Klei Aê Diê Blŭ: I Y‑Yôhan 1:1-7
Êlan kliăng: “Klei hmei ƀuh leh anăn hmư̆ leh, hmei hưn kơ diih msĕ mơh, čiăng kơ diih dưi mâo klei bi mguôp mbĭt hŏng hmei. Leh anăn drei mâo klei bi mguôp anăn hŏng Ama leh anăn hŏng Anak Ñu Yêsu Krist” (I Y‑Yôhan 1:3).
Klei êmuh ksiêm mĭn: Ya klei khua ƀĭng kna Y‑Yôhan lač kơ “klei hdĭp”? Hlăm klei hdĭp anăn, si hdơ̆ng phung anak ƀuôn sang Aê Diê bi mguôp mbĭt? Si drei ngă čiăng răng kriê klei bi mguôp hlăm Phung Sang Aê Diê?
Klei Blŭ Klei Hdĭp khua ƀĭng kna Y‑Yôhan hưn mdah tinei čiăng lač kơ Khua Yang Yêsu Pô Bi Mtlaih, Pô ñu hmư̆ leh, ƀuh leh, dlăng leh, leh anăn ruêh leh (êlan 1). Ñu jing sa čô hlăm phung khua ƀĭng kna Khua Yang Yêsu snăn sĭt nik mâo klei bi knal yuôm bhăn hjăn ñu pô hŏng Khua Yang. Ñu lŏ hưn klă klei sĭt nik kơ Khua Yang Yêsu jing “Klei Blŭ bliư̆ jing kđeh leh anăn dôk mbĭt hŏng drei” (Y‑Yôhan 1:14) leh anăn “Klei Blŭ dôk mbĭt hŏng Aê Diê” (Y‑Yôhan 1:1).
Khua ƀĭng kna Y‑Yôhan čih hră anei kơ phung đăo ti ƀuôn Êphêsô mphŭn dô leh anăn kơ jih jang phung anak ƀuôn sang Aê Diê găn jih jang ênuk, hlăm anăn mâo wăt drei hruê anei. Jing ƀĭng kna jĕ giăm hŏng Khua Yang Yêsu, ñu ƀuh ti anăp ală bruă Khua Yang ngă, kyuanăn jih jang klei ñu hưn kơ Khua Yang jing klă sĭt leh anăn yuôm bhăn. Ñu hưn klă: “Klei hmei ƀuh leh anăn hmư̆ leh, hmei hưn kơ diih msĕ mơh, čiăng kơ diih dưi mâo klei bi mguôp mbĭt hŏng hmei” (êlan 3a). Drei mâo klei bi mguôp mbĭt hŏng phung doh jăk mphŭn dô hŏng klei đăo kơ Khua Yang Yêsu Pô Bi Mtlaih, kyuadah diñu pô mâo leh klei bi mguôp hŏng Khua Yang. Anei jing klei bi mguôp mdê hĭn ti krah phung mâo mbĭt klei đăo kơ Anak Aê Diê. Wăt tơdah drei amâo hdĭp mbĭt ênuk hŏng khua ƀĭng kna Y‑Yôhan ôh, ƀiădah hŏng klei đăo kơ Khua Yang Yêsu, drei mâo klei bi mguôp mbĭt hŏng ñu leh anăn hŏng jih jang phung doh jăk mkăn. Anei jing klei bi mguôp mdơ̆ng ti dlông atur klei đăo, mkŏ mjing ti dlông Klei Blŭ Klei Hdĭp leh anăn bi đuôm mbĭt hlăm klei bi mguôp hŏng Yang Mngăt Jăk jing Pô dôk mă bruă hlăm klei hdĭp phung đăo. Klei bi mguôp anei jing mdê snăk kyua wăt tơdah phung anak Aê Diê dôk tar ƀar anôk, mdê djuê ana, mdê dhar kreh amâodah mdê thŭn yan, gưl tal jing… drei ăt thâo kral klei khăp hlăm Khua Yang ƀiădah mnuih êngao klei đăo amâo dưi thâo săng ôh.
Tui tluôn, khua ƀĭng kna Y‑Yôhan lač kơ “klei mngač” leh anăn hưn klă snei: “Aê Diê jing klei mngač leh anăn hlăm Ñu amâo mâo klei mmăt ôh hơăi” (êlan 5). Kyuanăn, tơdah drei lač drei bi mguôp hŏng Ñu snăn brei drei êbat hlăm klei mngač, leh anăn tơdah êbat mđrăm mbĭt hlăm klei mngač snăn drei mâo klei bi mguôp hdơ̆ng găp (êlan 6-7). Dơ̆ng mơ̆ng klei bi mguôp anăn, drei mâo klei pap brei klei soh kyua êrah Khua Yang Yêsu.
Bi mni lač jăk kơ Khua Yang, phung anak Aê Diê mâo klei bi mguôp sĭt suôr hdơ̆ng găp kyua klei đăo kơ Khua Yang Yêsu. Kyuanăn, grăp čô phung đăo hlăm Phung Sang Aê Diê brei jih ai tiê răng kriê klei bi mguôp jăk siam hdơ̆ng găp hlăm klei khăp leh anăn klei đăo kơ Khua Yang Pô Bi Mtlaih khăp hơiêng.
Si ngă drei jih ai tiê răng kriê klei bi mguôp jăk siam hŏng ayŏng amai adei drei mơ̆?
Wah lač: Ơ Khua Yang Yêsu, bi mni lač jăk kơ Khua Yang kyua hlăm Ih kâo mâo klei bi mguôp hŏng ayŏng amai adei hlăm Phung Sang Aê Diê, akâo Ih đru kâo djă pioh klei bi mguôp anei dưi jăk siam nanao.
Dlăng Klei Aê Diê Blŭ hlăm tlâo thŭn: Klei Mmuñ Hđăp 52:1-9; 53:1-6; 54:1-7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
