Efexus 4:11-13
Nqe cim:
“Nws qhia kom cov ntseeg paub ua Vajtswv tes haujlwm; cov ntseeg uas yog Yexus Khetos lub cev thiaj li yuav txawj loj hlob zuj zus. Mus txog thaum peb sawvdaws ua tau ib lub siab, ntseeg ib yam nkaus, paub tseeb Vajtswv tus Tub…” (Efexus 4:12-13a)
Lus nug rau sawvdaws xav:
- Thawj ob lub homphiaj ua haujlwm muaj kev sib txawv yog dabtsi?
- Tom qab uas ntseeg tus Tswv, nws cheemtsum ua dabtsi kom muaj qhov kev koom siab hauv txojkev ntseeg thiab kev paub tus Tswv?
- Raws li tus Tswv tej lus qhia, peb yuav tsum npaj rau lub neej ntseeg Yexus zoo li cas?
Vajtswv cawm, Nws tsa muaj Pawg Ntseeg rau Vajtswv cov menyuam pehawm Nws, txhim kho kev ntseeg thiab qhia Txojmoo Zoo cawm neeg ntiajteb. Cia kom Pawg Ntseeg yim hnub yim muaj zog, tus Tswv thiaj pub rau qee tus los ua timthawj, cevlus, qhia Txojmoo Zoo, xibhwb thiab ua cov qhia. Lub homphiaj yog ua haujlwm thiab txhim tsa Yexus Khetos lub cev (nqe 11-12). Timthawj Paulus hais txog thawj ob lub homphiaj ua haujlwm muaj kev sib txawv yog cia kom “cov ntseeg uas yog Yexus Khetos lub cev thiaj li yuav txawj loj hlob zuj zus. Mus txog thaum peb sawvdaws ua tau ib lub siab, ntseeg ib yam nkaus, paub tseeb Vajtswv tus Tub.”
Tim ib, txhim tsa txojkev koom siab hauv txojkev ntseeg. Cia kom Pawg Ntseeg muaj kev koom siab hauv txojkev ntseeg ntsig txog Tswv Yexus thiab tej yam tseemceeb ntawm txojkev ntseeg Yexus Khetos, ces txhua tus ntseeg yuav tsum tau kawm paub qhov tseeb ntawm txojkev ntseeg tus Tswv. Tim ob, txhim tsa Pawg Ntseeg koom siab hauv kev paub Vajtswv Leej Tub. Dua li qhov kev koom siab hauv txojkev ntseeg thiab lub neej sib hlub. Pawg Ntseeg cheemtsum kawm paub meej Tswv Yexus Khetos, kom tus Tswv cov menyuam koom siab tau ua ke hauv txojkev paub Nws meej thiab tseeb. Hais ua lwm seem lus, txhua tus ntseeg Yexus tsis yog ntseeg tus Tswv ces tau lawm, tiamsis hauv lub neej nrog tus Tswv mus, yuav tsum niaj hnub npaj thiab yus tus kheej xyaum ua lub neej li tus ntseeg Yexus mus txog thaum txojkev ntseeg ruaj khov thiab paub Vajtswv tus Tub puv ntoob. Nqe lus “mus txog thaum” hais txog qhov kev xyaum ua tus ntseeg Yexus ntawm peb tsis yog ua tau tam sim, tiamsis yog ib ntu sijhawm xyaum ntev loo mam tiav lub homphiaj.
Yog li ntawd, koom siab hauv txojkev ntseeg thiab paub qhov tseeb ntawm Vajtswv Txojlus yog Vajtswv lub siab nyiam, vim qhov no yog lub chaw txawb rau kev ua tus ntseeg Yexus ntawm Vajtswv cov menyuam, thiab kuj yog lub chaw txawb ua kom sab ntsujplig loj hlob. Cia kom ua tau raws li tus Tswv tej lus qhia, tsis muaj dua lwm txoj hau kev, peb yuav tsum qee zias sijhawm los kawm Vajtswv Txojlus thiab nrog tus Tswv sib raug zoo txhua hnub. Tsuas yog Vajtswv Txojlus xwb thiaj pab tau peb tsis mus yuam kev hauv lub neej ua tus ntseeg, peb thiaj ua tau ntsev las neeg ntiajteb, thiab yog qhov kaj ua rau neeg ntiajteb pom kev.
Thov Vajtswv,
Tus Tswv, nyuam yaus ua Koj tsaug vim Koj pub rau nyuam yaus muaj Pawg Ntseeg los txhim kho txojkev ntseeg thiab ua Koj tes haujlwm. Thov Koj pub rau nyuam yaus tau koom tes txhim kho kev koom siab hauv txojkev ntseeg thiab paub Vajtswv Koj tus Tub. Amees.
Peb puas kawm Vajtswv Txojlus thiab muaj kev sib raug zoo nrog tus Tswv txhua hnub?
Nyeem Vajluskub hauv peb lub xyoo: Daniyees 4:1-27
Kênh Youtube BHKTHN:
