Amâo Djŏ “Ngă Leh” Ôh Ƀiădah “Dôk Ngă” – 23/1/2023

1475

 

Klei Aê Diê Blŭ: Philip 3:12-16

Êlan kliăng: “Ƀiădah kâo ngă sa mta klei, kâo wơr bĭt hĕ klei ti tluôn leh anăn hung kơ klei ti anăp. Kâo hung čiăng truh kơ anôk bi kčah” (Philip 3:13b-14a)

Klei êmuh ksiêm mĭn: Ya mta kñăm jih klei hdĭp mơ̆ng sa čô đăo kơ Krist? Ya mta klei msĕ phung đăo kơ Krist leh anăn phung bi lông êran hlăm klei hung kơ mta kñăm? Hlăm thŭn mrâo, si ai tiê “amâo ngă leh ôh ƀiădah dôk ngă” dưi bi êdah hlăm klei hdĭp drei?

Găn thŭn hđăp, drông thŭn bhang mrâo jing gưl yuôm snăk čiăng kơ drei lŏ dlăng wĭt sa thŭn leh êgao, thâo ya klei ka jăk čiăng mkra, yap klei jăk mâo leh čiăng mâo thiăm klei hdơr knga kơ Aê Diê. Anăn jing bruă ngă yuôm bhăn leh anăn čiăng snăk. Hlăm trăn Klei Aê Diê Blŭ hruê anei, Khua ƀĭng kna Y‑Pôl mñă kơ drei mâo thiăm sa klei mkăn hlăm klei hdĭp phung đăo kơ Krist. Yua rup sa klei bi lông êran, khua ƀĭng kna mñă kơ phung đăo ti Philip mta kñăm jih klei hdĭp mơ̆ng sa čô đăo kơ Krist jing mâo klei “jăk kluôm ênŭm” amâodah “jăk klă” (êlan 12). Hlue si hră Êphêsô 4:13, “truh leh kơ klei jăk klă” jing “klei anăn Krist Yêsu mă leh kâo kơ Ñu pô” Hlăm klei anei, brei drei thâo săng klei hdĭp phung đăo kơ Khua Yang msĕ si sa klei bi lông êran tinăn drei “Amâo djŏ ôh mă tŭ leh klei mưn” kăn djŏ mơh “truh leh kơ klei jăk klă” (êlan 12-14) ƀiădah pô ăt “dôk hung” (êlan 12).

Si bĕ ngă čiăng răng kriê pô thâo săng nanao klei anei? Khua ƀĭng kna Y‑Pôl mtă: Tal sa, brei “wơr bĭt hĕ klei ti tluôn” (êlan 14). Pô bi lông êran dôk hlăm êlan êran amâo mâo mmông čiăng huă mnăm ôh hlăm ktuê êlan dưi êran leh anăn ngă ngơi mang kơ kdrêč êlan adôk phă anăp. Jing kluôm ênŭm msĕ si Khua Yang jing klei sĭt bi tuôm hŏng Khua Yang kơh drei dưi mâo. Ti hruê drei lŏ dlăng čiăng ktưn hưn kơ ya klei dưi mâo jing hruê anăn drei amâo “hung kơ klei ti anăp” ôh. Hlăm klei anei, hơ̆k mơak leh anăn hdơr knga amâo djŏ jing tŭ ư, mdei hŏng klei dưi mâo leh ôh.

Tal dua, brei “hung kơ klei ti anăp” leh anăn “hung čiăng truh kơ anôk bi kčah” (êlan 14). Klei sa anăn sa čô bi lông êran brei ngă jing dlăng phă anăp leh anăn lŏ dơ̆ng hung phă anăp. Ăt msĕ snăn mơh, čiăng kơ Krist ƀrư̆ hruê dưi bi êdah klă hĭn hlăm drei, brei drei dlăng kơ Khua Yang Yêsu čiăng hung phă anăp grăp hruê. Hruê anei, kâo msĕ si Khua Yang hĭn hruê mbruê, hruê mgi kâo msĕ si Khua Yang hĭn hruê anei.

Hlăk mrâo đăo kơ Khua Yang, drei khăng mâo knhuang ktưn phă anăp dlông snăk. Leh lu thŭn, drei mâo klei bi knăl dôk sa anôk, kjham hĭn jing kdŭn tluôn. Klei drei kah mbha hlăk anăn jing ya klei drei dưi bi mlih “leh”, dưi mgei “leh” mơ̆ng “hlăk anăn”, hlăk pluh thŭn êlâo. Drei lŏ dlăng wĭt thŭn mlan leh êgao čiăng hdơr kơ Khua Yang amâo djŏ dlăng phă anăp čiăng lŏ dơ̆ng thâo kral Khua Yang. Brei wơr bĭt hĕ klei ti tluôn leh anăn hung kơ klei ti anăp. Amâo djŏ “ngă leh ôh” ƀiădah “dôk ngă”.

Drei mâo ya hdră kčah klă klơ̆ng čiăng mđing truh kơ hdră kñăm msĕ si Khua Yang Yêsu hĭn?

Wal lač: Ơ Khua Yang, akâo kơ Ih đru kâo amâo dôk sa anôk ôh hlăm klei jing msĕ si Khua Yang. Hlăm thŭn mrâo, akâo kơ Ih đru kâo hung kơ mta kñăm Khua Yang iêô leh kâo čiăng grăp hruê msĕ si Ih lu hĭn.

Dlăng Klei Aê Diê Blŭ hlăm tlâo thŭn: Y‑Êsêkiêl 16:44-63

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcTsis Yog “Twb” Tiamsis Yog “Tabtom” – 23/1/2023
Bài tiếp theoKhông Phải “Đã” Mà “Đang” – 23/1/2023