II Kauleethaus 5:18-21
Nqe cim:
“Yog li ntawd peb thiaj ua Yexus Khetos cov tubtxib, piv ib yam li Vajtswv qiv peb qhovncauj ntuas nej. Yexus Khetos kom peb ntuas nej hais tias nej yuav tsum cia Vajtswv coj nej los nrog Vajtswv sib raug zoo.” (II Kauleethaus 5:20).
Lus nug rau sawvdaws xav:
– Cov ntseeg Yexus tau txais lub meejmom dabtsi?
– Vajtswv txib cov ntseeg ua dabtsi rau lub ntiajteb no?
– Peb Pawg Ntseeg thiab peb tabtom ua tes haujlwm tus Tswv txib zoo li cas?
Txij thaum tibneeg pojkoob yawgkoob uas yog Adas thiab Evas ua txhaum, Vajtswv chim rau tibneeg heev (Loos 1:18). Tiamsis vim txojkev hlub pub dawb, Tswv Yexus nqis los ntiajteb tuag txhiv tibneeg saum tus ntoo khaublig. Txij thaum ntawd los, cov neeg uas ntseeg Tswv Yexus nrog tau Vajtswv sib raug zoo (Loos 5:8-10), tau lub meejmom los ua Vajtswv cov menyuam thiab raug txib mus coj lwm tus los nrog Vajtswv sib raug zoo (nqe 18). Txij ntawd los, txhua tus ntseeg Tswv Yexus dhau los ua “Yexus cov tubtxib”. Tubtxib lossis tus tshaj qhia yog ib tug neeg sawvcev ntawm tus Tswv, hais tus Tswv tej lus, tau Nws xaiv thiab txib mus tshaj qhia txojlus uas hais txog Yexus Khetos txojkev thajyeeb, coj lwm tus los nrog Vajtswv sib raug zoo kom lawv tau lub meejmom ua Vajtswv cov menyuam zoo ib yam li peb. Tes haujlwm coj neeg los nrog tus Tswv sib raug zoo yog lub luag haujlwm uas tus Tswv txib cov ntseeg mus ntuas qhia kom neeg lees txim tig rov los nrog Vajtswv sib raug zoo. Qhov no yog tes haujlwm tseemceeb uas Vajtswv Pawg Ntseeg thiab tsheej tus ntseeg yuav tsum rau siab ntso ua txhua hnub.
Timthawj Paulus qhia paub, Vajtswv twb “muab” peb tej kev txhaum tso rau Yexus Khetos ris lawm. Txhais tau hais tias Tswv Yexus twb ris tagnrho peb tej kev txhaum thiab Nws them tus nqi uas peb tshuav kev txhaum nqi (Efexus 2:13-18). Vim li ntawd, peb tau ntxuav kom dawbhuv thiab tau suav tias dawbhuv tabmeeg Vajtswv lub xubntiag (nqe 21). Tseeb tiag qhov no yog ib lub meejmom loj heev muab pub rau peb. Yog li, cov uas twb txais yuav lub meejmom ces yuav tsis nyob ntsiag to tiamsis yuav tsum rau siab ntso qhia zaj uas tus Tswv ua rau yus.
Lub ntiajteb no cheemtsum zaub mov noj, ris tsho hnav kom pab tau sab nqaij tawv, tiamsis hais txog sab ntsujplig, lawv cheemtsum tau nrog Vajtswv sib raug zoo kom xwv tau lub neej kaj siab lug nyob mus ibtxhis saum ntuj ceebtsheej. Yog li ntawd, tes haujlwm coj neeg los nrog Vajtswv sib raug zoo tseemceeb heev, ib ke yog meejmom ib ke yog feem xyuam tus Tswv muab rau peb ua. Thaum zeem paub meej yam uas tus Tswv ua rau yus, peb thiaj kam qhia tshwm lub siab ua tsaug, txojkev hlub pub dawb uas tus Tswv pub rau peb. Dua li ntawd, thaum peb paub meej yus feem xyuam yog ib tug sawvcev ntawm tus Tswv, peb yuav tsis txajmuag tawm mus qhia Tswv Yexus zaj. Pawg Ntseeg thiab Vajtswv cov menyuam yuav tsum tas siab ua tes haujlwm coj neeg los cuag tus Tswv.
Thov Vajtswv,
Tus Tswv, thov qhia nyuam yaus niaj hnub zeem paub nyuam yaus yog tus sawvcev ntawm Koj, tawm mus qhia txojkev hlub uas hais txog Tswv Yexus Khetos tuag saum tus ntoo khaublig, coj neeg los nrog Vajtswv sib raug zoo. Amees.
Peb puas zeem paub meej yus tes haujlwm coj neeg los nrog Vajtswv sib raug zoo? Peb twb ua li cas lawm?
Nyeem Vajluskub hauv peb lub xyoo: Tes Haujlwm 16:16-40
Kênh Youtube BHKTHN:
