Klei Aê Diê Blŭ: Klei Mmuñ Hđăp 100:2
Êlan kliăng: “Mă bruă bĕ kơ Yêhôwa hŏng klei mơak; nao ti anăp ñu hŏng klei mmuñ” (Klei Mmuñ Hđăp 100:2)
Klei êmuh ksiêm mĭn: Si ênhă êlan pô čih iêô mthưr jih jang mnuih kkuh mpŭ kơ Aê Diê? Si klei bi mguôp mbĭt suôr tliêr jih jang klei anei? Si drei mă yua mta klei anei hlăm klei hdĭp mă bruă?
Dua klei mtă mtrŭn “Mă bruă bĕ” leh anăn “hŏng klei mmuñ” nao mđrĭng mbĭt, brei ƀuh klei bi mguôp mbĭt suôr tliêr ti krah klei mmuñ bi mni leh anăn knhuah hdĭp. Amâo dưi bi ktlah ôh klei kkuh mpŭ hŏng knhuah dôk hdĭp grăp hruê. Dưi lač jih jang mta bruă ngă kkuh mpŭ kơ Aê Diê jing klei mă bruă, leh anăn jih jang mta bruă mă kơ Aê Diê jing klei kkuh mpŭ sơăi mơh. Klei mă bruă kơ Aê Diê yơh bi klă klei kkuh mpŭ kơ Ñu jing sĭt êdi leh anăn jing klei bi knăl jăk kơ sa ai tiê thâo hdơr knga.
Klei mă bruă kơ Aê Diê amâo djŏ ôh knŏng ngă đơ mta bruă ti Sang Aê Diê, ƀiădah ăt wăt bruă bi êdah klei khăp Ñu kơ phung dôk kƀah wư jŭm dar drei msĕ mơh. Khua Yang Yêsu mtô leh hlăk drei đru phung knap mñai mnơ̆ng digơ̆ kƀah jing drei dôk mă bruă kơ Ñu yơh (Y‑Mathiơ 25:34-40). Y‑Yakơ mtô msĕ mơh: “Snăn tơdah mâo knŏng klei đăo amâo mâo ôh bruă bi êdah, klei đăo anăn djiê leh.” (Y‑Yakơ 2:17).
Klei mă bruă kơ Yêhôwa brei ngă “hŏng klei mơak”. Mă bruă bĕ kơ Aê Diê leh anăn kơ arăng hŏng jih ai tiê thâo hdơr knga leh anăn hơ̆k mơak. Đăm mĭn ôh drei ngă klei pap kơ arăng êjai dôk đru digơ̆, amâodah ngă knuih bi ti dlông pô amâodah hmăng kơ digơ̆ lač jăk bi mni kơ drei, ƀiădah brei thâo săng bruă ngă anăn jing mmông găl Aê Diê brei kơ drei mă bruă kơ Ñu. Hlăm djăp mta bruă ngă, ngă bĕ hŏng ai tiê hơ̆k mơak msĕ si ngă kơ Khua Yang, amâo djŏ kơ mnuih ôh (Kôlôs 3:23). Sĭt yơh drei amâo dưi hơ̆k mơak nanao ôh hlăm jih bruă mă, ƀiădah hŏng klei đăo, brei gưt asăp Khua Yang nanao mă bruă kơ Ñu hŏng klei myơr leh anăn bi leh kluôm jih bruă klam hlăm Sang Aê Diê, hŏng jih ai tiê mă bruă kơ ayŏng adei drei, jum drông, đru rŭ leh anăn kah mbha ya mnơ̆ng drei mâo kơ phung dôk tuôm hŏng klei dleh dlan, sĭt nik klei hơ̆k mơak srăng tui tluôn.
Mâo dua mta klei bi mklăk khăng ƀuh hlăm bruă ngă kơ klei hdĭp mngăt myang hlăm lu phung đăo wăt hlăm lu Phung Sang Aê Diê. Anăn jing, lu Sang Aê Diê leh anăn phung đăo knŏng uêñ kơ dŭm mta bruă diñu mĭn jing bruă klei hdĭp mngăt myang, amâo lŏ mđing ôh kơ klei ayŏng amai adei drei dôk kƀah wư, ƀiădah ăt mâo lu mơh Sang Aê Diê leh anăn phung đăo uêñ đei kơ bruă đru klei hdĭp mda hlăm ƀuôn sang leh anăn phưi lui hĕ bruă rŭ mdơ̆ng klei hdĭp mngăt leh anăn klei kkuh mpŭ kơ Aê Diê. Pô čih Klei Mmuñ Hđăp 100 iêô mthưr kơ phung kkuh mpŭ brei “Mă bruă bĕ kơ Yêhôwa hŏng klei mơak”, ƀiădah amâo dưi wơr bĭt ôh mta bruă yuôm jing “nao ti anăp ñu hŏng klei mmuñ”. Jih jang bruă mă brei mâo phŭn leh anăn boh tŭ dưn mơ̆ng sa klei hdĭp dưm ñu pô “ti anăp Ñu” leh anăn kkuh mpŭ kơ Ñu.
Si ih bi êdah klei thâo hdơr knga kơ Khua Yang hŏng bruă mă leh anăn klei kkuh mpŭ?
Wah lač: Ơ Khua Yang, bi mni kơ Ih kyua djăp mta klei Ih brei leh kơ kâo, klei Ih kiă kriê răng mgang klei hdĭp kâo leh anăn gŏ sang kâo. Akâo kơ Ih brei kâo grăp hruê dưi jing msĕ si Ih hĭn êjai čiăng dưi bi êdah klei khăp, klei uêñ mĭn, leh anăn klei thâo đru phung dôk hdĭp jŭm dar kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 24
Kênh Youtube BHKTHN:
