Pajlug 20:15
Nqe cim:
Yog koj paub hais tej lus uas zoo tseem zoo tshaj tej kub lossis tej hlaws muaj nqis (Pajlug 20:15)
Lus nug rau sawvdaws xav:
– Nqe pajlug no muab ob yam dabtsi los sib piv?
– Vim li cas lub qhovncauj uas hais tej lus zoo yog yam uas zoo tshaj?
– Koj thov tus Tswv siv koj lub qhovncauj uas hais lus zoo rau dabtsi?
Nqe pajlug no muab yam zoo tshaj thiab yam khoom muaj nqis los sib piv. Muaj kub thiab muaj tej hlaws yog yam zoo uas muaj nqis kawg, tiamsis lub ncauj uas hais tej lus zoo tseem yuav zoo tshaj tej kub thiab tej hlaws muaj nqis ntawd. Lo lus lub ncauj uas “paub hais lus tej zoo” lossis “tej lus uas koj hais yuav qhia tshwm koj yog tus muaj kev txawj ntse” (Pajlug 5:2). Vajntxwv Xalumoos siv lus pivtxwv los piv txog kev muaj nqis ntawm txoj kev txawjntse: “Lub tswvyim muaj nqis tshaj tej saw kub thiab tej uas koj ntshaw; txhua yam tsis muaj ib yam dabtsi yuav piv tau lub tswvyim ntawd li” (Pajlug 3:15).
Hauv kev ua neej, txhua tus puavleej saib kub thiab tej hlaws yog yam muaj nqis kawg li. Thaum ub los txog nimno kub thiab tej hlaws muaj nqis, sawv cev rau txoj kev npluanuj, kev vammeej rau tibneeg. Tiamsis Vajtswv Txojlus qhia hais tias, kev txawjntse tseem muaj nqis tshaj kub thiab tej hlaws muaj nqis (Pajlug 3:13-14; 8:10). Khoom qhov txhia chaw muaj nqis rau tiam no, vim yuav siv pab tau tus neeg txomnyem nyob dhau lub caij txomnyem, txawm li ntawd los tus uas tau txais txoj kev pab ntawd tsuas pab tau nws ib pliag xwb, tsis muaj leejtwg tau txais kev pab uas yuav ua rau tus ntawd npluanuj mus ibtxhis. Tsuas yog tus uas paub mloog raws li tus neeg txawjntse qhia thiaj yuav khiav dim txoj kev pluag txomnyem thiab yuav dhau los ua neeg npluanuj. Tsis tas li ntawd xwb, tej lus qhia txawjntse tsis yog pab kom tau tej khoom qhov txhia chaw tamsim no xwb, tiamsis tseem muaj nqis rau sab ntsujplig mus ntev loo thiab. Tej lus hais txawjntse yog tej lus uas phim tus yamntxwv zoo uas Vajtswv rhawv tsim, qhia tibneeg mus kom yog tus Tswv txoj kev, tej lus ntawd muaj nqis tshaj khoom qhov txhia chaw. Thiab qhov tseemceeb tshaj plaws yog yuav coj tau tibneeg mus txais txojsia ntev dhawv ibtxhis.
Tswv Yexus hais zaj lus pivtxwv txog tus ua luam uas tsis ntshai muab tas nrho nws lub cuabtam muag thiab mus yuav cov hlaws uas muaj nqis los ua nws tug (Mathais 13:45). Tswv Yexus qhia meej txog Ntuj Ceebtsheej thiab lub neej tau txojsia ibtxhis muaj nqis tshaj txhua yam khoom hauv ntiajteb, tibneeg yuavtsum tas siab siv zog nrhiav thiaj tau. Timthawj Paulus kuj qhia meej txog kev kawm Vajtswv Txojlus kom tau txais txoj kev txawjntse, thiab los ntawm txoj kev txawjntse zeem paub txog kev Cawmdim uas tus Tswv pub. Timthawj Paulus hais txog Timautes hais tias: “txij thaum koj tseem yau, koj yeej kawm Vajtswv Txojlus los lawm. Vajtswv Txojlus pab tau kom tus uas kawm muaj tswvyim; thiab yog nws los ntseeg Yexus Khetos, nws yuav dim nws lub txim” (II Timautes 3:15). Vim li ntawd, peb yog ib tus ntseeg cia li thov Vaj Ntsujplig pub kev txawjntse kom tau cawmdim thiab paub qhia lwm tus los txais kev cawmdim. Peb cheemtsum kawm Vajtswv Txojlus kom muaj kev txawjntse hauv Vajtswv thiab muab siab rau nrhiav yam uas nyob mus ibtxhis thiaj yog yam muaj nqis tshaj dua tej khoom qhov txhia chaw uas nyob ib pliag hauv ntiajteb no.
Thov Vajtswv
Vajtswv tus uas ncaj ncees, thov zam txim rau nyuam yaus vim ntau lub sijhawm nyuam yaus qaug rau khoom ntiajteb heev dua li nrhiav Koj. Thov pab nyuam yaus ua neej paub hwm Koj thiab siv tej lus hais txawjntse qhia txoj Moo Zoo rau lwm tus. Amees
Peb siv peb lub qhov ncauj li cas ntsigtxog Vajtswv txoj kev txawjntse thiab puas ua rau Vajtswv tau koobmeej?
Nyeem Vajluskub hauv peb lub xyoos: Yauhas 20:19-21:14
Kênh Youtube BHKTHN:
