Klei Aê Diê Blŭ: II Y‑Pêtrôs 1:3‑11
Êlan kliăng: “Snăn Ơ phung ayŏng amai adei, brei diih hur har hĭn bi sĭt klei Aê Diê iêô leh anăn ruah diih, kyuadah tơdah diih ngă snăn, diih amâo srăng lĕ ôh. Snăn yơh Aê Diê srăng brei diih mŭt ênưih pưih hlăm ƀuôn ala mtao hlŏng lar Yêsu Krist, Khua Yang leh anăn Pô Bi Mtlaih drei” (II Y‑Pêtrôs 1:10‑11)
Klei êmuh ksiêm mĭn: Ya knuih brei mâo čiăng dưi bi mđĭ hĭn knhuah hdĭp phung đăo? Ya klei tŭ dưn mâo mơ̆ng klei bi mđĭ hĭn anăn? Si drei duh čiăng bi mđĭ hĭn klei hdĭp mngăt myang drei pô?
Knhuah hdĭp phung đăo čiăng dưi đĭ hriê kơ prŏng brei mâo mbĭt klei đăo kơ Aê Diê hŏng bruă ngă sĭt êmĭt hjăn pô (Y‑Yakơ 2:22‑24). Khua ƀĭng kna Y‑Pêtrôs kñăm klei đăo jing phŭn agha kơ jih jang knuih ênuah ênô. Grăp čô brei đăo kơ klei ktang myang, klei khăp Aê Diê brei kơ drei klei pap brei klei soh, klei hdĭp hlŏng lar leh anăn dưi jing phung mă tŭ knuih Aê Diê. Klei đăo atăt kơ klei đĭ hriê kơ prŏng klei hdĭp mngăt myang.
Mbĭt ti djiêô anăn, boh blŭ “hŏng jih ai tiê” kñăm kơ knuih bi mjuăt pô hlăm klei duh kơ knhuah hdĭp phung đăo. Boh blŭ “thiăm” hlăm êlan 5‑7 brei ƀuh tơdah drei hriăm mjuăt sa knuih jăk snăn srăng lŏ mđĭ thiăm sa knuih jăk mơh. Kčưm mơ̆ng klei đăo kơ Khua Yang, srăng bi êdah ai tiê jăk hŏng arăng. Dơ̆ng mơ̆ng klei jăk, srăng thiăm klei thâo săng, čiăng lač mâo djăp klei thâo săng srăng pŏk mblang hĭn tơdah ksiêm dlăng sa mta bruă mơ̆ng lu nah tĭng. Mơ̆ng klei thâo săng srăng thiăm klei djŏ hnơ̆ng, thâo kiă kriê pô, thâo kral si knuih pô jing čiăng đăm lĕ ôh hlăm klei soh. Mơ̆ng klei djŏ hnơ̆ng srăng thiăm klei dôk kjăp, đru drei amâo kdŭn tluôn ôh hlăk tuôm hŏng klei dleh dlan, hgao dưi hĭn kơ klei knap mñai, gĭr tơl knhal tuč. Klei dôk kjăp thiăm hĭn klei huĭ mpŭ, čiăng lač “klei kkuh mpŭ djŏ”. Dôk kjăp kyuadah thâo kral klei bi kčah kơ klei hdĭp mnuih amâo djŏ kbiă hriê mơ̆ng mnuih ôh ƀiădah mơ̆ng Khua Yang, čiăng kơ đăm phưi lui ôh kyua klei hdĭp mnuih mâo lu klei kpăk gun, ƀiădah knŏng dôk kjăp ngă hlue êlan kpă ênô Khua Yang. Klei huĭ mpŭ srăng thiăm klei khăp hdơ̆ng ayŏng adei leh anăn thiăm ai tiê khăp kơ klei khăp hdơ̆ng ayŏng adei. Ai tiê khăp hdơ̆ng ayŏng adei yơh jing klei hưn bi sĭt kơ drei mâo leh klei kkiêng mrâo mơ̆ng Aê Diê (I Y‑Yôhan 5:1‑2).
Klei bi mđĭ hĭn knhuah hdĭp phung đăo jing bi mđĭ mơ̆ng klei đăo kơ Khua Yang, bi mđĭ hlăm jih jang kdriêk, dơ̆ng mơ̆ng ai tiê khăp, klei mĭn, klei kpă ênuah leh anăn klei thâo săng. Klei bi mđĭ kčưm dơ̆ng hŏng klei mđĭ klei đăo kơ Khua Yang leh anăn tuč ruê̆ hŏng klei khăp mnuih. Boh klei bi mđĭ hlăm knhuah hdĭp phung đăo jing mâo boh Yang Mngăt Jăk (Galati 5:22), bi guh kơang Anăn Khua Yang. Akâo kơ Khua Yang brei grăp čô drei “hur har hĭn bi sĭt klei Aê Diê iêô leh anăn ruah drei” (êlan 10), bi mđĭ hĭn knhuah hdĭp phung đăo čiăng kơ grăp čô drei dưi mâo kdrêč hlăm Ƀuôn Ala Mtao hlŏng lar Yang Yêsu Krist.
Si ngă drei uêñ mĭn bi mđĭ hĭn knhuah hdĭp phung đăo grăp hruê mơ̆?
Wah lač: Ơ Khua Yang, bi mni kơ Khua Yang bi mtlaih leh kâo leh anăn brei kâo mâo kdrêč hlăm klei guh kơang ƀuôn ala mtao Ih. Akâo Ih brei kâo mâo klei đăo kjăp kơ Khua Yang leh anăn bi mjuăt pô, gĭr bi mđĭ hĭn klei hdĭp mngăt myang grăp hruê.
Dlăng Klei Aê Diê Blŭ hlăm tlâo thŭn: Y‑Đaniel 11:5‑35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
