čang hmăng êjai dôk hdĭp ti lăn ala anei. Akâo kơ Klei Blŭ mơ̆ng Aê Diê jing klei bi juh leh anăn klei čang hmăng prŏng kơ grăp čô drei. Thâo kral Klei Aê Diê Blŭ jing yuôm bhăn êdimima kơ klei hdĭp, brei grăp čô drei pioh mmông, bi mjuăt mưng ksiêm hriăm Klei Aê Diê Blŭ leh anăn djă păn kjăp kơ Klei Aê Diê Blŭ hlăm djăp mta klei truh. Brei čuăn ai tiê msĕ si mtao Y‑Đawit, amâo srăng wơr bĭt ôh klei Aê Diê mtă wăt tơdah hlăm ya mta klei truh dưn. Sĭt nik tơdah mđing mĭn ksiêm hriăm Klei Aê Diê Blŭ, drei srăng duah ƀuh phŭn akŏ klei čang hmăng hlăm Klei Aê Diê Blŭ, kyuadah jih jang mnơ̆ng bi mlih nanao ƀiădah Klei Aê Diê Blŭ amâo tuôm bi mlih ôh (Y‑Mathiơ 24:35).

Si ngă drei dơ̆ng bi mjuăt ksiêm hriăm Klei Aê Diê Blŭ grăp hruê leh mơ̆? Mâo mơ̆ ya klei ngă bi kgăn drei ngă klei anei?

Wal lač: Ơ Khua Yang, akâo Ih đru kâo thâo duh kơ klei hdĭp kâo hŏng klei ksiêm hriăm Klei Aê Diê Blŭ čiăng kơ kâo djă pioh nanao Klei Ih Blŭ leh anăn dưm kluôm dhuôm klei čang hmăng hlăm Klei Ih Blŭ wăt hlăm ya mta klei truh dưn.

Dlăng Klei Aê Diê Blŭ hlăm tlâo thŭn: Klei Čŏk Hia 1:1-15

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcCia Siab Rau Vajtswv Txojlus – 6/1/2023  
Bài tiếp theoHy Vọng Nơi Lời Chúa – 6/1/2023