Hais Lus Dag – 18/9/2022

565

 

 

Pajlug 18:4-8

Nqe cim:

Peb siv peb tus nplaig ua Vajtswv tus uas yog peb Leej Txiv tsaug, thiab peb siv peb tus nplaig cem tej neeg zejzog. Tej neeg ntawd Vajtswv tsim muaj tus yam ntxwv zoo li Vajtswv. Lo lus ua Vajtswv tsaug thiab lo lus cem neeg puavleej yog tus nplaig hais. Cov kwvtij, tsis tsimnyog yuav muaj li ntawd”(Yakaunpaus 3:9-10).

 

Lus nug rau sawvdaws xav: Vajntxwv Xalumoos qhia paub tus yamntxwv ntawm tej lus dag li cas? Nqi zog ntawm tej lus dag yog dabtsi? Tej lus uas peb hais yuav tsum zoo li cas kom ua rau lwm tus, peb tsevneeg thiab Pawg Ntseeg muaj kev kaj siab?

Vajntxwv Xalumoos qhia paub tus yamntxwv ntawm tej lus dag. Tim ib, Xalumoos muab cov lus hais tawm hauv neeg lub qhovncauj tuaj piv zoo ib yam li hiavtxwv tob. Qhov chaw tob yog qhov chaw txaus ntshai, tsis pom hauv qab thu, ces tus neeg phem tej lus hais kuj zoo li ntawd, ntsuas tsis tau thiab txaus ntshai heev. Tiamsis tus neeg muaj tswvyim tau muab piv zoo li tus dej cag uas ntws ntshiab si, pub tau txojsia thiab tau txojsia puv ntoob. Tim ob, hais lus dag yog lus tsis zoo, tsis ncaj ncees. Vim ua timkhawv tsis ncaj lawv thiaj ua tsis zoo rau tus neeg ncaj ncees. Lawv koom siab, koom tswvyim dag tus neeg tsis tau ua txhaum. Tim peb, hais lus dag ua rau faib ua pab ua pawg, sib cav sib ceg. Twb tsimnyog hais lus kom sawvdaws koom tau ib lub siab, sib hlub los tus neeg phem hais tej lus ua kom sib cav sib ceg, sib ntaus sib tua, thaum kawg lawv yuav tau ris lub txim uas lawv ua. Hais lus dag ua hiam tibneeg, tsim kev tsis sib haum, kub ntxhov rau txhua tus (nqe 5-6), thiab kev hais lus dag ua rau tus neeg ntawd puas koob npe, sab ntsujplig ntawm cov neeg phem raug puastsuaj thiab tuag mus ibtxhis (nqe 7).

Hauv nqe xaus, vajntxwv hais tias Tej lus uas hais luag nplig zoo hais kawg sawvdaws thiaj nyiam hais ua luaj(nqe 8). Kx.Duane A. Mckane txhais lub ntsiab lo lus “nyiam hais” yog hais txog “lub plab”, qhov chaw uas ntim tej lus hais thiab khaws txhua yam kev xav. Peb puas xav kom tej lus phem, tsis muaj qabhau nyob hauv peb lub siab? Tsis txhob cia peb lub siab ntim tej lus dag. Yuav tsum ceevfaj, tej lus hais dag hiam lwm tus yuav ua rau tus hais puastsuaj.

Nimno muaj ntau leej pheej nyiam hais lus dag los ntawm qhov uas hais lus tsis ncaj lossis zais kev txhaum. Muaj qee tus siv lus hais mob kom lwm tus nyuaj siab, ua rau muaj kev sib faib hauv tsevneeg, Pawg Ntseeg thiab lub tebchaws. Cov ntseeg Yexus yuav tsum txav deb tej lus hais dag ntawd. Ib lub qhovncauj tsis tsimnyog ua ob qho haujlwm, ua tus Tswv tsaug thiab hais lus cem lwm tus (Yakaunpaus 3:9-10). Peb tej lus hais yuav tsum ua rau lwm tus tau txojsia zoo li Tswv Yexus hais: Cov dej uas kuv muab rau nws yuav txhawv hauv nws lub siab thiab cawm nws txojsia mus ibtxhis(Yauhas 4:14b). Thov Vajtswv pab kom peb hais tej lus ncaj ncees, sib hlub thiab ua rau lwm tau pom tus Tswv txojsia.

 

Thov Vajtswv,

Leej Txiv tus uas nyob saum ntuj, ua Koj tsaug vim Koj pub txojsia rau nyuam yaus. Thov Koj zam txim rau nyuam yaus vim tej lus nyuam yaus hais ua rau lwm tus tu siab thiab ua txhaum rau Koj. Thov Koj pab kom nyuam yaus hais tau tej lus ncaj ncees, sib hlub. Amees.

Tej lus uas peb hais puas ua rau lwm pom tus tus Tswv txojsia?

Nyeem Vajluskub hauv peb lub xyoos: Yaxayas 9:8-10:4

Kênh Youtube BHKTHN:

https://www.youtube.com/c/bhkthn

Bài trướcHội Đồng Bầu Cử Nhân Sự Đại Diện Tin Lành Tỉnh Kon Tum
Bài tiếp theoKlei Blŭ Luar – 18/9/2022