Malakaus 15:1-15
Nqe cim:
“Philaj xav ua kom haum cov pejxeem sawvdaws siab, nws thiaj tso Npalanpas rau lawv. Tom qab ntawd nws kom luag muab Yexus nplawm thiab coj Yexus mus ntsia rau saum ntoo khaublig” (Malakaus 15:15).
Lus nug rau sawvdaws xav:
– Tswvxeev Philaj Lub Rooj Txiav Txim rau Tswv Yexus tshwm muaj licas?
– Vim licas txawm paub tseeb hais tias Tswv Yexus tsis muaj txim tiamsis thaum kawg Philaj tseem teem txim rau Tswv Yexus ?
– Raws li nej xav, vim licas Tswv Yexus raug teem txim li ntawd?
Nyob rau sijhawm ua Koobtsheej Nco Txog Yexus Raug Txomnyem, peb tau nqua hu los xav txog ncua kev Tswv Yexus raug txomnyem. Raws li Pawg Ntseeg ibtxwm coj, ncua kev no hu ua Via Dolorosa tagnrho muaj 14 ncua kev, thawj ncua yog pib ntawm Philaj Lub Rooj Txiav Txim, qhov chaw Tswv Yexus raug teem txim.
Ntawm no yog ib rooj txiav txim txawv heev vim tej lus nkaug muaj ntau, lus daws tsis muaj, tus txiav txim nrhiav kev tso tes. Tej lus sau hauv Phau Malakaus 15 qhia pom hais tias, txawm yog “cov thawj ntawm cov povthawj hais ntau zaj nkaug Yexus” (nqe 3) los “Yexus tsis teb ib los li thiab, ua rau Philaj xav tsis thoob li” (nqe 5). Tus tswvxeev Philaj yeej paub tseeb tias tus txivneej npe hu Yexus no yeej tsis muaj txim, Vajluskub qhia hais tias: “Philaj yeej paub tseeb hais tias cov thawj ntawm cov povthawj khib, lawv thiaj ntes Yexus coj tuaj rau nws” (nqe 10).
Nyob hauv nruab siab, Philaj xav tso Tswv Yexus, nws thiaj muab ob txojkev xaiv rau cov pejxeem thaum tso dim ib tug neeg txhaum rau lub caij Ua Kevcai Hla Dhau, saib lawv yuav xaiv Tswv Yexus, lossis xaiv Npalanpas, tus uas raug txim tua neeg. Tej zaum Philaj xav hais tias cov pejxeem yuav xaiv tso Tswv Yexus. Hais tau hais tias ntawm no yog yam uas Philaj ua kom tsis teem txim yuamkev. Tiamsis thaum cov pejxeem qw ntshoo nrooj ces Philaj txawm ntshai. Thaum kawg “Philaj xav ua kom haum cov pejxeem sawvdaws siab, nws thiaj tso Npalanpas rau lawv. Tom qab ntawd nws kom luag muab Yexus nplawm thiab coj Yexus mus ntsia rau saum ntoo khaublig” (nqe 15). Tswvxeev Philaj tsis xav ua kom zaj no nrov, rau qhov yog muaj neeg mus nkaug hais tias nws tso tus neeg tau hu hais tias “cov Yudais tus vajntxwv” dim, ces nws yuav raug lub txim tsis muab siab npuab huabtais Xixas (Yauhas 19:12). Tsimnyog xaiv kev ncajncees, tiamsis Philaj ho xaiv kev ua haum cov pejxeem lub siab kom nws tau ua nom ua tswv, yog li ntawd nws thiaj teem txim rau Tswv Yexus.
Thaum xav txog Koob Tsheej Nco Txog Tswv Yexus Raug Txomnyem, peb tau caw mus koom Philaj Lub Rooj Txiav Txim kom pom Tswv Yexus – Tus uas “ibtxwm tsis muaj txim, tiamsis Vajtswv muab peb lub txim rau nws ris” (II Kauleethaus 5:21). Cov thawj ntawm cov povthawj, tswvxeev Philaj lossis tus neeg tua neeg Npalanpas zaj uas nyob hauv lub rooj txiav txim no tsuas ua qhia tshwm ib qhov tseeb: ntawd yog Tswv Yexus tsis raug txomnyem vim Nws tus kheej. Nws raug txomnyem vim txhua tus tibneeg. Tswv Yexus raug teem txim tuag vim cov Yudais tej thawjcoj lub tswvyim phem, vim Philaj ntshaw meejmom ua nom ua tswv thiaj tsis ua qhov ncaj, vim xav kom tus neeg txhaum zoo li Npalanpas tau txojsia. Thiab Tswv Yexus kuj txaus siab ris lub txim ntawd vim peb!
Thov Vajtswv,
Tswv Yexus, nyuam yaus ua Koj tsaug vim Koj pab ris lub txim uas tsimnyog nyuam yaus raug. Twb yog nyuam yaus tej kev txhaum thiaj ua rau Tus uas ibtxwm tsis muaj txim raug ris nyuam yaus lub txim. Thov pab nyuam yaus cim nco Koj tej txiaj ntsig, txiav txim siab ua lubneej muaj yeej, muaj nqis rau Koj. Amees.
Thaum zeem paub tias Tswv Yexus raug txim vim peb tus kheej lawm, peb xav hais dabtsi rau Tswv Yexus?
Nyeem Vajluskub hauv peb lub xyoo: Mikhas 5:10-6:16
Kênh Youtube BHKTHN:
