Klei Aê Diê Blŭ: II Kôrantô 8:16‑24
Êlan kliăng: “Mbĭt hŏng diñu hmei tiŏ nao ayŏng hmei, pô hmei lông dlăng leh jêñ jêñ leh anăn ƀuh ñu hur har hlăm lu mta bruă; …Bi kơ phung ayŏng hmei anăn, diñu jing phung mnuih Phung Sang Aê Diê tiŏ nao, phung bi guh kơang Krist” (II Kôrantô 8:22a, 23b)
Klei êmuh ksiêm mĭn: Si Khua ƀĭng kna Y‑Pôl lač kơ mnuih dưi čih hlăm êlan 22 dưi lač kơ klei jăk? Ya ngă Khua ƀĭng kna Y‑Pôl lač dua pô anei jing dĭng ktang kơ Sang Aê Diê leh anăn klei guh kơang kơ Yang Krist? Ya klei hriăm drei mâo hlăm klei mă bruă kơ Aê Diê?
Êngao kơ sa čô mnuih Khua ƀĭng kna Y‑Pôl lač hlăm êlan 18, lŏ mâo sa čô mkăn amâo dưi lač ôh anăn ƀiădah ñu lač hlăm êlan 22 srăng nao mbĭt hŏng Y‑Tit hlăm hdră nao ti Sang Aê Diê Kôrantô čiăng mâo prăk đru mguôp. Pô anei dưi hưn mthâo jing mnuih hur har, jih ai tiê, wăt găn leh klei “lông dlăng jêñ jêñ,” amâodah lač mkăn, pô anei găn leh lu klei lông dlăng hlăm klei mă bruă kơ Aê Diê, kyua anăn ñu bi êdah ai tiê đăo knang klă sĭt, “ară anei ñu hur har hĭn kyuadah ñu knang kơ diih ktang snăk.”
Klei êdei anăn, drei hmư̆ Khua ƀĭng kna Y‑Pôl brei thâo dua čô amâo lač anăn anei jing “dĭng ktang kơ Sang Aê Diê”, jing diñu mâo Sang Aê Diê đăo knang leh anăn tiŏ nao, amâo djŏ knŏng jing klei đăo knang mơ̆ng hjăn Khua ƀĭng kna Y‑Pôl ôh. Ƀiădah klei yuôm bhăn hĭn, diñu lŏ “bi guh kơang Krist” (êlan 23) kyua diñu jing phung đăo kơ Krist mơ̆ng klei hriăm mjuăt bi mklă leh ai tiê sĭt suôr leh anăn hur har. Knhal tuč, Khua ƀĭng kna Y‑Pôl mtă kơ phung đăo ti Sang Aê Diê Kôrantô tơdah drông phung dĭng ktang anei brei bi êdah klei khăp hŏng digơ̆, brei digơ̆ ƀuh ñu mâo mta phŭn djŏ klă čiăng ktưn hưn kơ diñu.
Hlăm klei găl jăk, čiăng kơ sa čô mnuih bi êdah ai tiê hur har pô hŏng bruă Sang Aê Diê năng ai amâo dleh ôh. Khădah snăn, sa čô mnuih ăt djă pioh klei hur har hlăm klei mă bruă kơ Aê Diê êlâo êdei amâo bi mlih, jing wăt tơdah tuôm hŏng klei dleh dlan hŏng klei truh, klei dleh dlan, arăng ngă jhat, lông dlăng ƀiădah ăt djă pioh ai tiê hur har msĕ si hlăk pô anăn mă bruă hlăm mmông găl jing klei năng mpŭ snăk. Msĕ si pui dưi čuh mah jing mngač hĭn, klei lông dlăng klă sĭt jing čiăng êdi kơ phung săn asei hlăm klei mă bruă, snăn kơh, drei klă sĭt năng mâo klei bi mklă jăk jing dĭng buăl sĭt suôr leh anăn jing “bi guh kơang Krist”.
Sa klei mkăn, dua čô wăt tơdah arăng bi mni jăk, arăng đăo knang yua ƀiădah amâo dưi lač anăn ôh. Phung sĭt suôr mă bruă kơ Aê Diê, Aê Diê thâo leh anăn Ñu čih leh anăn hlăm anăn Ñu bi mni, kyua anăn lač anăn amâodah tlaih amâo hmăi ôh kơ ai tiê mă bruă kơ Aê Diê drei.
Tơdah Khua ƀĭng kna Y‑Pôl hưn mthâo kơ diih, si ñu srăng hưn?
Wah lač: Ơ Aê Diê pô khăp! Bi mni lač jăk kơ Ih bi mtlaih leh kâo leh anăn brei kơ kâo klei găl dưi mă bruă hlăm Sang Ama, akâo kơ Ih đru kâo djăp ai hgao djăp klei lông dlăng, djă pioh nanao klei hur har hlăm bruă klam dưi jao čiăng năng mâo klei bi mklă jăk jing “bi guh kơang Krist”.
Dlăng Klei Aê Diê Blŭ hlăm tlâo thŭn: Y‑Amôs 2:6‑3:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
