Klei Aê Diê Blŭ: Klei Bi Hriêng 18:24
Êlan kliăng: “Mnuih mâo lu phung mah jiăng srăng mâo klei knap mñai kơ ñu pô, ƀiădah mâo sa čô mah jiăng dôk sĭt suôr jing jăk hĭn kơ sa čô ayŏng adei sa amĭ ƀă.” (Klei Bi Hriêng 18:24)
Klei êmuh ksiêm mĭn: Mtao Salômôn mtô si hnơ̆ng yuôm kơ sa čô mah jiăng sĭt suôr ? Ya ngă mâo sa čô mah jiăng sĭt suôr jing jăk hĭn kơ ayŏng adei sa amĭ ƀă? Si drei dôk hdĭp čiăng dưi jing mah jiăng sĭt suôr kơ ayŏng amai adei hlăm klei đăo ?
Mtao Salômôn kñăm kơ hnơ̆ng yuôm sa čô mah jiăng sĭt suôr. Tal sa, gru hnơ̆ng yuôm hĭn kơ hnơ̆ng ênoh. Arăng ênưih snăk mâo lu mah jiăng tơdah mdrŏng sah. Ƀiădah hin snăk mâo sa čô mah jiăng čiăng kah mbha, čiăng đru tơdah dluh lĕ, dleh dlan. Hlăm klei knap mñai kơh thâo kral ai tiê mnuih, hlăk knap mñai kơh thâo kral hlei pô jing mah jiăng sĭt. Mâo lu mah jiăng ƀiădah amâo djăp klei sĭt suôr, kƀah klei thâo săng tăp năng atăt truh kơ klei soh čhuai huĭ hyưt (Klei Bi Hriêng 13:20). Tal dua, sa čô mah jiăng sĭt suôr jing jăk hĭn kơ sa čô ayŏng adei sa amĭ ƀă. Mah jiăng sĭt suôr mđing hmư̆, uêñ mĭn đru hlăk mâo klei čiăng, thâodah mmông găl amâodah dleh dlan, mah jiăng ăt kăn kbưi hŏng drei. Lač kơ ayŏng adei sa amĭ ƀă jing lač kơ klei bi mguôp sa êrah leh anăn khăng dưm êlâo hĭn kơ mah jiăng kyuadah mnuih sa êrah brei mâo bruă klam hdơ̆ng pô. Ƀiădah lu blư̆ kyuadah hañ đei khăp, gĭr đru dŏng kơ phung hlăm sang tơl kƀah hĕ klei kpă ênuah, čiăng mâo thâo săng djŏ klă leh anăn klei mtă mtăn tŭ dưn. Tăp năng ayŏng amai adei kyua mdê bi thŭn, mdê hnơ̆ng thâo, mdê kdrŭn klei hdĭp snăn dleh mơh bi đru mâo klei tŭ dưn.
Mah jiăng sĭt suôr jing yuôm êdi kyuadah hlăm klei knap mñai, klei mah jiăng kčĕ jing yuôm msĕ si êa ƀâo mngưi, msĕ si êa drao dluih bi êđăp asei mlei ai tiê klei mĭn: “Êa ƀâo mngưi leh anăn mnơ̆ng ƀâo mngưi čuh bi mơak kơ ai tiê; msĕ snăn mơh klei mah jiăng bi kčĕ” (Klei Bi Hriêng 27:9). Mah jiăng sĭt suôr srăng blŭ klei sĭt čiăng bi đru. Klei blŭ sĭt khăng amâo bi mơak ai tiê ôh, ƀiădah jing mah jiăng bi mpŭ bi khăp sĭt snăn wăt tơdah thâo mơh klei blŭ amâo bi mơak ôh kơ mah jiăng ƀiădah ăt blŭ mơh kyua čiăng ba klei tŭ dưn hĭn kơ mah jiăng.
Phung đăo jing msĕ si biăp Aê Diê snăn brei drei mŭt hlăm êpul phung drei. Jing kdrêč hlăm asei mlei myang Yang Krist (I Kôrantô 12) drei jing dŏ hdơ̆ng drei leh anăn jing yuôm kơ hdơ̆ng drei. Kyuanăn brei drei jing mah jiăng sĭt suôr hdơ̆ng drei. Klei blŭ mah jiăng sĭt suôr blŭ brei kna ti dlông tur Klei Aê Diê Blŭ čiăng dưi ba klei tŭ dưn hĭn kơ mah jiăng. Brei drei duah sa čô mah jiăng tŭ “hưn klei sĭt nik hŏng klei khăp” (Êphêsô 4:15). Mbĭt hŏng klei duah mah jiăng jăk, brei drei pô ăt jing mah jiăng jăk mơh. Brei drei hŏng klei kpă sĭt, hŏng klei khăp leh anăn hŏng klei thâo mĭn thâo ƀuh ya mta klei soh wê, klei kƀah kăp đru mah jiăng drei ñĕ đuĕ kbưi, leh anăn thâo bi pap đru bi kjăp klei đăo leh anăn ai tiê klei mĭn hdơ̆ng găp. Mnuih hngah klei mtô lač jing mưč kơ mngăt ñu pô, ƀiădah hlei pô tŭ hmư̆ klei ƀuah srăng mâo klei thâo săng (Klei Bi Hriêng 15:32).
Si ngă drei duah ƀuh leh mah jiăng sĭt suôr mơ̆ leh anăn drei pô jing mah jiăng jăk leh mơ̆?
Wah lač: Ơ Khua Yang, bi mni kơ Khua Yang brei kơ kâo mâo mah jiăng jăk hlăm klei đăo. Akâo Khua Yang brei kâo êdu êun mđing hmư̆ leh anăn bi mlih tơdah mah jiăng sĭt suôr đru kčĕ. Akâo kơ Khua Yang brei kơ kâo mâo klei thâo mĭn, klei khăp, klei gĭr čiăng dưi jing mah jiăng jăk kơ pô mkăn msĕ mơh.
Dlăng Klei Aê Diê Blŭ hlăm tlâo thŭn: Y‑Yêrêmi 31:1-22
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
