Pajlug 17:21-25
Nqi cim:
“Tus tub ruam ua rau nws txiv tu siab thiab ua rau nws niam nyuaj siab kawg li.” (Pajlug 17:25).
Lus nug rau sawvdaws xav:
- Vajntxwv Xalumoos hais tias niam txiv lub siab zoo li cas rau tus tub ruam?
- Ua niam txiv yuav tsum tu thiab qhia me nyuam li cas?
- Ua me nyuam yuav tsum hloov yam dab tsi thiaj ua rau niam txiv zoo siab?
Nyob hauv tsib nqe Vajluskub luv luv (nqe 21-25), Vajntxwv Xalumoos hais txog kev muaj feem xyuam, ntawm niam txiv thiab me nyuam. Me nyuam kiab ntse ua rau niam txiv zoo siab thiab tau ntsejmuag, me nyuam ua lub neej tsis zoo ces ua rau niam txiv nyuaj siab thiab tu siab kawg. Vajntxwv sau hais tias: “Leej txiv uas muaj tus tub ruam tsis muaj kev cia siab dabtsi tsuas muaj kev nyuaj siab thiab tu siab xwb” (nqe 21). Thaum me nyuam tawv ncauj ua rau niam txiv nyuaj siab. Txawm muaj noj haus npluamias, yeej noj tsis qab, txawm noj tshuaj kho mob los tej mob tsis zoo vim kev ntxhov siab niaj hnub caij tsuj, ua rau “lub neej muaj kev tsaus ntuj nti”.
Niam txiv tes haujlwm yog qhia me nyuam mus rau qhov zoo, qhov yog ntawm kev ua neej. Vajntxwv hais ntxiv tias: “Tus neeg txawj ntse muaj lub homphiaj ua haujlwm, tiamsis tus neeg ruam tsis paub pib qhov twg tuaj” (nqe 24). Tus neeg ruam tsis paub npaj hom phiaj ua haujlwm, nws pheej xav txog tej deb dav dhau uas nws yuav ncav tsis txog, tsis yog pib ua tej yam nyob ntawm taw mus, vim lawv khavtheeb (Pajlug 14:6). Qhov sib ntsigtxog ntawm nqe 21 thiab 25 ua rau peb pom me nyuam ua rau niam txiv kev nyuaj siab muaj ntau zuj zus ntxiv. Pib ntawm tas kev cia siab, kev nyuaj siab mus txog rau qhov tu siab thiab nyuaj siab kawg li.
Tej laus muaj ib lo lus hais tias: “me nyuam ruam ua lub nra rau niam txiv”, yog xav hais txog niam txiv nyuaj siab heev thaum muaj tus me nyuam ua neeg tsis tsimtxiaj. Me nyuam ua neeg tsis tsimtxiaj tsis yog tim leej niam xwb, tiamsis puavleej tim leej txiv huv tibsi thiab. Tsis yog muab lub nra cob qhia me nyuam tso tas nrho rau ib leej twg ntawm tus ua niam lossis tus ua txiv xwb, tiamsis yuav tsum yog ob leeg sib koom cob qhia. Cov ua niam txiv yuav tau cob qhia tej me nyuam thaum tseem yau, kom lawv paub qhov txhaum qhov yog thiaj paub qaij, paub ua thiab zeem paub tus Tswv, ntseeg Vajtswv kom tau txais lub neej zoo hauv ntiajteb thiab ib hnub tau mus nyob saum ntuj ceebtsheej. Vajntxwv qhia meej hais tias: “Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej” (Pajlug 22:6). Cov ua me nyuam, nej yuav tsum paub hais tias, nej ua neeg zoo ces ua rau niam thiab txiv zoo siab, thiab ua rau lawv tau ntsejmuag. Yog nej ua neeg ruam, lossis mus ua neeg tsis tsim txiaj ces yuav ua rau niam thiab txiv tsuas muaj kev nyuaj siab, kev txajmuag mus li xwb.
Thov Vajtswv pab kom peb pom tau yam uas me nyuam ua raug rau niam txiv nyuaj siab, peb yuav tsum mloog Vajtswv Txojlus kom ua tau lub neej Vajtswv tau ntsejmuag.
Thov Vajtswv,
Tus Tswv, Koj yog Leej Txiv uas zoo, thov qhia nyuam yaus paub qaij deb yam phem, ua lub neej rau Vajtswv tau ntsejmuag, ua rau niam thiab txiv zoo siab. Thov pab nyuam yaus paub qhia tej xeebntxwv los txais txojsia ibtxhis. Amees.
Zaj kawm hnub no pab peb kev ua neej li cas hauv lub tsev neeg ntseeg?
Nyeem Vajluskub hauv peb lub xyoo: Pajlug 26
Kênh Youtube BHKTHN:
https://www.youtube.com/c/bhkthn
