Loos 5:12-21
Nqe cim
“Vim ib tug tsis mloog Vajtswv lus, sawvdaws thiaj ua txhaum, tiamsis vim Yexus Khetos mloog Vajtswv lus, sawvdaws thiaj ua tau neeg ncaj ncees.” (Loos 5:19).
Lus nug rau sawvdaws xav:
– Adas cajces thiab Yexus Khetos cajces muaj qhov txawv zoo li cas?
– Lub zog ntawm txojkevcai yog dabtsi?
– Timthawj Paulus qhia paub tus Tswv txoj koob hmoov muaj nqis li cas?
– Peb txais yuav qhov no zoo li cas?
Adas ua txhaum tsis mloog tus Tswv lus, noj tsob txiv txwv hauv lub Vaj Edees. Txij thaum ntawd kev txhaum los rau hauv ntiajteb, Adas thiab tibneeg ntiajteb thiaj raug txojkev tuag (nqe 12). Adas zoo ib yam li ib tug qauv raug foom tsis zoo, tagnrho cov menyuam yug los ntawm tus qauv ntawd puavleej zoo tsis txaus. Txhua tus tibneeg puavleej nyiam txojkev txhaum thiab ua txhaum. Nqi zog ntawm txojkev txhaum yog txojkev tuag sab nqaij tawv thiab sab ntsujplig, tej no tshwm muaj raws nraim li Vajtswv tej lus samhwm ua ntej thaum tibneeg tsis tau ua txhaum (Chivkeeb 2:16-17; Loos 5:14).
Vajtswv yog tus dawbhuv, ncaj ncees thiab ua siab ntev, Nws npaj ib txoj hau kev rau tibneeg. Kiag lub sijhawm tibneeg poob kev txhaum, tus yaj uas raug tua, muab cov tawv los xaws hnav npog Adas thiab Evas nkawd kev txajmuag. Tus yaj uas raug tuag piv txog Tswv Yexus, lub Zwmtxwv thib ob ntawm Vajtswv Vaj Peb Leeg los yug ua neeg, tuag hloov tus neeg txhaum qhov chaw. Tswv Yexus txojkev ncaj ncees zam tau cov neeg uas yug dua tshiab hauv Nws (Yauhas 3:3, 5-7). Tagnrho cov neeg yug ntawm Yexus Khetos cajces tau txais koob hmoov, tau suav hais tias ncaj ncees, nrog tau Vajtswv sib raug zoo thiab tau txojsia nyob sab ntsujplig. Tus Tswv cov menyuam tau txais thiab nyob hauv txojsia, txhua tus ua neej tshiab muaj Vaj Ntsujplig lub hwjchim kav (nqe 16-17).
Timthawj Paulus hais txog ib tug lw tshab plaws hauv ntu Vajluskub no, qhov ntawd yog; cajces ntawm tus neeg twg ces yuav tau txais tagnrho tus yamntxwv thiab tej qubtxeeg qubteg ntawm tus neeg ntawd (nqe 12, 15, 17-19, 21). Paulus hais tias txojkevcai tsis cuam tshuam txojkev txhaum los rau hauv ntiajteb thiab txojkev tuag poob rau txhua tus tibneeg (nqe 13). Qhov uas coj txojkevcai pab tsis tau kom tibneeg tau kev cawmdim. Lub zog ntawm txojkevcai yog qhia tawm tibneeg txojkev txhaum thiab qhov nqi zog uas tibneeg yuav raug. Txojkevcai hais tias tibneeg pab tsis tau lawv tus kheej, tsuas yog txoj koob hmoov pub dawb uas tus menyuam Yaj tsis tau ua txhaum los tuag hloov thiaj cawm tau tibneeg xwb. Yog Adas tib leeg ua txhaum es tagnrho txhua tus neeg puavleej ua txhaum thiab tuag, ces Vajtswv txoj koob hmoov pub dawb npluamias uas dhau los ntawm Tswv Yexus txojkev tuag txhiv pub tau txojsia rau txhua tus neeg li ntawd thiab (nqe 15). Tus Tswv txoj koob hmoov hlub zoo dua txojkev txhaum Adas ua. Peb cia li ua tus Tswv tsaug, vim peb ntseeg Tswv Yexus peb tau txais txojsia ntev dhawv mus ibtxhis (nqe 20-21).
Thov Vajtswv,
Tus Tswv, ua tsaug uas nyuam yaus tau yug dua tshiab hauv Koj los txais tej koob hmoov zoo. Thov Koj pab kom nyuam yaus niaj hnub zeem paub, tuav rawv lub meejmom thiab homphiaj ua cajces nyob hauv Tswv Yexus. Nyuam yaus tuav Tswv Yexus lub npe thov, Amees.
Peb puas ua neej kom phim lub meejmom uas yog Vajtswv tus neeg lawm tau?
Nyeem Vajluskub hauv peb lub xyoo: Khiavdim 25
Kênh Youtube BHKTHN:
