Klei Aê Diê Blŭ: Klei Bi Hriêng 1:20-21
Êlan kliăng: “Klei knhâo ur kraih hlăm êlan dơ̆ng, ñu ur ti krah sang mnia.” (Klei Bi Hriêng 1:20)
Klei êmuh ksiêm mĭn: Ya rup mtao Salômôn yua čiăng bi msĕ hŏng Klei Knhâo? Klei bi msĕ anei si brei ƀuh Klei Knhâo jing leh anăn hlei pô jing Klei Knhâo (dlăng Y‑Yôhan 14:6)? Thâo săng klei anei đru drei bi mlih ya knhuah tơdah hriê hŏng Klei Aê Diê Blŭ?
Klei čhuai prŏng hĭn kơ lu mnuih êjai răk dlăng hdruôm hră Klei Bi Hriêng, anăn jing dlăng kơ hdruôm hră anei msĕ si đa hdruôm hră pioh bi hriăm kơ hdră êlan hdĭp knhâo ti lăn ala čiăng kơ djăl pral mâo klei tŭ jing hlăm klei hdĭp. Ƀiădah Klei Bi Hriêng kñăm čiăng amâo djŏ knŏng brei klei mtô lač thâo mĭn ôh ƀiădah jing kdlưn kbưi hĭn.
“Klei knhâo ur kraih hlăm êlan dơ̆ng, ñu ur ti krah sang mnia” (êlan 20). Hlăm klei blŭ phŭn, mtao Salômôn bi msĕ “klei knhâo” hŏng sa čô mniê. Kyuanăn, êlan 20 dưi thâo săng: “Klei knhâo ur kraih hlăm êlan dơ̆ng, ñu (mniê) ur ti krah sang mnia.” Hdruôm hră Klei Bi Hriêng brei thâo Klei Knhâo amâo djŏ knŏng jing klei mtă mtăn amâodah êlan hdră pioh hdĭp ôh, biădah Klei Knhâo jing sa čô MNUIH dôk hdĭp mbĭt hŏng drei. Snăn, hdruôm hră Klei Bi Hriêng amâo msĕ hŏng đa êlan Klei Bi Hriêng mkăn, klei duê, amâodah đa hdruôm hră mtô klei ênuah ênô leh anăn knhuah hdĭp hlăm lăn ala ôh, ƀiădah hdruôm hră Klei Bi Hriêng atăt drei nao kơ Pô Knhâo Thâo Mĭn.
Hlei jing Pô Thâo Mĭn? Khua Yang Yêsu lač leh hlăm Y‑Yôhan 14:6: “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama knŏng hŏng Kâo.” Hlăm Y‑Mathiơ 7:24, Khua Yang Yêsu hưn klă Ñu yơh jing Pô Thâo Mĭn. Kyuanăn hriê kơ klei Khua Yang Yêsu mtô jing hriê kơ Pô Thâo Mĭn. Kdlưn hĭn, hriê kơ Khua Yang Yêsu ăt jing hriê kơ klei hdĭp sĭt (Y‑Yôhan 10:10). Blŭ mdê, hriê kơ Klei Aê Diê Blŭ lač kluôm amâodah hriê kơ Klei Bi Hriêng lač mdê hjăn jing hriê kơ Khua Yang Yêsu pô yơh. Khua Yang Yêsu tuôm ƀuah kơ phung ƀuôn sang Yuđa snei: “Diih ksiêm bi nik Klei Aê Diê Blŭ, kyuadah diih mĭn hlăm anăn diih mâo klei hdĭp hlŏng lar. Klei Aê Diê Blŭ anăn yơh hưn bi sĭt kơ Kâo” (Y‑Yôhan 5:39). Klei kñăm čiăng knhal tuč kơ klei hriê kơ Klei Aê Diê Blŭ jing pioh atăt drei mŭt hlăm klei bi mguôp hŏng Khua Yang Yêsu leh anăn dưi jing msĕ si Ñu.
Lu mnuih hruê anei knŏng tui duah klei thâo mĭn ti lăn ala čiăng duh kơ klei mnia blei, bi mdrŏng ƀiădah amâo mđing uêñ duh kơ ênuk hlŏng lar ôh. Lu phung đăo nao kơ sang kkuh mpŭ leh anăn atăt phung anak nao kơ sang kkuh mpŭ knŏng čiăng tui duah klei mtô lač ênuah ênô, duah sa kdrŭn anôk leh anăn êpul êya hơĭt jăk. Mbĭt hŏng klei anăn, lu mnuih mâo klei mơak kơ diñu pô, kơ gŏ sang, anak aneh kyua mâo klei hdĭp ênuah ênô, luă gŭ, đup gưt, thâo mpŭ, kriăng hriăm hră mơar, kriăng mă bruă knuă, thâo khăp kơ gŏ sang…, ƀiădah amâo mđing mĭn ôh kơ ñu pô leh anăn gŏ sang pô bi tuôm sĭt hŏng Khua Yang Yêsu leh amâodah ka. Klei hriăm hruê anei mñă kơ drei snei, klei duh djŏ hjăn kơ pô jing duh kơ klei ksiêm hriăm Klei Aê Diê Blŭ čiăng bi tuôm hŏng Khua Yang Yêsu, thâo kral Khua Yang leh anăn klei hdĭp mngăt đĭ hriê kơ prŏng dưi jing msĕ si Khua Yang hĭn grăp hruê.
Si ngă drei tuôm bi êmuh mơ̆ hjăn pô, leh nao Sang Aê Diê leh anăn hriăm Klei Aê Diê Blŭ, si klei drei thâo kral Khua Yang, si klei drei jing msĕ si Khua Yang?
Wal lač: Ơ Khua Yang, akâo kơ Ih brei kâo bi tuôm hŏng Ih pô hlăm grăp pŏk hla hră Klei Aê Diê Blŭ, hlăm mnĭt mmông ksiêm hriăm Klei Ih Blŭ, êjai dôk hmư̆ klei mtô mblang. Akâo Khua Yang brei kâo nao giăm Ih hĭn, thâo kral Ih lu hĭn leh anăn klei hdĭp mngăt myang kâo đĭ hriê kơ prŏng hĭn êjai.
Dlăng Klei Aê Diê Blŭ hlăm tlâo thŭn: Klei Čŏk Hia 2:10–3:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
