Pajlug 17:12-15
Nqe cim:
“Tus TSWV saib xyuas cov neeg ncaj ncees thiab coj lawv txoj hau kev, tiamsis cov neeg ua phem tabtom taug txojkev puastsuaj” (Phau Ntawv Nkauj 1:6).
Lus nug rau sawvdaws xav:
- Vajntxwv Xalumoos qhia menyuam khiav deb tus neeg phem txojkev licas?
- Cov ntseeg yuav tsum ua neej licas thaum kawm paub tus Tswv yog tus ibtxwm Dawbhuv?
- Yam dabtsi txhauj peb ua taus siab ntev, tiv kev txomnyem thaum ua lubneej dawbhuv?
Vajntxwv Xalumoos hais txog tus neeg phem txojkev, kom cov menyuam paub khiav deb, thiab ua lubneej raws tus Tswv siabnyiam, kom muaj nqis rau lwm tus. Tim ib, koj yuav tsum khiav deb tus neeg phem thaum lawv ua tej haujlwm ruam. Tsis yog txhua tus neeg puavleej paub kev paub cai thiab ua raws kev ncaj kev ncees. Tus neeg phem lub siab tsis ncaj ncees, thaum lawv vwm lossis ua tej haujlwm ruam yim txaus ntshai. Vajntxwv piv tus neeg ruam tej haujlwm uas tswj tsis tau tseem txaus ntshai dua tus dais uas luag muab nws cov menyuam lawm. Muaj lo lus hais tias “khiav ntxhw tsis txhaum leejtwg”, yog li ntawd, yuav tsum khiav deb cov neeg phem thaum lawv vwm lossis ua tej haujlwm ruam tsis muaj qabhau. Tim ob, koj yuav tsum paub ua lwm tus tsaug. Tus neeg siab phem tsis nco luag tej txiajntsig, vim kev ntshaw lawv ua phem pauj zoo. Saib mus rau ib sab, lawv tau xaiv tej uas qhov muag pom tiamsis tsis xav txog tej uas yuav raug tomqab. Lawv tau ua phem pauj zoo, lawv yuav ua cas khiav dim lwm tus kev txob thuam thiab tus Tswv txojkev txiavtxim. Tim peb, koj yuav tsum paub tswj siab thaum sib cav. Ib yam li pas dej tawg tav tsis tau, tej teebmeem tshwm muaj thaum sib cav tej zaum kuj cheem tsis tau thiab. Koj yuav tau tsum, txhob sib cav txog qib sib ntaus sib tua. Qhov kawg, koj lub siab yuav tsum ncaj ncees, koj lub qhov ncauj yuav tsum hais tseeb. Cov txiav txim saib tus ua timkhawv tej lus los teem txim rau ib tug twg. Thaum koj hais tias tus neeg phem yog neeg zoo, lossis nkaug tus neeg zoo yog neeg phem ces yog koj tabtom ua phem, vim qhov koj ua ntawd ua rau luag txiavtxim tsis ncaj ncees. Tus Tswv ntxub ntxaug tej kev txhaum zoo li ntawd.
Vajtswv Txojlus thaum chivkeeb los txog niaj hnub nimno yeej qhia tibneeg ua ncaj ua ncees, qaij deb kev phem kev qias. Tus Tswv hais tias: “Nej yuav tsum ua neeg dawbhuv, rau qhov kuv yog tus TSWV uas yog nej tus Vajtswv, kuv yog tus dawbhuv” (Levis Kevcai 19:2). Thov tus Tswv foom koobhmoov, kom peb ua tau lubneej dawbhuv txij kev xav mus rau tes haujlwm. Nyob hauv lubneej txhua hnub, peb yuav tsum qaij deb tej kev sib txeeb, sib cav nrog cov neeg phem, vim kev sib txeeb yeej swb zoo li ntawd tsis ua rau tus Tswv tau koobmeej. Txawm yog yuav raug poob lossis ntsib teebmeem vim ua ncaj thiab hais ncaj, los peb kuj yuav tsum txaus siab. Vajtswv Txojlus hais tias: “Tus TSWV saib xyuas cov neeg ncaj ncees thiab coj lawv txoj hau kev, tiamsis cov neeg ua phem tabtom taug txojkev puastsuaj” (Phau Ntawv Nkauj 1:6). Tus Tswv yeej paub tej uas peb ua thiab Nws yuav foom koobhmoov rau peb.
Thov Vaj Ntsujplig pab peb muaj tswvyim kev txawjntse, kom paub ua ncaj ua yog, thiaj yuav pab peb qaij tej yam tsis zoo thiab tau txais Nws tej koobhmoov.
Muaj yam dabtsi peb yuav tsum hloov kom ua haum tus Tswv siab thiab qaij dhau tej teebmeem uas cov neeg phem ua tuaj rau peb?
Tus Tswv, nyuam yaus ua Koj tsaug, vim Koj pub nyuam yaus muaj Koj Txojlus. Thov Vaj Ntsujplig pab nyuam yaus ua neej ncaj ncees, ua tej yam tsimnyog li Koj tej lus qhia. Thov pab nyuam yaus ruaj siab ntseeg Koj thiab ua rau Koj tau koobmeej los ntawm nyuam yaus tej lus hais thiab tes haujlwm. Amees.
Nyeem Vajluskub hauv peb lub xyoos: Pajlug 4
Kênh Youtube BHKTHN:
