Pajlug 20:1
1 Haus cawv ntau ua rau koj vwm thiab qw lom vab vab.
Tsuas yog tus neeg ruam thiaj quav cawv xwb.
Lus nug rau sawvdaws xav:
– Cawv ua rau tus neeg haus vwm thiab qw lom vab vab licas?
– Vim licas tus neeg quav cawv yog neeg ruam?
– Peb tau qhuab ntuas licas txog kev haus cawv, npias?
Vajntxwv Xalumoos qhia hais tias tus neeg quav cawv yog neeg ruam. Cawv thiab dej puavleej yog kua dej, tiamsis dej pab daws kev nqhis, tshuav cawv haus ua kom qaug. Qhov teebmeem rau tus neeg quav cawv yog “vwm”, “qw lom vab vab” thiab “yog tus neeg ruam”.
“Haus cawv ntau ua rau koj vwm”. Vim cawv yog yam haus ua kom qaug, tus neeg quav cawv thiaj piam hlwb, tsis tswj tau tus kheej tej lus hais, vim li ntawd nws thiaj thuam, cem, ua rau sawvdaws ntxhov siab. Tsis tas li ntawd xwb, tus neeg quav cawv yuav dhau mus nqhis cawv, yees cawv thiab ua qhev rau cawv. Tus cevlus Yaxayas sau hais tias: “Nej yuav puastsuaj lauj! Nej sawv thaum tsis tau kaj ntug los pib haus cawv thiab nyob tsheej tag hmo haus cawv kom nej qaug!” (Yaxayas 5:11). Tus neeg quav cawv lub neej tsis tsimtxiaj, tswj tsis tau tus kheej. Cawv tsuas yog ib yam siv los haus, tiamsis vim siv tsis muaj nqis tibneeg thiaj ua qhev rau cawv. Hloov ib tug neeg ywjpheej dhau mus ua ib tug neeg ua qhev rau cawv, cia cawv tswjkav lub neej.
Cawv ua rau “qw lom vab vab”, txhais hais tias hais lus nrov thiab sib cav sib ceg. Cawv ua rau tibneeg xav tias tus kheej muaj zog, muaj tswvyim, yog li ntawd yoojyim ua rau muaj kev sib cav, nthe nrov, tswj tsis taus tus kheej thiaj hais tej lus thuam lwm tus, ua tej yam tsis tsimnyog. Tus neeg qaug cawv feeb tsis meej, tswj tsis tau tus kheej, thiab thaum vwm cawv, lawv ua dhau tus ciam ntawm kev txaus hwm, kev ua zoo thiab kev ua ncajncees. Tes haujlwm ntawm tus neeg qaug cawv qhia tshwm nws kev ruam. Luag pheej hais tias “Haus cawv, lus tawm”, vim tsis muaj ib lub sijhawm twg luag yuav hais lus ntau npaum li thaum nrog cov phoojywg haus cawv zaum noj haus ua ke. Txawm yog cov neeg ib txwm txuag lus, xyuam xim txhua lo lus, los thaum muaj cawv hauv plab lawm ces kuj tham saum ntuj pem teb tsis paub xaus, tej zaug tseem hais tawm tej lus tsis zoo, tsis tsimnyog.
Coob tug ntseeg hais tias Vajtswv tsis txwv haus cawv, npias, tsuas txwv tsis pub qaug xwb. Tiamsis qhov tseemceeb yog haus npias, cawv ua dabtsi? Haus kom daws tus kheej kev ntshaw, los yog haus kom zoo tej phoojywg siab? Timthawj Paulus qhia hais tias: “Peb yuav tsum ua peb lub neej kom tsimnyog qhov uas peb yog neeg nruab hnub, tsis txhob qw ua nqaj ua nqug thiab haus cawv qaug, tsis txhob ua nkauj ua nraug thiab ua neeg tsis paub cai, tsis txhob sib cav sib ceg thiab sib khib. Tiamsis peb yuav tsum muab tus Tswv Yexus Khetos tej cuabyeej los tuav; thiab tsis txhob quav ntsej tej kev phem kev qias uas nej lub siab nyiam ua” (Loos 13:13-14). Tus ntseeg yuav tsum nyob hauv Vajtswv Txojlus qhov kaj, yuav tsum tswj tus kheej, txhob qaug rau sab nqaij tawv ua raws tus kheej kev ntshaw mus ua neeg ruam. Tus Tswv xav kom peb txuag tus kheej, ua neej rau tus Tswv tau koob meej thiaj yuav ua tau qauv zoo rau tej kwv tij nkauj muam, tej menyuam thiab cov uas tsis tau ntseeg Tswv Yexus xyaum.
Thov Vajtswv,
Tus Tswv, thov pub rau nyuam yaus muaj tswvyim kom qaij deb kev haus cawv, npias. Thov pab nyuam yaus ua tau qauv zoo rau Pawg Ntseeg, lub cuabyig thiab lub zej lub zos. Amees.
Peb puas cia cawv, npias ua rau peb lub neej ntsib teebmeem?
Nyeem Vajluskub hauv peb lub xyoo: Hakais 2
Kênh Youtube BHKTHN:
