Klei Aê Diê Blŭ: Rôm 5:12-21
Êlan kliăng: “Snăn, kyua sa čô mnuih amâo gưt asăp ôh lu mnuih jing soh leh; msĕ snăn mơh kyua sa čô mnuih gưt asăp lu mnuih srăng mâo klei yap kpă” (Rôm 5:19)
Klei êmuh ksiêm mĭn: Ya knuih hjăn phung anak Y-Ađam leh anăn phung anak Yêsu Krist mâo? Ya jing bruă kơ klei bhiăn? Khua ƀĭng kna Y-Pôl brei ƀuh si klei pap Aê Diê kdlưn hĭn? Si ngă ih ngă mdjŏ?
Y-Ađam ngă soh gao asăp Aê Diê, ƀơ̆ng boh Aê Diê kăm hlăm war Êđen. Mơ̆ng anăn klei soh mŭt hlăm lăn ala, klei djiê truh kơ ñu pô leh anăn kơ jih jang mnuih (êlan 12). Y-Ađam jing msĕ si sa boh jar tuh mčah leh, leh anăn jih jang phung anak čô ñu tuh mơ̆ng jar anăn jing soh sơăi mơh. Jih jang mnuih khăp kơ klei ngă soh leh anăn ngă soh leh sơăi. Boh kơ klei soh jing klei djiê kơ asei mlei wăt mngăt, klei anei truh trĭp msĕ si klei Khua Yang hưn leh êlâo kơ anak mnuih lĕ hlăm klei soh (Klei Mphŭn Dơ̆ng 2:16-17̆; Rôm 5:14).
Aê Diê jing Pô doh jăk, kpă ênô leh anăn bŏ hŏng klei pap, Ñu mâo leh hdră kơ anak mnuih, hlăk anak mnuih lĕ hlăm klei soh mtam, êđai biăp amâo tuôm ngă soh ôh tŭ klei bi mdjiê, klĭt gơ̆ guôm klei lưng mlŭn Y-Ađam leh anăn H’Êwơ. Êđai biăp arăng bi mdjiê jing rup kơ Khua Yang Yêsu, Yang tal dua Aê Diê trŭn hriê leh ti lăn ala, tŭ klei djiê hrô kơ mnuih soh. Klei kpă ênô Khua Yang Yêsu guôm klei soh hlei pô mâo klei bi kkiêng mrâo hlăm Ñu (Y-Yôhan 3:3, 5-7). Jih jang phung jing anak Khua Yang Yêsu dưi mă tŭ klei pap, mâo klei yap kpă, lŏ mâo klei êđăp ênang hŏng Aê Diê leh anăn klei hdĭp mngăt lŏ dưi bi mrâo. Phung anak Aê Diê dưi thâo leh anăn mâo klei bi knal kơ klei anei hŏng klei hdĭp mrâo kyua klei myang Yang Mngăt Jăk dôk mă bruă hlăm grăp čô mnuih (êlan 16-17). Jih trăn Klei Aê Diê Blŭ anei Khua ƀĭng kna Y-Pôl kñăm knŏng kơ sa mta klei, anăn jing hlei anak čô srăng tui ba jih jang knuih leh anăn klei jing pô anăn (êlan 12, 15, 17-19, 21). Ñu hưn bi sĭt snei, klei bhiăn amâo dưi mâo klei bi mguôp ôh hlăm bruă klei soh mŭt leh hlăm lăn ala leh anăn klei djiê kiă kriê jih jang mnuih (êlan 13). Bruă djă pioh klei bhiăn amâo atăt mnuih kơ klei bi mtlaih ôh. Bruă kơ klei bhiăn jing kăp ktrâo klei soh mnuih ngă leh anăn boh jhat anak mnuih srăng mă tŭ kyua klei soh. Klei bhiăn bi êdah klă anak mnuih amâo dưi bi mtlaih mă diñu pô ôh, knŏng klei pap Êđai Biăp amâo mâo klei soh ôh arăng bi mdjiê leh hrô kơ klei soh anak mnuih yơh dưi bi mtlaih.
Tơdah knŏng hjăn Y-Ađam lĕ hlăm klei soh snăn jih jang mnuih ngă soh leh anăn djiê, kdlưn hĭn mơh klei pap Aê Diê bi êdah hlăm sa čô mnuih jing Yêsu Krist klam klei soh leh anăn brei klei hdĭp êbeh dlai kơ jih jang mnuih (êlan 15). Klei pap Aê Diê kdlưn hĭn kơ klei soh Y-Ađam. Bi mni bĕ kơ Khua Yang kyuadah hŏng klei đăo kơ Yêsu Krist, drei dưi mă tŭ klei hdĭp hlŏng lar (êlan 20-21).
Drei hdĭp djŏ tui si klei jing kơ sa čô mnuih jing anak Khua Yang leh mơ̆?
Wah lač: Ơ Khua Yang, lač jăk kơ Ih brei leh kơ kâo mâo klei lŏ bi kkiêng mrâo čiăng kơ kâo dưi mă tŭ jih jang klei Ih lui pioh. Đru kâo thâo săng klă, djă pioh kjăp boh yuôm leh anăn klei kñăm čiăng kơ sa čô mnuih jing anak Khua Yang Yêsu. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Kbiă 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
