Klei Aê Diê Blŭ: Y-Yôsuê 5:11-12
Êlan kliăng: “Snăn đăm diih uêñ đei ôh leh anăn lač, ‘Ya drei srăng ƀơ̆ng huă?’ amâodah ‘Ya drei srăng mnăm?’ amâodah ‘Ya drei srăng hơô?” (Y-Mathiơ 6:31)
Klei êmuh ksiêm mĭn: Hruê êdei Knăm Klei Găn, ya mnơ̆ng phung ƀuôn sang Israel ƀơ̆ng leh? Hdră Aê Diê rông phung ƀuôn sang Ñu hlăm kdrăn tač leh anăn ti Kanaan brei ƀuh ya klei Aê Diê mkăp kơ phung ƀuôn sang Ñu? Ya klei đru drei hdĭp amâo rŭng răng kơ hruê mgi?
Phung ƀuôn sang Israel dôk ti Gilgal leh anăn djă pioh Knăm Klei Găn tinăn. Hruê êdei Knăm Klei Găn, phung ƀuôn sang Aê Diê ƀơ̆ng mnơ̆ng jăk ti krĭng jing ƀêñ amâo mâo kpei leh anăn mdiê đeh. Anei jing mnơ̆ng ƀơ̆ng grăp hruê dưi duah hlăm krĭng (Klei Mphŭn Dơ̆ng 19:3; I Y-Samuel 17:17). Aguah hruê êdei, mana amâo lŏ lĕ ôh. Klei anei brei ƀuh klei thâo mĭn, klei khăp leh anăn klei kriê dlăng Aê Diê brei kơ phung ƀuôn sang Ñu hlăm grăp mnĭt mmông klei hdĭp diñu. Ñu amâo brei digơ̆ tŭ klei ư̆ êpa ya hruê ôh leh anăn Ñu thâo ya mnơ̆ng digơ̆ čiăng leh anăn hbĭl. Êlâo dih, mana ăt amâo mdei lĕ ôh tơdah phung ƀuôn sang blŭ duñ duñ (Klei Yap 11:5-6). Wăt tơdah diñu mâo knuih amâo hdơr knga ôh, amâo năng ôh, ƀiădah kyua klei pap Aê Diê, Ñu ăt lŏ dơ̆ng mkăp kơ phung ƀuôn sang Aê Diê hlăm jih pă pluh thŭn. Aê Diê knŏng mdei brei mana tơdah diñu mâo leh djăp ênŭm mnơ̆ng ƀơ̆ng hlăm Lăn Aê Diê Ƀuăn. Ñu jing Pô sĭt suôr nanao hŏng klei ƀuăn srăng ba phung ƀuôn sang Ñu hlăm krĭng Lăn Aê Diê Ƀuăn kyua anăn amâo lui diñu djiê êpa hlăm kdrăn tač ôh (Klei Mphŭn Dơ̆ng 17:8).
Mana mdei luh amâo mđrĭng hŏng bruă Khua Yang amâo lŏ mkăp ôh. Ñu srăng lŏ dơ̆ng mkăp kơ digơ̆ hŏng klei mkăn. Êlâo dih, mana jing mnơ̆ng ƀơ̆ng kơ sa čô mnuih dôk hlăm kdrăn tač; ară anei diñu dôk ti Kanaan, amâo lŏ hiu dôk ôh. Brei diñu lŏ dơ̆ng gưt asăp Aê Diê, nao phă krĭng Aê Diê ƀuăn brei čiăng pla mjing tinăn amâodah tŭ klei djiê ư̆ êpa. Yap mơ̆ng ară anei, diñu amâo lŏ knang hlăm klei myang brei mana čiăng hdĭp mda ôh ƀiădah srăng hdĭp hŏng mnơ̆ng dhơ̆ng mơ̆ng kngan pô pla mjing. Ƀiădah wăt tơdah mana mơ̆ng adiê lĕ, hŏng klei myang amâodah mnơ̆ng ƀơ̆ng grăp hruê dưi mâo hŏng bruă pla mjing, jing kyua klei pap Aê Diê brei sơăi. Brei diñu lŏ dơ̆ng đăo knang Aê Diê jing Pô bi mtlaih diñu mơ̆ng kngan Pharaôn leh anăn mkăp mnơ̆ng ƀơ̆ng kơ diñu hlăm kdrăn tač, klă sĭt ăt srăng lŏ dơ̆ng brei kơ diñu mnơ̆ng ƀơ̆ng leh anăn mâo klei dưi ti Kanaan.
Lu blư̆ tơdah drei tuôm hŏng klei dleh dlan hlăm klei hdĭp, msĕ si luč bruă mă, luč pô kmeh gơ̆ng hlăm gŏ sang, klei ruă mâo sui… Brei hdơr Aê Diê dôk mbĭt nanao hŏng drei hlăm djăp mnĭt mmông hlăm klei hdĭp. Tơdah Aê Diê kđăl ƀăng anei, anăn ăt jing Ñu dôk pŏk kơ drei êlan mkăn. Brei drei lŏ dơ̆ng gưt asăp Aê Diê, êbat hŏng klei đăo Aê Diê, Pô dôk mbĭt leh leh anăn mkăp kơ drei hlăm hruê mlan leh êgao, ăt srăng jing Pô lŏ dơ̆ng mkăp kơ drei hlăm êdei anăp hlue si hdră Ñu. Anăn jing klei thâo hdĭp êđăp ênang, amâo rŭng răng ôh kơ hruê mgi.
Mâo mơ̆ tăp năng drei đing klei Aê Diê mkăp leh anăn kriê dlăng pô?
Wah lač: Ơ Khua Yang, akâo kơ Ih đru kâo thâo klei kâo mâo leh leh anăn dôk mâo jing klei jăk mơak Aê Diê brei sơăi, čiăng kơ kâo lŏ dơ̆ng đăo knang kơ Ih srăng jing Pô lŏ dơ̆ng mkăp brei leh anăn dôk mbĭt hŏng kâo hlăm jih thŭn mlan ti lăn ala. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
