Yausuas 5:11-12
Nqe cim:
“Yog li ntawd, nej tsis txhob txhawj hais tias, ‘Peb yuav muab dabtsi los noj los haus thiab los hnav?” (Mathais 6:31)
Lus nug xav:
– Hnub tom qab Kevcai Hla Dhau, cov Yixayees noj yam dabtsi?
– Vajtswv txoj kev saib xyuas thiab pub mov rau Nws haiv neeg hauv tiaj suabpuam thiab hauv tebchaws Kana-as qhia pom dabtsi txog Vajtswv kev saib xyuas Nws haivneeg?
– Yam dabtsi ua rau peb ua neej tsis txhawj txog tagkis?
Cov Yixayees tsuam yeej nyob hauv Nkilenkas thiab ua Kevcai Hla Dhau rau ntawd.
Hnub tom qab Kevcai Hla Dhau, lawv tau noj tej qoob loo hauv lub tebchaws ntawd, xws li cov ncuav tsis xyaw keeb thiab tej mov kib. Nov yog tej zaub mov uas nrhiav tau yoojyim hauv lub tebchaws ntawd. Tagkis tom qab ntawd, manas tsis poob ntxiv lawm. Qhov no qhia hais tias Vajtswv muaj kev txawj ntse, kev hlub, thiab kev saib xyuas Nws haiv neeg txhua lub sijhawm. Nws yeej tsis cia lawv tshaib plab ib hnub twg li, thiab Nws paub lawv cheemtsum dabtsi thiab thaum twg. Yav tas los, txawm cov Yixayees pheej yws thiab tsis ua Vajtswv tsaug los, manas tseem poob los txhua hnub (Teev Npe 11:5-6). Txawm lawv muaj tus cwjpwm tsis nco Vajtswv txiaj ntsig, tsis tsimnyog los vim Vajtswv txoj kev hlub tshua thiab txoj koob hmoov, Nws tseem pub mov rau lawv tau 40 xyoo hauv tiaj suabpuam. Tsuas yog thaum lawv muaj txaus noj hauv Tebchaws Coglus tseg tus Tswv thiaj tsis tso manas los lawm xwb. Tus Tswv yog tus ncaj ncees rau Nws tej lus cog tseg uas yuav coj Nws haiv mus rau tebchaws coglus tseg, yog li ntawd Nws thiaj tsis cia lawv tuag tshaib tom tiaj suab puam.
Qhov uas Manas tsis poob lawm tsis tau txhais hais tias Vajtswv tsis saib xyuas lossis tsis pub mov rau lawv ntxiv lawm. Vajtswv tseem yuav pub rau lawv, tiamsis hloov dua lwm txoj haukev xwb. Yav tas los, Manas yog zaub mov rau cov neeg uas mus mus los los tom tiaj suabpuam, tiamsis tamsim no lawv twb nyob hauv tebchaws Kana-as, lawv tsis mus mus los los ntxiv lawm. Lawv yuav tsum mloog Vajtswv lus, mus txeeb lub tebchaws uas Vajtswv tau cog lus pub rau lawv, thiab ua liaj ua teb cog qoob loo thiaj tsis tuag tshaib. Txij no mus lawv yuav tsis cia siab rau manas uas poob saum ntuj los lawm, tiamsis yuav noj tej qoob loo uas lawv txhais tes cog tau los. Txawm yog manas yam uas poob saum ntuj los lossis tej qoob loo uas lawv cog tau, txhua yam ntawd yeej yog Vajtswv pub tibyam nkaus. Lawv yuav tsum ntseeg hais tias Vajtswv yog tus uas cawm lawv dim ntawm Falaus thiab pub mov rau lawv tom tiaj suabpuam thiab paub tseeb hais tias Nws yeej yuav yug lawv thiab pub kovyeej yeebncuab hauv tebchaws Kana-as thiab.
Qee zaus peb ntsib tej kev txomnyem hauv lub neej, xws li poob haujlwm, plam tus neeg tseemceeb hauv tsev neeg, lossis muaj mob ntev ntev…Thaum muaj tej xwm txheej zoo li no, thov nco ntsoov hais tias Vajtswv yeej nrog peb nyob txhua lub sijhawm. Thaum Vajtswv kaw lub qhov rooj no, Nws kuj tabtom qhib dua lwm lub qhov rooj rau peb thiab. Peb yuav tsum mloog Vajtswv lus mus ntxiv, rhais ruam mus thiab ntseeg ruaj hais tias Vajtswv yog tus uas twb saib xyuas thiab pub rau peb yav tas los lawm, thiab nim no Nws kuj yog tus uas yuav saib xyuas thiab tu peb yav tom ntej no raws li Nws txoj kev npaj tseg lawm thiab. Qhov no yog txoj hauvkev ua rau peb muaj kev kaj siab thiab tsis txhawj txog tagkis.
Thov Vajtswv,
Tus Tswv, thov pab kom nyuam yaus paub hais tias txhua yam zoo uas nyuam yaus muaj niaj hnub nim no yog Koj pub rau nyuam yaus. Thov pab kom nyuam yaus cia siab rau Koj mus ntxiv, ntseeg ruaj hais tias Koj yuav saib xyuas, pub rau nyuam yaus, thiab nrog nyuam yaus nyob txhua hnub hauv nyuam yaus lub neej. Nyuam yaus tuav Tswv Yexus Khetos lub npe thov, Amees.
Puas muaj thaum twg peb ua xyem xyav rau Vajtswv txoj kev saib xyuas thiab tu peb?
Nyeem Vajluskub hauv peb lub xyoo: Malakaus 8
Kênh Youtube BHKTHN:
