Klei Aê Diê Blŭ: Philip 2:1
Êlan kliăng: “Snăn tơdah mâo klei bi mđĭ ai hlăm Krist, tơdah mâo klei bi juh mơ̆ng klei Ñu khăp, tơdah mâo klei bi mguôp hlăm Mngăt Myang, tơdah mâo klei khăp leh anăn klei thâo pap.” (Philip 2:1).
Klei êmuh ksiêm mĭn: Ya jing atur mdơ̆ng kơ klei jing sa hlăm Phung Sang Aê Diê? Snăn mơ̆ng kbiă hriê phŭn kơ klei jing sa? Si hdră êlan yuôm kơ drei mă yua čiăng rŭ mdơ̆ng klei jing sa leh anăn bi mguôp hlăm Phung Sang Aê Diê?
Philip 2:1 brei ƀuh mâo tlâo atur kơ klei jing sa hlăm Krist. Tal sa, jing Khua Yang Yêsu Krist – “tơdah mâo klei bi mđĭ ai hlăm Krist, tơdah mâo klei bi juh mơ̆ng klei khăp”. Boh hră “tơdah” tinei amâo lač knŏng kơ hnơ̆ng čuăn brei bi mâo ôh, ƀiădah wăt čiăng bi klă klei sĭt nik phung đăo ti ƀuôn Philip mă tŭ leh mơ̆ng Klei Mrâo Mrang Jăk. Amâo mâo ôh hlei pô đăo ƀiădah amâo mă tŭ hĕ “klei bi mđĭ ai” leh anăn “klei bi juh” hlăm Yang Krist. Kyua mơ̆ng klei khăp yơh, Khua Yang Yêsu brei leh “klei bi mđĭ ai” leh anăn lŏ brei wăt “klei bi juh” hŏng klei bi mtlaih yuôm bhăn kơ phung mnuih soh amâo mâo klei năng ôh. Tơdah dôk hlăm klei pap Khua Yang, drei dôk đuôm nư klei khăp Khua Yang brei. Thâo săng klei anăn brei drei thâo khăp kơ phung ayŏng adei leh anăn rŭ mdơ̆ng klei jing sa hlăm Phung Sang Aê Diê. Atur kơ klei jing sa jing klei bi knal kơ klei khăp Khua Yang leh anăn lŏ wĭt lač hŏng klei khăp anăn.
Tal dua, jing Yang Mngăt Jăk – “tơdah mâo klei bi mguôp hlăm Yang Mngăt Jăk”. Bruă mơ̆ng Yang Mngăt Jăk jing mkŏ mjing klei bi mguôp ti krah phung đăo hŏng Aê Diê leh anăn ti krah hdơ̆ng phung đăo pô. Tơdah đăo kơ Khua Yang, drei mâo Yang Mngăt Jăk dôk hlăm ai tiê. Klei anăn ciăng lač drei dôk hlăm klei bi mguôp leh anăn klei jing sa hŏng phung ayŏng adei mâo mbĭt klei đăo. Klei jing sa hlăm Phung Sang Aê Diê amâo djŏ mơ̆ng mnuih mjing ôh, ƀiădah klei thơ̆ng mâo kyua mâo klei bi mguôp mbĭt hŏng Yang Mngăt Jăk. Drei amâo mjing klei jing sa ôh ƀiădah knŏng mă tŭ klei jing sa, leh anăn lŏ čuê rŭ mdơ̆ng klei jing sa anăn, čiăng kơ hŏng klei anăn dưi bi knal klei jăk jĭn mơ̆ng klei jing sa.
Tal tlâo, jing klei bi mlih mrâo hlăm mngăt myang – “tơdah mâo klei khăp leh anăn klei thâo pap”. “Klei khăp” kñăm kơ klei bluh ai hlăm lam, bi “klei thâo pap” bi êdah “klei khăp” hŏng phung riêng gah. Atur klei jing sa jing klei bi knal kơ klei khăp Khua Yang leh anăn Phung Sang Aê Diê bi êdah, mbĭt hŏng mâo klei khăp anăn mơ̆ng klei Yang Mngăt Jăk bi mlih mrâo klei hdĭp drei.
Snăn, atur kơ klei jing sa jing mta mơ̆ng klei hdĭp mngăt myang, kyuanăn čiăng rŭ mdơ̆ng klei jing sa brei knang ti klei rŭ mdơ̆ng klei hdĭp mngăt myang. Jih hdră êlan klei mkŏ mjing jing yuôm ƀiădah amâo djŏ jing phŭn ôh. Kñăm đei kơ kdrăp klei mkŏ mjing, amâodah ngă tui msĕ si kdrăp ti êngao srăng mbliư̆ Phung Sang Aê Diê jing hĕ sa klei mkŏ mjing hlăm ƀuôn sang lăn ala. Drei amâo dưi bi lông hŏng lăn ala hŏng kdrăp ti êngao ôh ƀiădah mâo klei dưi hĭn knŏng mơ̆ng klei hdĭp mngăt myang hlăm lam grăp čô leh anăn Phung Sang Aê Diê.
Si ngă drei mâo kdrêč rŭ mdơ̆ng klei jing sa hlăm Phung Sang Aê Diê hŏng hdră êlan djŏ leh mơ̆?
Wah lač: Ơ Khua Yang, bi mni kơ Khua Yang bi mtlaih leh kâo leh anăn brei kâo mâo kdrêč mbĭt hlăm klei bi mguôp hlăm Krist. Akâo Khua Yang brei kâo khăp kơ Khua Yang hĭn leh anăn khăp kơ ayŏng amai adei kâo lu hĭn grăp hruê.
Dlăng Klei Aê Diê Blŭ hlăm tlâo thŭn: Klei Mmuñ Hđăp 57:1-11; 58:1-11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
