Klei Aê Diê Blŭ: Êphêsô 4:11‑13
Êlan kliăng: “Čiăng mprăp phung doh jăk mâo klei dưi mă bruă kơ Aê Diê, čiăng đru asei mlei Krist hriê kơ prŏng, tơl jih jang drei truh kơ sa klei đăo msĕ, leh anăn kơ klei thâo kral Anak Aê Diê, …” (Êphêsô 4:12‑13a)
Klei êmuh ksiêm mĭn: Ya jing dua mta kñăm tal êlâo klei pap Aê Diê brei kơ bruă mă mdê mdê? Leh đăo kơ Aê Diê, ya klei brei phung đăo ngă čiăng mâo klei bi mguôp sa hlăm klei đăo leh anăn hlăm klei thâo kral Khua Yang? Kna kơ klei Khua Yang mtô, si klei brei drei duh kơ knhuah hdĭp phung đăo?
Aê Diê bi mtlaih leh drei, mbĭt hŏng klei mkŏ mdơ̆ng Phung Sang Aê Diê čiăng kơ phung anak ƀuôn sang Aê Diê mđrăm mbĭt kkuh mpŭ kơ Ñu, đru bi rŭ mdơ̆ng klei đăo hdơ̆ng pô leh anăn hiu hưn Klei Mrâo Mrang Jăk bi mtlaih kơ phung ƀuôn sang. Čiăng kơ Phung Sang Aê Diê ƀrư̆ hruê jing kjăp ktang hĭn, Khua Yang brei klei pap kơ đa đa mnuih jing phung khua ƀĭng kna, đa đa jing phung khua pô hưn êlâo, đa đa jing phung hiu mtô Klei Mrâo Mrang Jăk, đa đa jing phung khua pô mtô leh anăn phung bi hriăm kñăm čiăng mă bruă leh anăn rŭ mdơ̆ng jih jang kdrêč hlăm asei mlei jing Phung Sang Aê Diê kơ Khua Yang (êlan 11‑12). Khua ƀĭng kna Y‑Pôl hưn mdah dua mta klei kñăm tal êlâo hĭn klei brei kơ bruă mă mdê mdê jing pioh “čiăng đru asei mlei Krist hriê kơ prŏng, tơl jih jang drei truh kơ sa klei đăo msĕ, leh anăn kơ klei thâo kral Anak Aê Diê”
Tal sa, rŭ mdơ̆ng klei bi mguôp sa hlăm klei đăo. Čiăng kơ Phung Sang Aê Diê mâo klei bi mguôp sa hlăm tur klei đăo kơ Khua Yang Yêsu leh anăn kơ tur klei thâo kral Yang Krist snăn brei grăp čô phung đăo mâo klei mtô bi hriăm djŏ kơ tur klei đăo kơ Khua Yang. Tal dua, rŭ mdơ̆ng Phung Sang Aê Diê bi mguôp sa hlăm klei thâo kral Anak Aê Diê. Êngao kơ klei bi mguôp sa hlăm klei đăo leh anăn knhuah dôk hdĭp thâo bi khăp, brei Phung Sang Aê Diê mâo klei mtô bi hriăm djăp ênŭm kơ Khua Yang Yêsu Pô Bi Mtlaih, čiăng kơ phung anak ƀuôn sang Aê Diê bi mguôp sa hdơ̆ng pô hlăm klei thâo kral Khua Yang klă sĭt. Blŭ mdê, grăp čô phung đăo amâo djŏ knŏng đăo kơ Khua Yang jing djăp leh ôh, ƀiădah hlăm hruê mlan êbat mbĭt hŏng Khua Yang, brei duh leh anăn hriăm mjuăt knhuah hdĭp phung đăo kơ pô nanao tơl kơ klei đăo dưi jing kjăp leh anăn klei thâo kral Anak Aê Diê dưi jing kluôm ênŭm. Boh blŭ “tơl jih jang drei truh” čiăng lač kơ ai tiê klei mĭn hriăm mjuăt knhuah hdĭp phung đăo drei amâo djŏ knŏng bhiâo dưi djăp ênŭm leh ôh, ƀiădah jing sa knhuang sui dlông hriăm mjuăt nanao tơl truh kơ anôk bi kčah.
Snăn, bi mguôp sa hlăm klei đăo leh anăn thâo kral djŏ klă klei sĭt nik Klei Aê Diê Blŭ jing klei Aê Diê čiăng, kyuadah klei anăn yơh jing tur knhuah hdĭp phung đăo kơ phung anak ƀuôn sang Aê Diê leh anăn wăt jing tur čiăng kơ klei hdĭp mngăt đĭ hriê kơ prŏng mơh. Čiăng dưi ngă tui si klei Khua Yang mtô, amâo lŏ mâo êlan mkăn ôh, brei drei pioh êlâo hĭn mmông ksiêm hriăm Klei Aê Diê Blŭ leh anăn djă pioh klei bi mguôp hŏng Khua Yang grăp hruê. Knŏng hŏng Klei Aê Diê Blŭ yơh dưi đru drei amâo weh đuĕ ôh mơ̆ng knhuah hdĭp phung đăo čiăng dưi jing hra kơ lăn, klei mngač kơ lăn ala.
Si ngă drei ksiêm hriăm Klei Aê Diê Blŭ leh anăn bi mguôp hŏng Khua Yang nanao grăp hruê mơ̆?
Wah lač: Ơ Khua Yang, bi mni kơ Ih brei kơ kâo Phung Sang Aê Diê čiăng rŭ mdơ̆ng klei đăo leh anăn mă bruă kơ Khua Yang. Akâo Khua Yang brei kâo mguôp kdrêč bi rŭ mdơ̆ng hdơ̆ng pô, čiăng kơ jih jang mâo klei bi mguôp sa hlăm klei đăo leh anăn hlăm klei thâo kral Khua Yang kdlưn hĭn grăp hruê.
Dlăng Klei Aê Diê Blŭ hlăm tlâo thŭn: Y‑Đaniel 4:1‑27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
