Klei Aê Diê Blŭ: Klei Bi Hriêng 18:4-8.
Êlan kliăng: “Hŏng êlah drei mpŭ mni kơ Khua Yang leh anăn Ama drei, ƀiădah hŏng êlah mơh drei tăm pah kơ mnuih, phung Aê Diê hrih leh tui si rup Ñu pô. Mơ̆ng ƀăng êgei anăn mơh kbiă hriê klei hơêč hmưi leh anăn klei tăm pah. Ơ phung ayŏng amai adei, đăm ngă snăn ôh. Mâo mơ̆ sa akŏ êa bi ƀlĕ êa jăk leh anăn êa phĭ?” (Y‑Yakơ 3:9‑10).
Klei êmuh ksiêm mĭn: Si Mtao Salômôn lač kơ klei bi êdah mơ̆ng klei blŭ luar? Ya jing boh jhat mơ̆ng klei luar? Klei blŭ drei si ngă čiăng ba klei jăk mơak kơ pô, gŏ sang leh anăn Sang Aê Diê?
Mtao Salômôn lač kơ klei bi êdah mơ̆ng klei blŭ luar. Tal sa, mtao lač klei blŭ mơ̆ng ƀăng êgei anak mnuih msĕ si êa êlam. Êa êlam jing anôk huĭ hyưt, amâo ƀuh tur, snăn klei blŭ phung ƀai ăt snăn mơh, amâo dưi mkă, thâo ƀuh leh anăn ba klei huĭ hyưt. Mklă wĭt, klei thâo mĭn dưi mkă msĕ si êa hnoh đoh êlam amâo thâo khuôt, ba klei hdĭp leh anăn klei hdĭp êbeh dlai. Tal dua, klei blŭ luar jing klei soh, amâo kpă amâodah mgang phung ƀai. Kyua klei blŭ luar diñu ba klei truh kơ phung kpă ênô. Diñu mtrŭt, bi mguôp mbĭt čiăng mplư phung amâo mâo klei soh. Tal tlâo, klei blŭ luar ngă kah mbha bi tăng mgăl. Hrô kơ klei blŭ ba klei bi mguôp, klei khăp, phung ƀai mtrŭt bi tăng mgăl, kjham hĭn bi čăm, knhal tuč tŭ boh jhat pô ngă. Klei blŭ luar hŏng klei mĭn ngă jhat kơ mnuih, mjing klei amâo thâo bi djŏ čiăng kơ grăp čô mnuih hdơ̆ng bi ngă jhat (êlan 5‑6), ƀiădah ăt mơ̆ng klei ngă jhat anăn mơh lŏ wĭt ngă kơ pô, ngă bi rai knhuih hdĭp anak mnuih, čiăng kơ mngăt phung ƀai ăt tŭ klei bi kmhal, luč klei hdĭp lă lar (êlan 7).
Hlăm êlan knhal tuč, mtao bi msĕ “Klei blŭ mnuih yăl dliê djưč jing msĕ si mnơ̆ng arăng khăp ƀơ̆ng, diñu kma êlam hlăm prôč tiê.” (êlan 8). Khua pô mtô Duane A. Mckane mblang klei yuôm bhăn mơ̆ng boh blŭ “prôč tiê” hlăm pruê blŭ jing “tian”, dưi dlăng jing anôk dưm klei blŭ leh anăn djă pioh klei leh êgao. Snăn drei čiăng mâo klei bi yăl dliê hơăi mang, yăl dliê luar dôk hlăm lam ai tiê drei mơ̆ hĕ? Đăm brei ai tiê drei mâo klei blŭ luar ôh. Brei drei răng, klei blŭ luar kñăm ngă jhat kơ mnuih srăng ba klei jhat kơ pô blŭ.
Lu mnuih hruê anei khăng blŭ luar mơ̆ng klei blŭ amâo sĭt kñăm ngă thâo săng čhuai amâodah mdăp klei soh. Mâo mnuih yua klei blŭ êlam msĕ si sô̆ djŏ hlăm prôč tiê čiăng ngă jhat kơ mnuih, ngă truh klei kah mbha hlăm gŏ sang, Sang Aê Diê leh anăn ala ƀuôn. Phung đăo kơ Krist brei ñĕ kơ klei blŭ luar anăn. Drei amâo dưi ôh hlăm sa ƀăng êgei bi kbiă klei bi mni leh anăn klei tăm pah (Y‑Yakơ 3: 9‑10). Klei drei blŭ brei ba kơ phung dôk hmư̆ hnoh êa hdĭp mơ̆ng Khua Yang Yêsu msĕ si Ñu lač leh: “êa kâo brei srăng jing hlăm ñu sa bĭt akŏ êa bluh truh kơ klei hdĭp hlŏng lar.” (Y-Yôhan 4:14b). Akâo kơ Khua Yang brei klei drei blŭ hiu hưn klei kpă ênô, klei khăp leh anăn ba klei hdĭp hlăm Khua Yang kơ grăp čô mnuih.
Klei drei blŭ ba klei hdĭp Khua Yang kơ pô mkăn mơ̆?
Wah lač: Ơ Khua Yang, kâo bi mni lač jăk kơ Ih kyua Klei Ih Blŭ brei kơ kâo klei hdĭp. Akâo kơ Khua Yang pap brei kơ kâo kyua klei kâo blŭ bi êka phung mkăn, ngă soh hŏng Aê Diê. Akâo kơ Ih đru kâo blŭ nanao klei blŭ sĭt nik, klei khăp.
Dlăng Klei Aê Diê Blŭ hlăm tlâo thŭn: Y‑ Êsai 9:8 – 10:4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
