Klei Aê Diê Blŭ: Klei Bi Hriêng 20:15
Êlan kliăng: “Mâo mah leh anăn djăp mta boh tâo yuôm, ƀiădah êlah thâo mĭn jing yuôm bhăn hĭn.” (Klei Bi Hriêng 20:15)
Klei êmuh ksiêm mĭn: Ya dua klei êlan Klei Bi Hriêng anei bi msĕ? Ya ngă êlah blŭ klei thâo mĭn jing yuôm bhăn hĭn? Ih akâo kơ Khua Yang yua êlah blŭ klei thâo mĭn hŏng ya klei kñăm čiăng?
Êlan Klei Bi Hriêng anei bi msĕ klei jăk hŏng klei jăk hĭn. Mâo mah jing yuôm, leh anăn mâo djăp mta boh tâo yuôm jing yuôm hĭn mơh. Ƀiădah êlah thâo mĭn jing yuôm bhăn hĭn kơ mah leh anăn boh tâo yuôm. Pruê̆ blŭ “êlah thâo mĭn” amâodah “kƀông ih djă pioh klei thâo săng” (Klei Bi Hriêng 5:2) lač kơ klei blŭ thâo mĭn. Mtao Y‑Salômôn yua klei bi hriêng čiăng bi êdah kơ boh yuôm klei thâo mĭn: “Ñu jing yuôm hĭn kơ boh tâo mngač, ñu jing yuôm hĭn kơ jih jang mnơ̆ng arăng čiăng mâo” (Klei Bi Hriêng 3:15).
Hlăm klei hdĭp, amâo mâo pô dưi lăm hĕ ôh kơ klei yuôm mah leh anăn boh tâo mngač. Mơ̆ng đưm hlŏng kơ ară anei mah leh anăn boh tâo yuôm bi hmô kơ klei čăt jing, mdrŏng sah hlăm dŏ ngăn. Ƀiădah Klei Aê Diê Blŭ lač klei thâo mĭn jing yuôm hĭn kơ mah leh anăn boh tâo yuôm (dlăng Klei Bi Hriêng 3:13-14; 8:10). Ngăn dŏ jing yuôm hlăm klei hdĭp anei kyuadah ñu dưi đru sa čô mnuih găn klei dleh dlan, ƀiădah lĕ pô mă tŭ klei đru hŏng mnơ̆ng dhơ̆ng anăn knŏng dưi msir mkra mă êjai mâo klei knap mñai đuč, kyuadah amâo mâo ôh pô mă tŭ klei đru mơ̆ng mnơ̆ng dhơ̆ng srăng jing mdrŏng nanao hlŏng lar. Knŏng hlei pô gưt kơ klei mnuih thâo mĭn kčĕ yơh srăng thâo si srăng ngă čiăng tlaih mơ̆ng klei ƀun ƀin leh anăn dưi jing mdrŏng sah. Kdlưn hĭn kơ anăn mơh, klei mtô hŏng klei thâo mĭn ba hriê amâo djŏ knŏng hjăn boh tŭ dưn hŏng mnơ̆ng dhơ̆ng êjai ară anei hin ôh ƀiădah ba hriê wăt boh tŭ dưn kơ ai tiê dôk nanao hlŏng lar mơh. Klei blŭ thâo mĭn jing klei blŭ guôp hŏng hnơ̆ng čuăn kpă ênuah Aê Diê pô mjing leh, atăt anak mnuih êbat djŏ hlăm êlan Aê Diê, klei blŭ anăn yuôm hĭn kơ djăp mta mnơ̆ng. Klei blŭ thâo mĭn amâo djŏ ba hriê knŏng klei mdrŏng sah, klei arăng mpŭ, klei êđăp ênang ôh ƀiădah yuôm bhăn hĭn jing ñu atăt ba anak mnuih truh kơ klei hdĭp hlŏng lar.
Hlăm klei Khua Yang Yêsu yăl dliê bi hriêng kơ sa čô êkei blei mnia añŭ, ñu čhĭ jih dŏ ngăn ñu mâo čiăng blei sa asăr añŭ yuôm (Y‑Mathiơ 13:45), Khua Yang kñăm kơ ênoh yuôm Ƀuôn ala mtao adiê amâodah klei hdĭp hlŏng lar hĭn kơ dŏ ngăn, anak mnuih srăng duah hŏng jih ai tiê leh anăn jih ai ktang kơh srăng mâo. Khua ƀĭng kna Y‑Pôl kñăm kơ klei hriăm Klei Aê Diê Blŭ čiăng dưi mă tŭ klei thâo mĭn, leh anăn hŏng klei thâo mĭn anăn thâo kral klei Khua Yang bi mtlaih: “leh anăn si ih thâo leh mơ̆ng hlăk hđeh klei čih doh jăk dưi bi hriăm ih kơ klei bi mtlaih hŏng klei đăo hlăm Krist Yêsu” (II Y‑Timôthê 3:15). Kyuanăn, phung đăo kơ Krist akâo bĕ kơ Yang Mngăt Jăk brei klei thâo mĭn čiăng mâo klei bi mtlaih leh anăn atăt lu mnuih nao kơ klei bi mtlaih msĕ mơh. Brei drei hriăm klei thâo mĭn Aê Diê hlăm Klei Ñu Blŭ leh anăn hung nao kơ klei jing mdrŏng hlăm anôk dôk hlŏng lar hĭn kơ tui duah dŏ ngăn yua bhiâo ti lăn ala anei.
Si ngă drei yua ƀăng êgei drei čiăng bi êdah klei thâo mĭn Aê Diê, pioh bi guh kơang kơ Anăn Ñu?
Wah lač: Ơ Aê Diê Pô Kpă Ênô, pap brei kơ kâo đa kyuadah mâo lu blư̆ kâo khăp kơ mnơ̆ng lăn ala anei hĭn kơ klei tui duah Ih. Đru kâo thâo huĭ mpŭ kơ Ih, leh anăn yua klei blŭ thâo mĭn hưn Klei Mrâo Mrang Jăk.
Dlăng Klei Aê Diê Blŭ hlăm tlâo thŭn: Y‑Yôhan 20:19-21:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
