Klei Aê Diê Blŭ: Y‑Markôs 15:1-15
Êlan kliăng: “Snăn kyua Aê Pilat čiăng bi mơak kơ phung lu anăn, ñu pŏk Y‑Barabas kơ diñu. Leh ñu brei arăng čăm Yêsu hŏng giê, ñu jao Yêsu brei phung kahan pơ̆ng ti kyâo bi kal.” (Y‑Markôs 15:15)
Klei êmuh ksiêm mĭn: Si klei Aê Pilat blŭ kđi kơ Khua Yang Yêsu? Ya ngă thâo dưn mơh Khua Yang Yêsu amâo mâo klei soh ôh ƀiădah ti knhal tuč Aê Pilat ăt phat kđi Ñu mơh? Tui si diih, si ngă Khua Yang Yêsu tŭ klei phat kđi msĕ snăn?
Hlăm Knăm Tŭ Klei Knap Mñai, drei mâo klei iêu mthưr brei hdơr mĭn kơ êlan knap mñai Khua Yang Yêsu tŭ. Hlăm klei bhiăn Phung Sang Aê Diê pia êlan anei jing Via Dolorosa bi klin jih jang mâo 14 knhuang, ƀiădah knhuang tal êlâo hĭn ti sang Pilat blŭ kđi, anôk Khua Yang Yêsu tŭ klei phat kđi.
Anei jing klei blŭ kđi mdê hĭn kyuadah mâo lu klei blŭ kčŭt, ƀiădah amâo mâo klei blŭ mgang ôh, bi pô blŭ kđi duah êlan čiăng dêč kơ bruă klam ñu. Klei čih hlăm hră klei mrâo mrang jăk Y‑Markôs 15 brei ƀuh wăt tơdah “phung knơ̆ng khua ngă yang kčŭt kơ Yêsu lu mta klei” (êlan 3) ƀiădah “Yêsu amâo lŏ wĭt lač ôh. Snăn Aê Pilat bi kngăr” (êlan 5). Aê Pilat pô thâo klă mnuih mâo anăn iêu Yêsu anei amâo mâo klei soh ôh, “ñu thâo leh kơ phung knơ̆ng khua ngă yang jao Yêsu leh kyua klei nač” (êlan 10).
Hlăm lam ai tiê, Aê Pilat čiăng phưi Khua Yang Yêsu snăn ñu brei phung ƀuôn sang ruah sa čô mnă dưi pŏk hlăm Knăm Ƀơ̆ng Klei Găn, Khua Yang Yêsu amâodah Y‑Barabas, sa čô mnuih soh mâo kđi kjham snăk. Aê Pilat mĭndah phung ƀuôn sang ruah pŏk phưi Khua Yang Yêsu yơh. Dưi lač klei Aê Pilat ngă anei čiăng gĭr đăm phat kđi soh ôh. Ƀiădah ti anăp klei kpĭ ktư̆ mơ̆ng phung lu mâo klei kčŭt mčhur snăn Aê Pilat lŏ kdŭn hĕ. Boh tŭ “Aê Pilat čiăng bi mơak kơ phung lu anăn, ñu pŏk Y‑Barabas kơ diñu. Leh anăn brei arăng čăm Yêsu hŏng giê, ñu jao Yêsu brei phung kahan pơ̆ng ti kyâo bi kal” (êlan 15). Aê Pilat amâo čiăng bi prŏng klei ôh, boh nik nak tơdah mâo hĕ pô hưn mthâo ñu čuăn pŏk kơ mnuih pia kơ ñu pô jing “mtao phung Yuđa” snăn arăng srăng mdưm kơ ñu klei soh amâo sĭt suôr hŏng Sêsar ôh (Y‑Yôhan 19:12). Hrô kơ ruah klei sĭt kpă, Aê Pilat ruah êlan čiăng bi mơak kơ phung lu, čiăng bi kjăp kơ anôk bruă ñu pô, snăn ñu phat kđi Khua Yang Yêsu.
Êjai dôk ksiêm mĭn kơ Knăm Bi Hdơr Kơ Klei Khua Yang Yêsu Tŭ Klei Knap Mñai, drei mâo klei iêô mthưr mŭt hlăm anôk Pilat phat kđi čiăng ƀuh Khua Yang Yêsu – “Krist amâo tuôm mâo klei soh ôh, ƀiădah Aê Diê mjing Gơ̆ soh kyua drei” (II Kôrantô 5:21). Bruă klam phung khua ngă yang, Aê Pilat amâodah pô soh mâo kđi kjham Y‑Barabas hlăm anôk blŭ kđi anei knŏng čiăng lŏ bi êdah hĭn sa klei sĭt nik: Khua Yang Yêsu amâo tŭ klei knap mñai kyua Ñu pô ôh, ƀiădah Ñu tŭ klei knap mñai kyua jih jang mnuih. Khua Yang tŭ klei phat kđi kyua phung knơ̆ng djă bruă klei đăo Yuđa jhat ƀai bŏ hŏng mnêč, kyua Pilat, sa čô khua djă bruă kđi čar knŏng uêñ mĭn kơ ñu pô hrô kơ dŏng mgang klei sĭt kpă, kyua sa čô mnuih jhat ƀai msĕ si Y‑Barabas dưi hdĭp. Leh anăn Khua Yang Yêsu tŭ klam ba kđi anăn kyua kơ grăp čô drei!
Tơdah thâo săng Khua Yang Yêsu tŭ klei phat kđi kyua drei, ya mta klei diih čiăng hưn mdah hŏng Khua Yang?
Wah lač: Bi mni kơ Khua Yang Yêsu tŭ leh klei bi kmhal hrô brei kơ kâo. Kyua klei soh kâo yơh ngă kơ Pô amâo tuôm thâo klei soh ôh ƀiădah tŭ klam brei jih jang klei soh ti dlông asei mlei Ih pô. Akâo kơ Khua Yang brei kâo ktur kđăm klei pap Khua Yang, čuăn dôk hdĭp dưi hĭn, mâo boh tŭ dưn kơ Ih
Dlăng Klei Aê Diê Blŭ hlăm tlâo thŭn: Y‑Mika 5:10-6:16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
