Klei Aê Diê Blŭ: Klei Mmuñ Hđăp 100:3
Êlan kliăng: “Brei diih thâo kơ Yêhôwa jing Aê Diê. Ñu yơh mjing drei leh, drei jing dŏ Ñu; drei jing phung ƀuôn sang Ñu, phung biăp hlăm kdrăn rơ̆k Ñu.” (Klei Mmuñ Hđăp 100:3)
Klei êmuh ksiêm mĭn: Ya mta klei jing yuôm kơ phung kkuh mpŭ kơ Aê Diê brei thâo hĕ? Ya ngă? Si klei drei bi mlih hlăm klei kkuh mpŭ mă mơ̆ng klei thâo săng anei?
Tơdah blŭ kơ klei mprăp mkra klei kkuh mpŭ kơ Aê Diê, lu mnuih khăng mĭn kơ hdră kkuh mpŭ, pô atăt gai hdră, êpul mmuñ, kdrăp čŭt hơô… ƀiădah drei tuôm mơ̆ mjưh mdei bhiâo leh anăn êmuh drei pô, Aê Diê drei mmuñ bi mni leh anăn kkuh mpŭ, hlei Ñu jing? Pô čih Klei Mmuñ Hđăp 100:3 lač snei, mnuih kkuh mpŭ kơ Aê Diê brei thâo kơ Pô ñu kkuh mpŭ leh anăn klei anăn jing mta čuăn kơ klei kkuh mpŭ.
“Brei diih thâo…” – Klei kkuh mpŭ kơ Aê Diê amâo djŏ ôh jing ngă bruă klei đăo hŏng klei ngă tŭl ƀiădah brei ngă hŏng klei thâo săng. Boh blŭ “thâo” amâo djŏ ôh knŏng lač kơ klei thâo săng hlăm klei mĭn amâodah klei knhâo, ƀiădah wăt čiăng lač kơ klei bi mguôp sĭt suôr, boh nik nak pioh yua čiăng lač kơ klei jĕ giăm msĕ si ung mô̆ (Klei Mphŭn Dơ̆ng 4:1). Snăn, drei knŏng thâo Khua Yang hŏng klei bi mguôp djŏ hjăn pô hŏng Ñu.
“Yêhôwa jing Aê Diê” – Pô drei kkuh mpŭ jing Aê Diê, jing Khua Yang kơ jih jang yang, Mtao kơ jih jang mtao, jing Pô dôk kiă kriê jih jang mnơ̆ng. Drei amâo srăng kkuh mpŭ kơ Ñu sĭt ôh tơdah Ñu ka jing Khua Yang leh anăn jing Khua kơ klei hdĭp drei. Tơdah djŏ msĕ snăn, klei êmuh tui tluôn jing: Si ngă drei dôk đup gưt kơ Aê Diê hlăm djăp mta bruă hlăm klei hdĭp drei mơ̆?
“Ñu yơh mjing drei leh” – Pô drei kkuh mpŭ ăt jing Pô Hrih Mjing jih jang mnơ̆ng. Aê Diê hrih mjing leh drei leh anăn “drei jing dŏ ñu” snăn brei drei kkuh mpŭ leh anăn hdơr knga bi mni kơ Ñu. Hruê anei, lu mnuih hngah kkuh mpŭ leh anăn hdơr knga bi mni kơ Aê Diê kyuadah diñu lăm lui klei Aê Diê hrih mjing. Diñu lač kơ diñu jing mnơ̆ng dhơ̆ng kbiă mơ̆ng klei bi mlih nanao, amâodah čŏng mâo mă hjăn… Mtao Y‑Đawit lač leh: “Mnuih khŏ lač hlăm ai tiê diñu, ‘Amâo mâo Aê Diê ôh.’ ” (Klei Mmuñ Hđăp 14:1). Phung hngah kơ Aê Diê ăt kăn thâo mơh hlei ñu pô sĭt jing!
“Drei jing phung ƀuôn sang ñu, phung biăp hlăm kdrăn rơ̆k ñu” – Aê Diê amâo djŏ knŏng hrih mjing drei ôh ƀiădah wăt lŏ brei drei jing “phung ƀuôn sang ñu, phung biăp hlăm kdrăn rơ̆k ñu” kyuadah Ñu bi tui leh drei hŏng klei Khua Yang Yêsu djiê leh anăn lŏ hdĭp leh. Aê Diê drei kkuh mpŭ jing Mtao kơ kluôm jih lăn adiê, jing Pô Hrih Mjing prŏng prĭn, leh anăn wăt jing Pô Bi Mtlaih khăp čiăng kơ drei.
Dôk hdĭp bĕ tui si klei kñăm čiăng leh anăn klei guh kơang Pô Hrih Mjing. Hdơr knga bi mni bĕ kơ Khua Yang kyuadah dưi jing “phung ƀuôn sang ñu, phung biăp hlăm kdrăn rơ̆k ñu”. Anei yơh jing klei kñăm phŭn kơ klei drei kkuh mpŭ leh anăn hdơr knga bi mni.
Si ngă drei dôk đup gưt kơ Khua Yang jing Mtao kơ klei hdĭp drei mơ̆?
Wah lač: Ơ Khua Yang, mmông anei kâo luă gŭ čiăng mpŭ mni kơ Ih. Kâo myơr kluôm klei hdĭp kâo kơ Ih. Klei hdĭp kâo jing pioh kkuh mpŭ leh anăn mă bruă kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 1:1-31
Kênh Youtube BHKTHN:
