Klei Aê Diê Blŭ: Klei Mphŭn Dơ̆ng 41:37-49
Êlan kliăng: “Arăng čiăng kơ phung kiă kriê brei diñu jing sĭt suôr.” (I Kôrantô 4:2)
Klei êmuh ksiêm mĭn: Si klei boh atăt Y‑Yôsep mơ̆ng sa čô mnă dưi jing sa čô khua prŏng kiă kriê čar Êjip? Ya jing klei knăl êdah êdi hlăm bruă Y‑Yôsep kiă kriê? Si ih dôk kiă kriê mta klei Aê Diê jao kơ ih?
Leh mblang klei Pharaôn êpei, Y‑Yôsep hưn mdah hdră kčĕ djŏ klă snăk čiăng đru lăn čar amâo srăng ram rai kyua klei ư̆ êpa (Klei Mphŭn Dơ̆ng 41:33-36). Mtao leh anăn phung dĭng buăl ñu mơak tŭ hdră anăn, kyuanăn, mtao čuăn ruah Y‑Yôsep jing khua prŏng kiă kriê jih ala čar Êjip kyuadah amâo mâo ôh pô mkăn thâo mĭn leh anăn knhâo hĭn kơ ñu, pô mâo mngăt myang Aê Diê dôk hlăm ñu. Snăn Y‑Yôsep hlăk mâo tlâo pluh thŭn, mơ̆ng sa čô mnă jing sa čô khua prŏng kiă kriê jih lăn čar, pô mâo klei dưi prŏng knŏng ti gŭ hĭn kơ mtao Êjip jing lăn čar ktang kjăp (êlan 46). Hŏng klei kiă kriê knhâo thâo mĭn leh anăn hur har sĭt suôr hlăm bruă jao kơ pô, Y‑Yôsep bi mơak mtao Pharaôn. Êjai kjuh thŭn trei bŏ, ñu mkăm pioh jih jang mnơ̆ng ƀơ̆ng huă hlăm tar čar (êlan 47-49). Kyuanăn, hlăk truh kjuh thŭn ư̆ êpa čar Êjip amâo mâo klei ư̆ êpa ôh ƀiădah êbeh dlai mnơ̆ng ƀơ̆ng huă.
Tơdah hriăm kơ klei hdĭp Y‑Yôsep, drei ƀuh klei bi knăl êdah êdi hlăm bruă ñu kiă kriê jing klei năng knang. Mơ̆ng hlăk ñu adôk mă bruă kơ sang khua Y‑Pôtipha, khua knang kơ ñu tơl jao jih ngăn drăp brei ñu kiă kriê (Klei Mphŭn Dơ̆ng 39:4-6). Hlăk arăng mčeh luar kơ ñu, êjai dôk hlăm war mnă ăt khua knang jao kơ ñu kiă phung mnă mơh (Klei Mphŭn Dơ̆ng 39:22-23). Ƀiădah lĕ, hlăm jih bruă ñu dưi ngă ñu thâo sĭt nik kbiă hriê mơ̆ng Aê Diê sơăi, amâo djŏ kyua klei thâo mĭn hjăn ñu pô ôh (Klei Mphŭn Dơ̆ng 40:8; 41:16). Leh anăn klă sĭt Khua Yang dôk mbĭt hŏng ñu hơêč hmưi kơ ñu nanao jih klei hdĭp ñu bŏ hŏng lu lĭn klei lông dlăng.
Y‑Yôsep bi êdah knuih năng knang ñu hlăm jih klei ñu găn, hlăm djăp anôk. Kyuanăn jih jang mnuih knang sơăi kơ ñu leh anăn čiăng jao kơ ñu bruă kiă kriê. Ñu kiă kriê jăk ngăn drăp hlăm anôk bruă ñu dôk ngă leh anăn lŏ bi mđĭ boh mnga kơ khua ñu. Anăn yơh jing klei bi knăl brei grăp čô phung đăo kơ Krist tui hriăm mă yua hlăm klei hdĭp pô. Bruă klam yuôm hĭn kơ pô djă bruă kiă kriê jing klei sĭt suôr hŏng khua pô leh anăn ngă jăk jih jang bruă khua jao. Leh anăn knuih pô kiă kriê sĭt suôr brei bi mâo jing klei năng knang. Grăp čô drei jing pô kiă kriê kơ Khua Yang, dôk kiă kriê jih jang mta klei Khua Yang jao: klei pap, klei brei, klei thâo, prăk kăk, ngăn drăp. Brei drei hdơr, jih jang amâo djŏ dŏ drei ôh, drei knŏng jing pô dôk “răng pioh” leh anăn “kiă kriê” jih klei anăn. Bruă klam kơ drei brei kiă kriê bi jăk leh anăn lŏ bi mđĭ hĭn kơ khua drei. Phung đăo kơ Krist jing pô kiă kriê năng knang kơ Khua Yang, čiăng kơ Khua Yang ăt knang nanao leh anăn jao bruă yuôm kơ sa čô pô kiă kriê.
Si ngă drei jing pô kiă kriê năng knang kơ Khua Yang mơ̆?
Wah lač: Ơ Khua Yang, akâo Ih đru kâo dưi jing pô kiă kriê năng knang, đru kơ phung hlăm sang kâo ngă bi jăk bruă klam Khua Yang jao, čiăng kơ hŏng klei hdĭp gŏ sang kâo, arăng dưi thâo kral Anăn Khua Yang.
Dlăng Klei Aê Diê Blŭ hlăm tlâo thŭn: Y‑Yôhan 18:1-24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
