Pajlug 1:20-21
Nqe cim.
“Cia li mloog! Tswvyim lub suab hu tom tej kev thiab tom tej kiab tej khw,” (Pajlug 1:20).
Lus nug rau sawvdaws xav:
- Vajntxwv Xalumoos siv dabtsi los piv txog Lub Tswvyim?
- Los ntawm yam muab piv no qhia pom hais tias lub tswvyim muaj yamntxwv licas? thiab Lub Tswvyim yog leejtwg? (saib Yauhas 14:6)?
- Thaum paub txog tej no pab peb coj tus cwjpwm zoo licas thaum nyeem
kawm Vajtswv Txojlus?
Qhov txhaum ntawm coob leej thaum nyeem Phau Pajlug yog saib phau ntawv no zoo li ib phau ntawv qhia ua neej nyob muaj tswvyim kom ua tiav txhua yam hauv lub neej xwb. Tiamsis lub homphiaj ntawm Phau Pajlug tsis yog tsuas qhia tej lus txawj ntse, muaj tswvyim xwb, tseem muaj ntau yam tshaj qhov ntawd.
“Tswvyim lub suab hu tom tej kev thiab tom tej kiab tej khw” (nqe 20). Nyob hauv paus lus, Vajntxwv Xalumoos tau muab “lub tswvyim” piv li ib tug pojniam. Yog li ntawd, nqe 20 kuj txhais tau hais tias: “Tswvyim zoo li tus pojniam lub suab hu tom tej kev thiab tom tej kiab tej khw.” Phau Pajlug qhia paub hais tias Lub Tswvyim tsis yog tsuas hais txog tej lus qhuab ntuas lossis tej kabkev ua neej xwb, tiamsis Lub Tswvyim yog ib tug NEEG nyob nrog peb. Yog li ntawd Phau Pajlug tsis zoo li tej nqe kuab lus, txwm lus lossis tej phau ntawv qhia neeg ua lub neej zoo xwb, tiamsis Phau Pajlug coj peb los cuag Tus Uas Muaj Tswvyim.
Tus Uas Muaj Tswvyim yog leejtwg? Tswv Yexus hais hauv Yauhas 14:6: “Kuv yog txojkev ntawd, yog qhov tseeb thiab yog txojsia. Tsis muaj leejtwg mus cuag tau Leej Txiv tsuas yog mus ntawm Kuv mus xwb.” Nyob hauv Mathais 7:24, Tswv Yexus hais meej hais tias Nws yog Tus Uas Muaj Tswvyim. Yog li ntawd thaum los cuag Tswv Yexus tej lus qhia ces yog los cuag Tus Uas Muaj Tswv Yim. Tshaj ntawd, los cuag Tswv Yexus kuj yog los cuag txojsia tseeb (Yauhas 10:10). Lossis hais ua lwm seem lus, los kawm Vajluskub lossis Phau Pajlug yog los cuag Tswv Yexus ntag. Tswv Yexus cem cov neeg Yudais hais tias: “Nej tshawb nrhiav Vajtswv Txojlus rau qhov nej xav tias yuav ntsib txojsia ib txhis tsis kawg hauv Txojlus ntawd. Txojlus ntawd kuj ua timkhawv txog Kuv” (Yauhas 5:39). Lub homphiaj kawg ntawm kev nyeem kawm Vajluskub yog coj peb los rau kev sib raug zoo nrog Tswv Yexus thiab ua tau neeg zoo li Nws.
Niaj hnub nimno muaj coob leej tsuas txhawj nrhiav lub tswvyim hauv ntiajteb nqis peev rau kev ua lag ua luam, ua kom npluanuj xwb, lawv tsis quavntsej npaj nqis peev rau lub neej ibtxhis. Coob tug yog cov ntseeg lam tuaj pehawm thiab coj lawv tej menyuam tuaj hauv Tuamtsev tsuas yog tuaj nrhiav tej lus qhia ua zoo, nrhiav qhov chaw zoo rau cov menyuam, thiab tau nyob kaj siab xwb. Tsis tas li ntawd xwb, muaj coob tug txaus siab rau tus kheej, nws tsev neeg thiab nws tej menyuam vim lawv ua tau lub neej zoo xws li paub cai, hlub niam hlub txiv, nquag kawm xyaum, hlub tsev neeg,… tiamsis lawv tsis quav ntsej txog qhov uas tus kheej thiab tsev neeg puas tau ntsib Tswv Yexus lawm tau. Zaj kawm hnub no qhuab ntuas peb hais tias, kev nqis peev muaj nqis ces yog nqis peev rau kev kawm Vajluskub thiaj yuav nrhiav ntsib Tswv Yexus, paub tus Tswv thiab loj hlob hauv sab ntsujplig kom zoo thooj tus Tswv txhua hnub.
Thov Vajtswv,
Tus Tswv, thov pub nyuam yaus ntsib Koj thaum mloog, nyeem, kawm Koj Txojlus. Thov pab kom nyuam yaus nyob ze Koj, paub Koj thiab loj hlob sab ntsujplig heev ntxiv. Amees.
Puas muaj ib zaug twg peb rov nug tus kheej hais tias tomqab mus pehawm thiab kawm Vajluskub, tus kheej paub tus Tswv zoo licas thiab, tus kheej zoo thooj tus Tswv qhov twg lawm tau?
Nyeem Vajluskub hauv peb lub xyoos: Nkauj Quaj Ntsuag 2:10-3:9
Kênh Youtube BHKTHN:
