Jôsuê 5:11-12
“Thoi noh na iĕm ‘nĕ pă tơchĕng khan: Bơ̆n wă sa kiơ, hrŭk kiơ?”(Mathiơ 6:31)
Nơ̆r jet tơchĕng pơwao:
– Đơ̆ng rŏng kơ năr Phĕt Năm Brih, kon pơlei Isơrael đei sa tơmam kiơ?
– Tơdrong Kră Yang ‘me rong kon pơlei Kră Yang tơ char glăl păng tơ Kanaan wă tơ’bôh tơdrong kiơ gah Kră Yang tơgŭm tơmam sa hăm kon pơlei Sư?
– Tơdrong kiơ tơgŭm lu bơ̆n huay kơ hiơ̆k bơngơ̆t kơ năr dơning?
Kon pơlei Isơrael pơm anih tơ Gilgal păng wei răk Phĕt Năm Brih tơ noh. Đơ̆ng rŏng kơ năr Phĕt Năm Brih kon pơlei Kră Yang đei sa tơmam plei ‘long păng ‘bĕng ưh kơ đei ‘buih pông păng găr hơdrĕng. ‘Nâu jơ̆ lu tơmam sa rim năr đei chă sa lăm dêh noh (Blŭng a 19:1; I Samuel 17:17). Pơge năr đơ̆ng rŏng, mana ưh pă jruh tơ teh. Tơdrong âu wă tơ’bôh tơdrong gơh hơgei, ‘mêm mơnat păng Kră Yang ‘me rong kon pơlei Sư rim jơ phŭt lăm chăl arih lu sư. Sư ưh kơ ăn lu sư pơngot rơwĕt mă năr hơyơ păng Sư băt kơ lu sư kăl kơ kiơ mă kơplah ayơ. Adrol kơ noh, mana oei jruh ưh kơ pơdơh kơplah kon pơlei jŏk tơtok (Jô̆ bơngai 11:5-6). Mă khan jơhngơ̆m lu sư ưh kơ băt bơnê, ưh kơ trŏ, mălei yua kơ ‘mêm mơnat Kră Yang, Kră Yang oei ‘me rong kon pơlei Sư lăm puăn jĭt sơnăm. Kră Yang ưh kơ sĭ ưh kơ pơdơh ăn ‘bĕng mana đĕch kơplah lu sư đei tôm tơmam sa tơ lăm Teh đak Pơkă. Sư jơ̆ ‘Bok mă tơpăt hăm nơ̆r pơkă pơkăm gô chông anhăk kon pơlei Sư mơ̆t lăm Teh đak Pơkă na ưh kơ wă kơ lu sư lôch kơ pơngot rơwĕt tơ char glă (Blŭng a 17:8).
Mana ưh kơ jruh ưh kơ trŏ khan Kră Yang ưh pă tơgŭm bơih ôh. Kră Yang oei ‘me rong lu sư mălei hăm trong nai dơ̆ng. Adrol kơ ‘nâu, mana jơ̆ tơmam sa ăn kơ minh kon pơlei arih hơwơ̆l hơwang lăm char glă; jơ ‘nâu lu sư oei tơ dêh Kanaan, ưh pă arih hơwơ̆l hơwang, mălei athei arih hăm tơmam sa lĕch đơ̆ng jơ̆ng ti kơdih. Mălei mă khan ‘bĕng mana jruh đơ̆ng plĕnh hăm tơdrong mơsêh dah khan tơmam sa đei rim năr gơh đei lĕch đơ̆ng jơ̆ng ti choh jang pơtăm, tôm tơdrong noh tă đơ̆ng Kră Yang ăn ngăl. Lu sư athei oei lui kơ Kră Yang jơ̆ ‘Bok mă dŏng pơklaih lu sư đơ̆ng ti Pharaôn păng ‘me rong lu sư lăm char glă, sĭt tơpă kư̆m oei ăn kơ lu sư tơmam sa păng kĕ jei kơplah oei tơ Kanaan.
Lơ wơ̆t lu bơ̆n tơ’bơ̆p anat anot ayơ noh lăm chăl arih, thoi hiong tơdrong jang, hiong bơngai kăl tơm lăm hnam dơnŏ, jĭ jăn đunh khei sơnăm.v.v… Apinh athei ‘blŏk Kră Yang ling lang oei hơdai lu bơ̆n lăm rim jơ phŭt lăm chăl arih lu bơ̆n. Kơplah Kră Yang tang ‘măng ‘nâu, ‘noh kư̆m kơplah Sư pơih ăn ‘măng kơ lu bơ̆n ‘măng gah nai dơ̆ng. Lu bơ̆n athei oei chu kiơ̆ nơ̆r Sư. Yak năm hăm đon lui kơ Kră Yang ‘Bok Kei-Dei. ‘Bok mă oei hơdai ‘me rong lu bơ̆n đơ̆ng sơ̆, kư̆m ‘Bok mă oei ‘me rong lu bơ̆n tơ anăp hăm dôm tơdrong, tơdrong âu, tơdrong to. ‘Noh jơ̆ tơdrong kăl kơ pơm wă kơ hiôk hian, ưh pă hiơ̆k bơngơ̆t kơ năr dơning.
Ơ Kră Yang, apinh Ih ăn kơ inh băt kơnăl dôm tơdrong hmă mă inh đei păng oei đei noh tă đơ̆ng Ih ăn ngăl, wă kơ inh oei lui gơnang kơ Ih oei ‘me rong inh păng oei hơdai inh lăm đĭ chăl arih. Krao khan yua anăn Kră Yang Yêsu Krist, Amen.
Hăm đei layơ lu bơ̆n ngĭl ngŭl kơ Kră Yang tơgŭm păng ‘me rong lu bơ̆n ưh?
Đŏk Sơ̆p hla bơar ‘Bok Kei-Dei lăm pêng sơnăm: Markôs 8
Kênh Youtube BHKTHN:
