Mathiơ 6:7-15
“Apinh Ih ‘nĕ jô̆ yo kơ nhôn, thoi nhôn ưh kơ jô̆ yo kơ đe pơm yoch păng nhôn.” (Mathiơ 6:12)
Nơ̆r jet tơchĕng pơwao:
– Kră Yang wă kơ tơdrong kiơ kơplah krao khan apĭnh Kră Yang mơnat tơdrong yoch?
– Yua kơ kiơ kăl huay kơ jô̆ yo tơdrong yoch bơngai nai adrol kơ apĭnh Kră Yang mơnat yoch bơ̆n kơdih?
– Lu bơ̆n kăl kơ pơm tơdrong kiơ wă kơ nơ̆r krao apĭnh mơnat tơdrong yoch Kră Yang gơh tơ tơwih?
Lăm tơdrong krao khan hơdai, Kră Yang Yêsu bơtho: “Apinh Ih ‘nĕ jô̆ yo kơ nhôn, thoi nhôn ưh kơ jô̆ yo kơ đe pơm yoch păng nhôn” (trong 12). Nơ̆r tơblang noh “yoch” lăm nơ̆r tơm blŭng a noh “hre”. Tơdrong yoch mă tơpă noh hre kơ ‘Bok Kei-Dei. Kơplah lui sơng iŏk Kră Yang Yêsu, lu bơ̆n gơh đei Kră Yang mơnat tơdrong yoch bơih. Mă-lei lăm tơdrong arih rim năr, phŏ phŏ lu bơ̆n oei pơ̆k kơtơih yoch hăm Kră Yang, yua kơ oei arih kiơ̆ kơ sĕch akar. Yua kơ đơ̆ng thoi noh na krao khan apinh Kră Yang mơnat tơdrong yoch noh bơih tơdrong kăl tơpă. Lăm tơdrong krao khan kiơ̆ kơ Kră Yang bơtho, Sư đei ăn minh tơdrong, noh jơ̆ ‘nĕ jô̆ yo kơ bơngai nai adrol kơ hơpơi wă Kră Yang mơnat tơdrong yoch lu bơ̆n. Trong 14 Kră Yang tơ’bôh rơđah, “Dah iĕm oei jô̆ yo kơ đe pơm yoch kơ iĕm, lei ‘Bă bơ̆n tơ plĕnh ti kư̆m jô̆ yo kơ tơdrong yoch iĕm mơ̆n.”, wă pơma khan, dah lu bơ̆n krao khan aoĭnh Kră Yang mơnat lei athei mơnat ăn kơ bơngai nai adrol. Dah lu bơ̆n ưh kơ mơnat ăn kơ bơngai nai mă pơm yoch hăm bơ̆n lei Kră Yang ưh kơ mơ̆ng nơ̆r lu bơ̆n krao khan “Apinh Ih ‘nĕ jô̆ yo kơ nhôn”.
Kơplah Kră Yang Yêsu roi hơ ‘mon lăm Mathiơ 18:23-35, Sư pơma hơđăl rơđah ‘bar tơdrong: Mă minh, tơdrong yoch lu bơ̆n oei hre kơ Kră Yang tih hloh lơ wơ̆t hăm tơdrong bơngai nai mă yoch hăm lu bơ̆n, mă ‘bar, dah Kră Yang ăn bơih tơdrong yoch lu bơ̆n mă khan tih dêh, yua kơ kiơ lu bơ̆n ưh kơ mơnat ăn kơ tơdrong yoch ‘nhŏng oh bơ̆n kơdih? Trŏ ưh kơ tơpăt! thoi noh kơplah lu bơ̆n băt mơn kơdih pơm yoch bơih hăm Kră Yang păng pơyơ̆r nơ̆r krao khan apinh Kră Yang mơnat lei athei ‘blŏk lu bơ̆n kư̆m athei mơnat ăn kơ ‘nhŏng oh mă pơm yoch hăm bơ̆n , dah ưh lei tơdrong mơnat đơ̆ng Kră Yang ưh kơ đei tôm mah ăn kơ lu bơ̆n păng sư kư̆m ưh kơ mơnat kơ lu bơ̆n thoi nơ̆r Kră Yang bơtho: “ Kơplah iĕm krao khan, iĕm ‘nĕ kơ jô̆ yo mă iĕm đei tơdrong ơh păng bu bu ră, na mă ‘Bă tơm bơ̆n kơpal plĕnh ti huay kơ jô̆ yo tôm tơdrong yoch iĕm. Dah iĕm oei jô̆ yo kơ đe pơm yoch kơ iĕm, lei ‘Bă tơm bơ̆n kơpal plĕnh ti kư̆m jô̆ yo kơ tơdrong yoch iĕm mơ̆n.” (Markôs 11:25-26 BTTHĐ). Đei minh tơdrong gĭt kăl tơpă noh Kră Yang Yêsu gô hiơt đĭ tơdrong yoch mă đêl Sư mơnat bơih: Noh, Inh kơdih ‘mơ̆i sŭt lê̆ tơdrong iĕm pơm yoch păng Inh ưh pă ‘blŏk dơ̆ng tơdrong yoch iĕm” (Êsai 43: 25); mă-lei lu bơ̆n kư̆m oei ‘blŏk kơ tơdrong glăi bơngai nai mă pơm ưh kơ ‘lơ̆ng hăm bơ̆n kơdih! Athei mơnat ăn păng ‘mêm mơnat na gơh hiơt đĭ! Athei achăng tŭk lu tơdrong mă lu bơ̆n oei kơ bơngai nai đêl pơm yoch glăi hăm bơ̆n, phŏ gah jên tơmam, tơdrong ưh kơ tơpăt dah lăm jơhngơ̆m ‘maih pơm ‘mong plơ̆, Kră Yang wă kơ lu bơ̆n ưh pă jô̆ yo tôm tơdrong adrol kơ krao khan apinh Kră Yang mơnat ăn kơ lu bơ̆n.
Kơkuh kơ Ih ơ Kră Yang mă ‘mêm mơnat, bơnê kơ Ih Kră Yang mơnat ăn bơih tơdrong yoch inh, apĭnh Ih ăn kơ inh đei jơhngơ̆m huay jô̆ kơ bơngai nai păng ‘mêm mơnat kơ lu sư wă kơ inh kư̆m iŏk tơdrong mơnat đơ̆ng Kră Yang rim năr. Krao khan yua anăn Kră Yang Yêsu Krist. Amen.
Lu bơ̆n hăm wă đei jơhngơ̆m mơnat ăn kơ ‘nhŏng mă pơm yoch glăi hăm lu bơn ưh?
Đŏk sơ̆p hla bơar nơ̆r ‘Bok Kei-Dei lăm pêng sơnăm: II Lu pơtao 25
Kênh Youtube BHKTHN:
