Klei Aê Diê Blŭ: Klei Mmuñ Hđăp 103:8-12
Êlan kliăng: “Ñu amâo ƀuah nanao ôh, kăn ñu djă pioh klei Ñu ăl hlŏng lar rei.” (Klei Mmuñ Hđăp 103:9).
Klei êmuh ksiêm mĭn: Mtao Y‑Đawit lač kơ ya knuih Aê Diê hlăm trăn Klei Aê Diê Blŭ anei? Si ñu bi mni kơ Aê Diê kơ klei Aê Diê amâo mâo ngă ôh? Tơdah thâo kơ mta klei Aê Diê amâo mâo ngă ôh jing prŏng prĭn leh anăn dlông hĭn, si ngă klei drei čuăn dôk hdĭp?
Klei Mmuñ Hđăp 103 jing klei mmuñ mpŭ mni, bi mni kơ klei pap, klei jăk leh anăn klei khăp Aê Diê pioh kơ phung huĭ mpŭ kơ Ñu. Pô čih bi êdah lu phŭn knhal čiăng mmuñ bi mni kơ Aê Diê, hlăm anăn mâo wăt mta klei Ñu AMÂO MÂO ngă ôh kơ drei mơh.
Êlâo hĭn, mtao Y‑Đawit lač klă Aê Diê jing Pô “jing jăk leh anăn thâo pap, amâo djăl ăl ôh, mdrŏng hŏng klei khăp” (êlan 8). Kna kơ jih knuih anăn ñu brei thâo, “Ñu amâo ƀuah nanao ôh, kăn Ñu djă pioh klei Ñu ăl hlŏng lar rei. Ñu amâo ngă kơ drei tui si klei soh drei ôh, kăn bi kmhal rei tui si klei wê drei” (êlan 9-10). Aê Diê jing Pô Doh Jăk leh anăn kpă ênô, hlei pô ngă soh srăng tŭ klei bi kmhal, ƀiădah kyua klei pap leh anăn klei khăp, Ñu pap brei kơ klei soh mnuih hŏng klei Khua Yang Yêsu tŭ klei djiê ti kyâo bi kal čiăng tla brei nư klei soh. Brei drei hdơr knga bi mni kơ Aê Diê kyuadah Ñu amâo ƀuah nanao ôh kơ klei soh drei, kăn ngă kơ drei tui si klei soh drei. Tơdah amâo djŏ snăn, si ngă drei dưi mơ̆ dôk hdĭp? Aê Diê ăt kăn djă pioh klei ñu ăl kơ drei hlŏng lar rei, leh anăn amâo “bi kmhal” tui si klei wê drei ôh. Tơdah Aê Diê ăt “bi kmhal” snăn si drei dưi dôk hlăm klei bi mguôp hŏng Ñu leh anăn si drei dưi dôk dơ̆ng ti anăp klei Ñu phat kđi? Aê Diê mdrŏng hŏng klei khăp, kăp pap brei kơ klei soh drei tơdah drei kmhal hưn klei soh drei (I Y‑Yôhan 1:9). Bi mni kơ Aê Diê kyua Ñu sĭt suôr nanao leh anăn “thâo pap”!
Êlan 11 brei thâo klei khăp ñu pioh kơ phung huĭ mpŭ kơ ñu jing prŏng hĭn kơ boh kbưi jih adiê hŏng lăn ala. Leh anăn Ñu mă mđuê̆ bi kbưi klei soh drei hŏng drei msĕ si ngŏ kbưi mơ̆ng yŭ (êlan 12). Tơdah Aê Diê pap brei leh klei soh drei, Ñu amâo lŏ hdơr wĭt ôh. Tơdah dôk ksiêm mĭn kơ klei anei, brei drei thâo hdơr knga bi mni kơ Aê Diê dôk hdĭp bi mơak kơ Ñu, amâo djŏ ôh hlŏng mjhua hĕ klei khăp Aê Diê leh anăn ăt ngă soh nanao.
Drei khăng bi mni kơ Aê Diê kơ klei Ñu ngă kơ drei, kơ klei Ñu wĭt lač klei drei kwưh akâo, kơ klei jăk jĭn Ñu hơêč hmưi kơ drei. Ƀiădah dŭm êlan hlăm Klei Mmuñ Hđăp anei mñă kơ drei brei hdơr thiăm kơ sa mta klei yuôm bhăn mơh, anăn jing kơ klei Aê Diê amâo mâo ngă ôh kơ drei jing prŏng hĭn, dlông hĭn êdimima. Brei hdơr nanao Aê Diê jing klei jăk, thâo pap, amâo djăl ăl ôh, leh anăn bŏ hŏng klei khăp. Khua Yang Yêsu Pô Bi Mtlaih yơh gui hrô brei kơ drei jih klei drei năng tŭ. Kyuanăn, grăp blư̆ tuôm hŏng klei mplư, brei hdơr mtam kơ ênoh Khua Yang Yêsu tla brei leh čiăng kơ drei đăm ngă soh ôh, čuăn dôk hdĭp năng hŏng klei Khua Yang ngă leh kơ drei, leh anăn wăt klei Ñu amâo mâo ngă ôh kơ drei mơh.
Si ngă drei thâo mơ̆ klei Khua Yang amâo mâo ngă ôh kơ drei jing tloh ênoh yuôm bhăn êdimi?
Wah lač: Ơ Khua Yang, bi mni kơ Ih kyuadah Ih amâo ƀuah nanao ôh klei soh kâo, amâo ăl leh anăn amâo bi kmhal tui si klei soh kâo ngă ôh. Akâo kơ Ih đru kâo thâo hdơr knga bi mni kơ Khua Yang čiăng dôk hdĭp grăp hruê bi mơak kơ Ih hĭn êjai.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 6
Kênh Youtube BHKTHN:
