Klei Aê Diê Blŭ: Klei Kbiă 34:10-11
Êlan kliăng: “Ñu lač, “Nĕ anei Kâo ngă sa klei bi mguôp: Kâo srăng ngă ti anăp jih jang phung ƀuôn sang ih bruă yuôm bhăn, arăng amâo tuôm ngă ôh hlăm lăn ala amâodah hlăm sa găp djuê; jih jang phung ƀuôn sang dôk jŭm dar ih srăng ƀuh bruă Yêhôwa; kyuadah hŏng ih yơh Kâo srăng ngă bruă bi huĭ.” (Klei Kbiă 34:10)
Klei êmuh ksiêm mĭn: Ya klei drei thâo kơ Aê Diê mơ̆ng bruă Ñu lŏ bi mrâo klei bi mguôp hŏng phung ƀuôn sang Israel? Aê Diê ƀuăn ya Ñu srăng ngă? Si ngă čiăng kơ phung ƀuôn sang thâo răng kơ klei Aê Diê mtă? Ya klei hriăm hruê anei mñă kơ diih?
Hlăk phung ƀuôn sang Aê Diê kkuh kơ rup êđai êmô mah, Aê Diê đĭ ai ngêñ čiăng bi rai jih jang knŏng lui hjăn sang Y‑Môis. Ƀiădah Aê Diê hmư̆ klei Y‑Môis wah lač, amâo bi mdjiê ôh phung Israel, khădah snăn Ñu srăng amâo hrăm mbĭt ôh hŏng diñu hlăm hdră nao mŭt hlăm Lăn Ƀuăn. Hlăk phung ƀuôn sang Israel jih ai tiê kmhal kơ klei soh pô kkuh kơ rup yang leh anăn hŏng klei khua gĭt gai Y‑Môis wah lač jih ai tiê, Aê Diê ƀuăn srăng nao mbĭt hŏng diñu nao mă krĭng Kanaan. Aê Diê čiăng lŏ bi mrâo klei bi mguôp hŏng diñu. Wăt tơdah phung ƀuôn sang thâo leh lu klei myang hlăm hdră kbiă mơ̆ng čar Êjip, ară anei diñu srăng thâo kral Aê Diê mâo lu klei yuôm bhăn hĭn mơh. Aê Diê ƀuăn srăng bi blah kơ diñu, suôt phung Amôrit, phung Kanaan, phung Hitit, phung Pêrisit, phung Hiwit, leh anăn phung Jêbusit (êlan 11). Hlăk Aê Diê pap brei klei soh phung ƀuôn sang Israel, Ñu amâo lŏ hdơr ôh kơ klei soh diñu ƀiădah lŏ brei kơ diñu sa êdei anăp jăk siam hĭn. Sĭt đăo kơ Khua Yang Yêsu jing Pô Bi Mtlaih drei, drei mâo klei êđăp ênang sĭt kyua ñu lăm brei jih klei soh drei hlăm thŭn mlan êgao leh anăn brei kơ drei mâo sa klei hdĭp mrâo, sa klei mphŭn mrâo kluôm ênŭm hlăm Ñu.
Phung ƀuôn sang Êjip mgei ai tiê leh anăn huĭ hyưt ti anăp pluh klei truh mơ̆ng Yêhôwa Aê Diê phung Israel tuh kơ diñu. Phung ƀuôn sang ti krĭng Kanaan srăng huĭ hĭn mơh sĭt Aê Diê bi kmhal, kyuadah klei soh diñu kjham đei, leh anăn Aê Diê srăng mă krĭng lăn diñu kơ phung ƀuôn sang Aê Diê (dlăng thiăm hlăm Klei Mphŭn Dơ̆ng 15:12-21). Djăp djuê ana srăng ƀuh Aê Diê pô myang hĭn leh anăn prŏng snăk. Amâo mâo ôh ya klei Ñu amâo dưi ngă. Aê Diê dôk kiă kriê hƀuê ênuk, phat kđi kpă ênô kơ grăp čô mnuih ƀuôn sang ti lăn leh anăn Ñu ngă bruă hlue si wưng Ñu kčah.
Hlăm klei bi mguôp mrâo anei, phung ƀuôn sang Israel brei răng kriê klei bi mguôp mơ̆ng diñu (êlan 11a). Y‑Môis srăng lŏ čih djăp klei Aê Diê mtô, klei bhiăn Ñu brei dưi mtô bi hriăm kơ phung ƀuôn sang (dlăng hlăm Klei Kbiă 34:27). Phung ƀuôn sang Aê Diê brei thâo răng mđing hmư̆, hdơr leh anăn hlue ngă djăp klei Aê Diê mtô. Grăp čô dưi bi tui kyua klei đăo, brei lŏ dơ̆ng êbat hlăm klei đăo, đăo kjăp hlăm Klei Aê Diê Blŭ, hdĭp jưh knang hlăm Aê Diê leh anăn gưt kơ Ñu kluôm hduôm.
Drei khăng dlăng leh anăn hriăm Klei Aê Diê Blŭ grăp hruê mơ̆?
Wal lač: Ơ Aê Diê pô khăp leh anăn kpă ênô! Bi mni kơ Aê Diê kơ klei khăp leh anăn hdră jăk Ih brei kơ kâo! Akâo kơ Aê Diê đru kâo huĭ mpŭ leh anăn hdơr knga kơ Ih, thâo răng hriăm, ksiêm mĭn leh anăn djă pioh Klei Aê Diê Blŭ čiăng kâo thâo klei hrăm mbĭt hŏng Khua Yang hlăm hdră wĭt kơ Ƀuôn Ala Mtao.
Dlăng Klei Aê Diê Blŭ hlăm tlâo thŭn: Y‑Yêrêmi 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
