Galati 5:1
“Kră Yang Yêsu Krist ăn kơ bơ̆n rơngei đơ̆ng dôm tơdrong juăt kon bơngai boih. Thoi noh bơ̆n gơh rơngei tơpă. Na iĕm ‘nĕ ăn kơ đe pơhlŭ pơlung iĕm gơnang kơ akâu iĕm kơdih wă kiơ̆ tôm tơdrong juăt Môis dơ̆ng. Dah iĕm pơm thoi noh iĕm wih jing đĭch dơ̆ng.” (Galati 5:1)
Nơ̆r jet tơchĕng pơwao:
– Đơ̆ng kiơ lu bơngai lui gơh rơngei đơ̆ng tơdrong kăt tơdra akar păng lu tơdrong jang đơ̆ng khôi juăt?
– Đơ̆ng tơdrong kiơ pơm bơ̆n ngăl wih hơlơ̆k pơm tơdrong ‘lơ̆ng?
– Pơm thoi yơ wă kơ bơ̆n dơ̆ng kơjăp lăm Kră Yang?
‘Bok Pôl jơ̆ng ‘bang Kră Yang sư pơtơm pơma đơ̆ng lăm chăl 5 hăm minh trong nơ̆r khan tơbăt, păng đei nơ̆r bơtho “athei” păng “’nĕ” kơ̆l tơm lăm tơdrong dơ̆ng “kơjăp” noh “Kră Yang Yêsu ăn kơ bơ̆n rơngei” lăm tơdrong Khul bơngai lui Galati rơngei đơ̆ng kăt tơdra akar păng khôi juăt. Tơdrong jang 16:1-15 chih roi kơdih ‘bok Pôl đei “kăt tơdra akar” kơ Timôthê kơplah sư wă chông ba jơ̆ng ‘bang kiơ̆ sư. Yua kơ đơ̆ng “đĭ đăng băt kơ ‘bă Timôthê noh bơngai Grĕk”. Thoi noh, dah Timôthê chu kăt tơdra akar lei na dôm tơdrong jang sư lăm lu bơngai Juđê gô ‘bônh hloh, ưh kơ sĭ kăt tơdra akar wă kơ gơh klaih ôh. Tuch luch, đơ̆ng tơdrong ‘noh “Khul bơngai lui kơjăp lăm đon lui, păng đei bơngai lui rai lơ”. Đơ̆ng noh, kăt tơdra akar păng pơm kiơ̆ khôi juăt, dah mă lăm chăl bơ̆n noh tơdrong bơ̆jang, chu kiơ̆ khôi juăt păng pơm tơdrong ‘lơ̆ng,… glăi tơpă dah bơ̆n lăng tơdrong noh thoi trong wă kơ gơh klaih. Kră Yang Yêsu ăn kơ bơ̆n rơngei wă kơ huay kơ pơm dôm tơdrong noh.
Mă khan thoi ei ră, bơngai mă đei tơdrong rơngei đơ̆ng Kră Yang Yêsu Krist oei đei ‘bar tơdrong rơih iŏk: Mă mônh, noh dơ̆ng “kơjăp”. Nơ̆r ‘Bok Kei-Dei ‘nâu tơbăt bơ̆n gơh “dơ̆ng kơjăp” lăm tơdrong rơngei mă bơ̆n đei. Phŏ bơ̆n đei tơchĕng, bu mă ưh kơ ‘maih rơngei, lei na tơdrong “dơ̆ng kơjăp” hăm đei kiơ anat ưh! Mălei lu bơngai tơdrong Galati dơ̆ng ưh kơ kơjăp. Đơ̆ng noh, dơ̆ng kơjăp lăm tơdrong rơngei wă kơ huay adrin pơm tơdrong ‘lơ̆ng, hăm tơdrong tơbăt păng pơm tơ’bôh. Kăl kơ đei pơ̆n nuih kơjăp wă kơ lui kơ tơdrong Kră Yang khan, păng hŭt lê̆ dôm nơ̆r bơtho ưh kơ ‘lơ̆ng khan nơ̆r pơlung, đơ̆ng lu bơngai bơtho hơlĕnh, jơ lu bơngai “Mă tơpă đei minh tơdrong ‘nao ‘lơ̆ng đĕch, ưh kơ đei tơdrong ‘nao ‘lơ̆ng nai dơ̆ng ôh. Inh khan kơ iĕm thoi noh yua kơ đei lu bơngai nai pơtuah iĕm, lu sư wă hơmet ming pơthim tơdrong ‘nao ‘lơ̆ng Yêsu Krist.” (Galatie 1:7 BTTHĐ).
Mă ‘bar, noh “Tôi ‘long ăt pơm đĭch” jing “tôi ‘long ăt” lei ưh kơ hiôk ôh, mălei lu bơngai lui tơ Galati, păng mă lu bơ̆n oei ‘bônh dêh puh kơ đe hơlĕnh na đơ̆ng noh khan pơrơ̆ng “tôi ‘long ăt” dơ̆ng. Kră Yang wă kơ bơ̆n tôi ‘long pơglang ưh kơ sĭ wă kơ bơ̆n tôi ‘long ăt pơm đĭch ôh.
Dang ei, đi lu bơ̆n lui khan bơ̆n gơh klaih yua kơ đơ̆ng tơdrong mơnat. Mălei, đang kơ sơng iŏk tơdrong dŏng pơklaih, lơ bơngai lăm lu bơ̆n ngăl wih dơ̆ng hăm lu nơ̆r “athei”, “’nĕ”, hăm lu tơdrong tơm kăl păng tơdrong juăt thoi kơ tơmam pơtrơp tơdrong dŏng pơklaih bơ̆n! Athei pơm thoi âu thoi noh na trŏ gơh mơ̆t tơ hnam akŭm! ‘nĕ kơ pơm tơdrong âu, tơdrong to hli kơ ‘Bok Kei-Dei phak lăm dơnâu ŭnh! v.v… ‘Bok Pôl bơtho: “Yang Bơhngol ‘Lơ̆ng ăn kơ bơ̆n jing kon ‘Bok Kei-Dei, na bơ̆n kư̆m athei ăn kơ Sư pơgơ̆r bơ̆n khŏm khŏm mơ̆n.” (Galati 5:25).
Kơkuh kơ Ih Kră Yang, dah layơ inh đei tơdrong pơhlŭ pơm kơ inh pơm dơ̆ng hăm tơdrong ‘lơ̆ng lăm tơdrong juăt wă kơ mơn hơđơ̆ng gah tơdrong kơdih gơh klaih. Apinh Yang Bơhngol ‘Lơ̆ng tơ’blŏk kơ inh wă kơ inh mơn tơdrong chơt hiôk păng rơngei lăm tơdrong mơnat Sư. Yua anăn Kră Yang Yêsu Krist, Amen.
Bơ̆n oei arih hăm tơdrong rơih iŏk ayơ?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 53
Kênh Youtube BHKTHN:
