Klei Aê Diê Blŭ: II Klei Yăl Dliê 7:12-18
Êlan kliăng: “Tơdah phung ƀuôn sang Kâo arăng pia hŏng anăn Kâo bi luă gŭ diñu pô, wah lač leh anăn duah ƀô̆ mta Kâo, leh anăn lui êlan soh diñu, hlăk anăn Kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu” (II Klei Yăl Dliê 7:14).
Klei êmuh ksiêm mĭn: Ya klei Aê Diê bi êdah leh anăn ƀuăn hŏng mtao Y‑Salômôn? Klei ƀuăn anăn nao mbĭt hŏng ya hnơ̆ng čuăn? Si drei wah lač leh anăn wah lač brei čiăng bi knal klei Khua Yang wĭt lač?
Hlăm kdrêč 6, mtao Y‑Salômôn wah lač akâo kơ Aê Diê pap brei kơ phung ƀuôn sang Ñu kyua klei diñu ngă soh. Ñu ăt lŏ wah lač brei nanao kơ phung ƀuôn sang lu mlan êdei kơnăn. Leh anăn truh kơ kdrêč anei, Aê Diê bi êdah kơ mtao Y‑Salômôn êdei kơ leh bruă mdơ̆ng Sang Yang sa wưng. Aê Diê lač hŏng mtao, Ñu hmư̆ leh klei mtao wah lač. Ñu srăng pap brei klei soh leh anăn bi hlao čar Israel mbĭt hŏng hnơ̆ng čuăn brei diñu ngă: Tal sa, bi luă gŭ pô leh anăn hưn klei soh; tal dua, wah lač akâo kơ Aê Diê pap brei klei soh; tal tlâo, tui duah Aê Diê hŏng jih ai tiê; tal pă, lui êlan soh (êlan 14). Klei kmhal sĭt brei nao mbĭt hŏng bruă ngă lui êlan klei hdĭp ngă soh êlâo dih. Klei Aê Diê ƀuăn klă mngač tơdah phung ƀuôn sang ngă dŭm mta klei ti dlông anăn, Ñu srăng mđing hmư̆ leh anăn pap brei klei soh.
Tui tluôn anăn, Aê Diê ăt lač klă hŏng mtao Y‑Salômôn, Ñu srăng dôk hlăm Sang Yang ñu mdơ̆ng leh, leh anăn srăng dôk dlăng leh anăn mđing knga kơ klei wah lač tinăn (êlan 15-16). Ñu mtă mơh kơ mtao Y‑Salômôn brei tui hriăm mơ̆ng ama ñu mtao Y‑Đawit bi hmô leh, huĭ mpŭ kơ Aê Diê leh anăn djă pioh klei bhiăn Ñu snăn Aê Diê srăng hơêč hmưi kơ ñu (êlan 17-18). Anei jing klei ƀuăn yuôm bhăn Aê Diê pioh kơ mtao Y‑Salômôn hlăk êjai ñu kiă kriê ƀuôn sang Israel. Klei Aê Diê ƀuăn nao mbĭt hŏng hnơ̆ng čuăn nanao, čoh čuăn drei gưt asăp čiăng dưi bi knal klei Aê Diê hơêč hmưi.
Hruê anei, drei dôk hdĭp ti krah lăn ala mtŭk mtŭl, bŏ dlai klei soh jhat, phung anak ƀuôn sang Aê Diê brei djă păn bi kjăp klei Aê Diê ƀuăn čiăng bi luă gŭ pô wah lač brei kơ phung ƀuôn sang, kơ lăn čar. Aê Diê jing Pô Sĭt Suôr, Ñu srăng mđing hmư̆ leh anăn wĭt lač kơ klei drei wah lač tơdah drei thâo bi luă gŭ pô wah lač leh anăn duah ƀô̆ mta Khua Yang, kmhal hưn klei soh ti anăp Ñu. Ƀuôn sang drei čiăng snăk kơ phung anak ƀuôn sang Aê Diê sa ai tiê wah lač brei čiăng kơ Khua Yang dôk dlăng leh anăn bi mtlaih ƀuôn sang mơ̆ng klei mmăt klei soh leh anăn lu mnuih lŏ wĭt kơ Aê Diê.
Hlăm ktuê êlan tui hlue Khua Yang, brei drei djă pioh klei bhiăn ksiêm dlăng drei pô grăp hruê čiăng bi luă gŭ pô hưn klei soh ti anăp Khua Yang kơ ya mta klei drei ngă soh hlăm hruê anăn, dơ̆ng mơ̆ng anăn drei dưi bi knal klei Aê Diê pap brei klei soh leh anăn thâo kral klei mmih jăk hlăm klei bi mguôp sĭt suôr hŏng Ñu. Phung Sang Aê Diê brei sa ai tiê wah lač brei kơ phung ƀuôn sang drei pô, sĭt nik drei srăng bi knal klei Aê Diê wĭt lač.
Si ngă drei jêñ mơ̆ bi luă gŭ pô, wah lač leh anăn tui duah ƀô̆ mta Khua Yang?
Wah lač: Ơ Khua Yang, akâo kơ Ih mñă brei kâo hdơr klei Ih ƀuăn čiăng kơ kâo thâo bi luă gŭ pô, jih ai tiê kmhal, hưn klei soh leh anăn bi knal klei Khua Yang wĭt lač leh anăn pap brei klei soh. Akâo kơ Ih đăm brei kâo wơr bĭt ôh wah lač brei kơ lăn čar leh anăn kơ phung ƀuôn sang kâo.
Dlăng Klei Aê Diê Blŭ hlăm tlâo thŭn: Y‑Êsra 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
