I Petus 2:13-17
Nqe cim:
“Nej yog cov uas ntseeg peb tus Tswv Yexus, yog li ntawd nej yuav tsum mloog nomtswv lus, thiab ua raws li tej kevcai uas nomtswv qhia. Nej yuav tsum mloog huabtais lus, rau qhov nws yog tus uas muaj hwjchim loj dua ntais tej nomtswv huv tibsi. Thiab nej yuav tsum mloog cov tswvxeev lus…” (I Petus 2:13-14a)
Lus nug rau sawvdaws xav:
– Cov ntseeg Yexus muaj feem xyuam li cas rau cov nomtswv? Vim li cas?
– Suav tias yus yog Vajtswv cov tubtxib ces yuav tsum ua neej zoo li cas?
– Yuav ua li cas kom peb ua tiav feem xyuam rau tej nomtswv, thiab kuj tsimnyog yog Vajtswv haivneeg?
Txawm yog cov nomtswv uas tau tibneeg tsa, los lawv yeej nyob qab tswj kav ntawm Vajtswv, “rau qhov tej nomtswv ntawd yog Vajtswv pom zoo thiaj muaj, thiab tej nomtswv ntawd puavleej yog Vajtswv tsa”(Loos 13:1). Yog li ntawd, Timthawj Petus ntuas cov ntseeg tias, “Nej yog cov uas ntseeg peb tus Tswv Yexus, yog li ntawd nej yuav tsum mloog nomtswv lus, thiab ua raws li tej kevcai uas nomtswv qhia. Nej yuav tsum mloog huabtais lus, rau qhov nws yog tus uas muaj hwjchim loj dua ntais tej nomtswv huv tibsi. Thiab nej yuav tsum mloog cov tswvxeev lus” (nqe 13-14). Nyob rau lub meejmom ua ib tug pejxeem rau lub tebchaws, txhua tus pejxeem yuav tsum ua neej thiab ua haujlwm kom raws nraim li txoj cai, vim lub homphiaj ntawm cov nomtswv yog “rau txim rau cov neeg uas ua txhaum, thiab qhuas cov neeg uas ua zoo” (nqe 14). Tiamsis muaj qee qhov, thaum muaj tej txoj cai samhwm tsis raws kev ntseeg thiab cov ntseeg txojkev ua neej, ces peb yuav tsum ua tib zoo saib, tabmeeg Vajtswv peb yuav mloog neeg lus lossis mloog Vajtswv lus (Tes Haujlwm 4:19). Thaum ua cov pejxeem zoo, peb yuav tiv thaiv tau tej lus uas tawmtsam cov ntseeg, ua li no yuav ua rau cov neeg tsis ntseeg paub Txojmoo Zoo (nqe 15).
Cov ntseeg Yexus yuav tsum nco tias yus yog “Vajtswv cov tubtxib”, vim peb tau Vajtswv cawm thiab pub txojkev ywjpheej, tiamsis “muaj kev ywjpheej los Vajtswv yeej txwv tsis pub nej mus ua txhaum” uas yog tswj yus tsis ua txhaum, tsis ua raws lub siab qub ua (nqe 16). Yog li, cia kom ua tiav feem xyuam rau cov nomtswv, thiab ua tau neej tsimnyog yog Vajtswv haivneeg, cov ntseeg yuav tsum nco tias “yuav tsum saib taus sawvdaws thiab hlub cov ntseeg, nej yuav tsum paub ntshai Vajtswv thiab hwm huabtais” (nqe 17). Tim ib, yuav tsum saib taus thiab hlub txhua tus, txawm yog hlob thiab yau, nyob rau lub meejmom twg, rau qhov tibneeg yog tau tsim muaj tus yamntxwv zoo li Vajtswv. Tim ob, nyob hauv cov ntseeg, sawvdaws koom kev ntseeg, yuav tsum sib hlub, vim peb “puavleej yog tib leeg txiv yug xwb” (Henplais 2:11). Tim peb, cov ntseeg yuav tsum hwm tus Tswv, tus uas muaj hwjchim loj kawg nkaus, rau qhov “Tus uas muaj tswvyim yog tus uas paub hwm tus Tswv. Yog koj paub Vajtswv tus uas Dawbhuv, koj thiaj yog tus totaub tiag” (Pajlug 9:10). Tim plaub, hais txog cov nomtswv, peb yuav tau ua los ntawm qhov kev saib taus, peb ua li “yog ua rau tus Tswv”, thiab haum Nws siab.
Thov Vajtswv pub Nws lub tswvyim rau peb ua tiav feem xyuam pejxeem tiamsis tsis txhaum cov ntseeg qhov kev ua neej rau Vajtswv tau ntsejmuag.
Thov Vajtswv,
Tus Tswv, Koj yog tus muaj hwjchim loj kawg nkaus. Nyuam yaus ua tsaug vim muaj Koj cawm thiab pub kev ywjpheej. Thov Koj pab kom nyuam yaus paub ua neej tsimnyog txojkev ywjpheej kom haum Koj thiab neeg siab, qhia tawm kev hwm Koj, thiab vim Koj es hwm tej nomtswv. Nyuam yaus tuav Tswv Yexus lub npe thov, Amees.
Yam dabtsi qhia paub peb nco ntsoov tias yus yog Vajtswv cov tubtxib?
Nyeem Vajluskub hauv peb lub xyoo: Tes Haujlwm 6
Kênh Youtube BHKTHN:
