II Kauleethaus 8:16-24
Nqe cim:
“Yog li ntawd peb yuav txib peb tus kwvtij nrog lawv tuaj. Peb twb xyuas nws tes haujlwm ntau zaus lawm peb pom hais tias nws kub siab lug xav pab…tiamsis cov kwvtij uas nrog Titus tuaj, lawv yog cov uas cov ntseeg uas nyob qhov txhia chaw txib tuaj. Thiab lawv yog cov uas ua rau Yexus Khetos tau ntsejmuag.” (II Kauleethaus 8:22a, 23b).
Lus nug rau sawvdaws xav:
- Tus neeg uas Timthawj Paulus hais txog hauv nqe 22 zoo li cas?
- Vim li cas Timthawj Paulus hais tias ob tug neeg no yog cov ntseeg txib tuaj thiab ua rau Yexus Khetos tau ntsejmuag?
- Peb kawm tau dabtsi rau kev ua tus Tswv haujlwm?
Dua li tus neeg uas Timthawj Paulus hais hauv nqe 18, tseem muaj dua ib tug neeg tsis hais npe Paulus hais txog hauv nqe 22 yuav nrog Titus tuaj hauv Pawg Ntseeg Kauleethaus nqa cov nyiaj pab. Tus neeg no tau Paulus hais tias yog ib tug neeg kub siab lug xav pab, thiab twb “xyuas nws tes haujlwm ntau zaus lawm”, lossis hais ua lwm seem lus, tus neeg no twb raug sim ntau zaus rau kev ua tus Tswv haujlwm lawm, yog li Paulus ntseeg siab hais tias, “Nimno nws cia siab tau rau nej, nws hajyam xav pab nej heev.”
Qhov txuas ntxiv, Timthawj Paulus qhia rau peb paub ob tug neeg uas tsis hais npe tawm no puavleej yog “cov ntseeg txib tuaj”, txhais tau hais tias lawv raug xaiv thiab tau Pawg Ntseeg txib tuaj, tsis yog Paulus ib leeg ntseeg siab xwb. Ib qhov tseemceeb ntxiv, lawv yog cov uas “ua rau Yexus Khetos tau ntsejmuag.” (nqe 23) rau qhov lawv yog cov ntseeg Yexus uas twb raug xyuas tes haujlwm ntaus zaus, yeej ncaj ncees thiab kub siab lug pab. Qhov kawg, Timthawj Paulus hais rau cov ntseeg hauv Kauleethaus kom lawv tos txais cov neeg uas raug txib tuaj, cia li qhia tshwm kev hlub rau lawv, kom lawv pom hais tias qhov uas Paulus qhuas lawv muaj tseeb.
Lub sijhawm tau zoo, cia kom ib tug neeg qhia tawm nws lub siab kub lug rau Vajtswv tes haujlwm tsis nyuaj. Tiamsis ib tug neeg muaj lub siab kub lug rau tus Tswv tes haujlwm tsis hloov, txhais tau hais tias txawm yog ntsib kev txomnyem, kev nyuaj, kev sim siab tseem tuav tau lub siab kub lug zoo ib yam li thaum nws tau zoo yog qhov uas zoo kawg nkaus. Zoo ib yam li hluavtaws hlawv tau cov tseem kub, kev sim yog ib yam uas cheemtsum rau tus neeg uas fij tus kheej ua haujlwm, ua li ntawd peb thiaj tsimnyog tau txais qhov timkhawv zoo yog tubtxib ncaj ncees thiab yog “ua rau Yexus Khetos tau ntsejmuag.” Ib yam ntxiv, ob tug neeg no txawm tau ua timkhawv zoo, raug txib los tsis tau hais npe tawm. Tus neeg uas ncaj ncees ua tus Tswv haujlwm, tus Tswv paub thiab sau npe rau hauv Nws paub ntawv muab nqis zog, yog li txawm yuav hais npe lossis tsis hais tsis ua rau nws qaug zog ua haujlwm.
Thov Vajtswv,
Nyuam yaus tus Vajtswv! Koj cawm thiab pub nyuam yaus tau ua Koj tes haujlwm, thov Koj pab kom nyuam yaus txaus peevxwm hla dhau qhov kev sim, tuav tau lub siab kub lug ua tiav tes haujlwm kom tau lub npe “ua rau Yexus Khetos tau ntsejmuag”. Amees.
Yog timthawj Paulus hais txog peb sawvdaws, nws yuav hais txog peb li cas?
Nyeem Vajluskub hauv peb lub xyoo: Amaus 2:6-3:15
Kênh Youtube BHKTHN:
